#كتابات_كوميدية
رابحه "5" والأخيرة
قعدت نخمم ف طريقة بش نفلت بيها منه ، المهم سمعت صاحبه مشا وقعدت نا وياه برواحنا ، قتلا عطشانه نبي مياه شوي مشا جابلي قتلا فكني قال تو نشربك نا وشربت شوية ، وبعدين شوي وقتلا جعانة قال مفش وكال تو نطلع نجيبلك حاجة من مطعم قعدت نبكي بلكذب وقتلا نخاف متسيبنش بروحي قال مش ح يسريلك شي بلا طروح ، شوي طلع وبعد سويعه جا اخرا ، وقعد يوكل فيا ومبش يفك الحبل شوي قتلا رافع نا بنحكيلك معش نقدر نخبي انا فرحانه عشان خطفتني وربحتني من عذاب وهم ، قال كيف ، قتلا اصلا نا منحبش خطيبي ولا نبيه باتي غصبني عليه وتميت نبكي بلكذب لكن اصلا نبكي عشان محبوسه😂 وقال بلاش طج اضطريت نحلفله وقلت والله منكذب مغصوبه عليه نا ومازلت نحبك قلتها حتا لباتي وواجهته وشوي قتلني خلينا نهربو اصلا مليت نا من العيشة هذي ،شوي جا فكلي الحبل وقال اربوحه تحكي جد قتلا نحكي جد بس لازم نطلق منه نا ، قال ليش قريتو فاتحه قتلا اها لازم نطلق وبعدين نهرب امعاك قال لا بلاش كذب بيش تهربي مني شوي قعدت نبكي ونقول منبيش انا كيف تفهم راجل كبير يبو يجوزني له شن نبي فيه ومنحبش اصلا ، بكلمتين اقنعته وقتلا تو نقوللهم اني كنت عند وحده من صحباتي ، قال وعد قتلا وعد ، شوي درت روحي نبي نرقد وجا الصبح وعيته ودرت فطور ودرت جو كذابي ياشريني راني صادقه ، بعدين قتلا هي ياعمري وصلني قالي توقعتك تهربي قتلا نزعل راه مش حكينا امبارح ، قال صح شوي حبني ع راسي ونا تقزززت منه تمنيت نقتلع بيديا ، المهم وصلني للحوش واول مخشيت لقيت خوي واختي وكلهم منفجعين ويراجو فيا ، خشيت رميت روحي عليهم وقعدت نبكي بكاء يشق لكبد ، منقدرش نسكت لان موضوع خطير قتلهم اني نخطفت وووه الخخخ ، ع اساس متفقه معاه اني نهربو وهكي ، اتفقت نتلاقو ف مكان وبلغنا فيه الردع ، خذوه ومعش نندري عليه ، مشعارفه كيف نجيت من ه القصه وحاتم يسال عليا ومنشغل وقصة طويله عريضة ، باتي قال انه يبي يلغي الفرح والخطبه بمل يحساب ان رافع دارلي شي ؟ حلفتله انه متعداش عليا ونا لي اقنعته انه يجيبني هنا وضحكت عليه ، ومقبل اقنعت الاخر ، شوي بعد يومين طلع الفرح ،
وكنت خايفة انه رافع يطلع ويسببلي مشكلة ، كنت فرحانة ومش فرحانه ومش متريحه ، بعد كملت من المزين وصلت للقاعه ،وجو كان يههبل ، خشيت وامه حاطتني ف عيونها ، بعد قعمزت جت لبستني اسوارة ذهب ، وبعد ساعتين خش حاتم وكان فرحان ومش مصدق روحه بعد جا حذاي مشالش عيونه من عليا ، بعدين عدا الوقت ونا نشوف ف قريباتي يتراقصن قدامي لقطه حقيرة😒 ونا نبحت ف حاتم قتلا عينك هن ايوه ، شوي قلت لا حتا نا نصبي بحتت ف اختي وغمزتلها وحطو ع اغنيه تايتنك 😂 ورقصنا عليها
شوي بعد كملنا الرقصه الملكية😌😂 جيت بنقعمز حسيت ان الكعب انكسر طرفه من تحت حي علي فاضيح كان نصبي تو يفطنولي 😂😂مهم قال هيا نروحو قتلا باهي شوي بس ونا نبي نصبي ونحس ف الكعب طاير ومازال عالق قعدت نمحمس فيه بش ينفك ، بعدين رن تلفونه قالي هيا الساعه 9 قتلا هيا باهي صبيت ولبست البرنوص ، وجيت نزلت مع الدروج وبممم ع وجي اااااخ تمنيت لو اني متت ، تخيلتو منظري دجاجة مقلوبة ، اااه برستيجي راح كرامتي طاحت ، هيبتي اختفيت ،😭 وجت اختي وحماواتي يرفعن فيا وهو ميت ع روحه من ضحك
مبيتش نبحت ف المعازيم لان متأكدة يضحكو وحيديروني مضحكة الشهر ، بعدها صبيت ونا مش متوازنه وقتله هي هي سقد ، ركبت لسياره ومازال يضحك قتلا خلاااص عاد ،
وصوت سيارات وزفة ورانا ثاريتهم اصحابه وتمو يعرضولنا شوي هو وقف ف نص طريق ونزللهم وتمو يكشكو ع طريق وناس تبحت ونا ف سياره وعلمي ضاق ومصكرلي رواشن وعطر فايح كتملي النفس ااااخ ي حظي هي هك بدايتها ، بعد انتظار ركب الافندي وقال هي للحوش وديري قهوة جايين وحدين
قتلا قول نبصر قال والله ومش معدل
وصلنا للحوش وصلينا الركعتين وقال سقدي ديري قهوة هي راهم ف طريق ، مهم نا كزتلي وغمتلي ع اخر ، مشيت للكوجينه وندير ف القهوة ودمعتي ف عيني 😭😥 وبعدها جو وشربو قهوة وبعد ساعتين روحو ، طبعا نا مشيت خشيت رقدت وقلت خليه ، ماوعيتش الا ع صبح وماهوش قاعد حذاي ، قعدت نبكي بالعبرة ، 😭 مشيت فطرت ونرن عليه ثاريته تلفونه ناسيه هنا ، بعد ساعتين جا وجاب معاه غداء قال صباح الورد ياوردة ونا ف عقلي عدي نعنبوك وردة شنو بس ، بعدين قال سامحيني ع امس غير هذوم اصحاب الشغل واصرو انهم يجو ، قتلا به تمام ، شوي بعدها مدلي زرف وقتلا هذا ايش قال افتحيه فتحته وطلعت تذكرة سفر لتركيا😭 نسيت ليله امس ونسيت طيحة امس قتلا تركيا مش مصدقه قال بكرا وتي روحك الساعه 9 نطلعو ، فرحت فرحه وقال نقعدو شهر ونروحو انا طرت من فرحتي ، شوي جا امباكرها وتيت روحي ومشينا للمطار ،
طبعا وصلنا غادي واول منزلت شفت حياة ثانية ، 😍 وطبعا عشت ف العسل غادي ، وبعد روحنا انتقلنا لمدينة اخرا بعيده ععن هلي وكنت فرحانه لان خلاص معش في رافع
بعد ماعدن ثلاث سنوات قعد عندي بنية وسميتها ع اسم امي "رجعة" ، واشتغلت ف مدرسة اخرا ،وطبعا من قصتي يابنات ،مش اي خد توثقن فيه مش اي حد عنده لحيه راهو راجل ايوه ، وزي مانتي متبيش حد يضحك عليك متضحكيش ع راجل حكيتي معاه لان اللعب عليهم مش ساهل ، 😂 وراه حتا لو وصلتي 40 القطار مازال مافاتك والنصيب ع الله ..وهذي قصة رابحه ...
