#كتابات_كوميدية
#قصة_رابحه "1"
الكاتبة نرمين الحاسي ،"في هذكاهي النهار كنت ندير في كعك وحايسة في الكوجينة ويخش عليا باتي بشكاير مالحد ،نضت شفت خيرات الله ه الللحوم والخضرة والفواكة وقتله خير عليش هذا كله ، قالي هذا من عمك رجب الليلة جايين عشاء ، قتله عليش انشالله خير قال كل خير غير ابدي من توا وفتلكيه ارفعي راسي قدام العرب قتله به به ، المهم كلمت اختي الي اصغر مني وقتلها تساعدني ، وقعدنا هاك هاك ، نصبت طنجرتي ع المنصب ووبدينا نوتو ف الموالح والحلو ، المهم ماجت الساعه 6 ونا طفيت ع الطناجر معاد في الا نسخن ، نسيت نعرفكم ع روحي اسمي رابحه وعمري 31 سنة وعايشة مع بوي واختي الي اصغر مني عمرها 19 سنه وعندي اخ واحد ومتزوج المهم من ميته امي ونا نعاني ف الحوش تقول نا صاحبته ، عاد ليلت وبدو يجو الرجالة منهم ضنا عمي واعمامي الستة ورجالة منندري من طبعا قاعده ف الكوجينه ونتباوع فلي يخش ويجي ، خشت مرت خوي وعيالها الاربعه ف جرتها وقالت انساعدك ف حاجه قتلها لا كملت منبدري مغير نسخن بس ، ونا ف عقلي ي خبيثه كان ف نيتك اتساعدي راك جيتي منبدري ، المهم حطينا الصفر ووزعنا القصاعي ورز ولحم وكم نوع موالح ونا ماني عارفه عليش هذا كله المهم اسلست ورا الباب ونصنت ، وصوتهم عالي معرفتش ع ايش يحكو ، مافش غير كلمة ع بركة الله ،روحو وبعدين نسمع باتي يعيطلي مشيت لقيته هو وعمي رجب قالي تعالي قعمزي ، سلمت وقعمزت ونا الفضول قاتلني ، شوي باتي تكلم وقال يابنتي عمك رجب جاي يخطب لولده عبد الله ، ونا قلبي دق ثلاث دقات ، شوي طبست راسي ودرت جو اني منحرجه ونرجا فيه يقول جاي يخطب فيك شوي قال ، يبي اختك نوارة غير قلنا ناخذو شورتك عاد ، نا استكيت وحلال نصبي نمرمدهم هم الاثنين قتله ليش تاخذ ف راأي وعادي تو نكلمها واحكو معاها ، نقاني صبيت والدمعه حزت ف عيني وقلت لنوارة يبوك ف المربوعه .. ينعلاي عليك فرحه ماتمت ، بديت نلم ف الكوجينه وفشيت غلي فيها وتخش نوارة وترقص وتغني قتلها وافقتي بسرعه قالت ينعلي عبد الله يارابحه ينعلي وين نلقا كيفه راجل امصنع امنع وتغني وفرحانه البنت قلت اخ الدنيا نصيبات ونا شكلي امعنسه عند هلي ، المهم تمت خطبة اختي وشهادة فرحتلها غير وجعتني الكسفه ، شور ايش ياخذ ف راايي ، ودارو الدفع والفاتحه ف نفس اليوم ، ومازال ع فرحها ثمان شهور تمنيت نحس بالشعور هذا ، طبعا انا نقري في طلبة ابتدائي ، كنت ماشيه للمدرسة ومعنديش جهد انقري وهرجه العيال ينعلاااي ، كان في طالب جديد وكملها غير يبكي جيته قتله شن في ليش تبكي ياماما ، قال نبي نروح قتله انته عليش جاي قال نبي نرووح ، خخذيته ونزلت بيه للادراة وقتلهم كلموله هله
، ورقيت وبعد شوي جاني هو وباته ، وقال تحمليه ياابله ، قتله هو زي وليدي ليش منتحمله ، غير خفت معش يسكت ، شوي قال عادي نخش امعاه ،شوي بحتت للعيال ل ف الفصل وقتله باه تفضل بس متلاهيش لان نبي نشرح مهم حسيت بتوتر ونا نشرح والراجل يبحت فيها ومرا مرا يبحت ف ولده ، درت روحي مكأنش قاعد واندمجت مع الشرح وصوت لعيال ، وبعد كملت الدرس قتلا ماشالله ساكت قال ماهو من ميتة امه وهو بالحاله هذي ديما يبكي حتى ف الحوش ، الا لم نقعد امعاه ، بحتت فيه وقتلا ياروحي نا ، شوي قتلا خلاص كان هك تعال معاه ف حصتي بس ف حصص االاخرات مش عارفه ممكن حيتعود ومعش يحتاج حد يبقى معاه ، المهم قعدت قريب اسبوع وبات العيل يحضر ف الحصص عشان ولده فتحي، مهم قعدت نمشي مع نوارة كل مرا للسوق عشان تبتت لفرحها شوي قالتلي خوذيلك امعاي قتلها ياقهرتي ومن بياخذني قالت شن دراك خوذي معاي شن فيها كان بتتي من توا ، قتلها مغير يجي وساهل المهم تكينا ع مول وقعمزنا ف كفي وطلبنا نيسكافيه وكيك مهم نسهرو ونسهرو وجت عيني ف عين بات فتحي ومعاهم وحده باين عليها صغير وهك وماسكة ف يد العيل قعد يبحت ونا نبحت ونا منصدمة معقوله يكذب عليا وهذي مرته ، ي عليك بخت شكله حتا هذا بيطير من يدي ،شوي العيل جاني يجري وقالي شديري هنا قتله من هذي لي معاك قالي هذي عميمة سالمة ، قتله اها مهم حبيته وقتله هي عدي لبابا ، نعلي اطمنت ،قالتلي اختي من هذا قتلها وليد يقرا عندي ، شوي قالت اها وهذي امه ،قتلها لا متوفية شوي قالت حي مالا اشبطي ف باته قتلها هي هك مغير نلقا راس خيط ونشبط فيه بكرعي وايدي 😂 ، كملنا وروحنا ، وقعدت نوتي ف موالح عشان تلبيسة نوارة بكرا ، وهي ماقصرتش تساعد فيا بس قتلها تريحي واشقي بروحك ، مهم جهدي طاح ونا من الليل ونشتغل ، وعيت بدري وجن خالاتي ومرات خوي وقعدن يساعدن فيا ، وع جية العشية بدن يجو هل دار نوارة الي هم عيت سيدي وزحمت عندنا ،خشيت ع نوارة وقتلها خلاص وقت هي اطلعي ،قالت تمام هك جيتها وحبيتها ع خدها قتلها تهبلي ملككككة اتجننني حصني روحك واطلعي هي عبد الله اقريب ويخش ، مهم جتني عمتي وقالتلي تحقي ف وليه هذكي قتلها اينهي قالت الي معبية ذهب ، بحتت ف عمتي لي هي اخت باتي زين وقتلها بالك ذهب صيني قالت لالا ذهب عيار ثقيل ، قتلها كنها قالت عديلها تسال عليك امبدري مهم مشيتلها وقتلها خير ياعمتي تبيني قالت اها انتي اخت العروس قتلها اها اختها الكبيرة شوي قالت ماشالله تقوليش كم عمرك قتلها 31 ياعمتي ومدرسة قالت ماشالله ماشالله ، شوي ضحكت وقتلها عندك عريس قالت عندي...
يتبع ..
كان عجبتكم نكمل عقابها 🙈🙈🙈👍
