#كتابات_كوميدية
#قصة_رابحه "2"
ممنوع النسخ واللصق الكاتبة نرمين الحاسي ،، انا فرحت وقلت خفي ي بنت قتلها نمشي شوي تو نجيك ي عمتي ، وبعد شوي خش عبد الله لبس نوارة وكل ميديرو حاجه البنات يتعايطن ماني عارفه ليش ، بعدها مشيت لعمتي عاد 😂 قتلها ناقصتك حاجه قالت تعالي اقربي جاي ، طلعت تلفونها وورتني صورة لواحد قالت هذا اولدي الكبير حاتم عمره 46 سنة ومحامي لكن مطلق بس ، شوي قعدت تبحت لصورته زين قتلها والله ي عمتي كان في نصيب تو ياخذني لكن ع باتي نا ، كان علي ماني قايله شي ، شوي ولعن الاذاعه وقتلهن حطن ع زمارة وبديت نشطح قدام عمتي المستقبليه عشان تزيد تنعجب بيا 😂😂😂 وهي تبحت ومبتسمة ، مهم عدت هذك الليلة ع خير وباتن عندنا البنات ومشت ليله لعند الفجر كلها سهاري والي ماسكة التلفون وتحكي والي تاكل وكل وحده ف عالمها ، رقدت وسيبتهن عشان عندي دوام في الصبح ، وعيت ناشطة ودرت الفطور ومشيت للمدرسة ،كانت حصتي الاولى وجيت بدري ع خشتي لقيت بات فتحي مقعمز بروحه ف اخر درج والفصل مازال فاضي خشيت وضحكت قتله صباح الخير وينه فتحي قال غايب انا نحضر بداله قتله اها مش مشكله ليش غايب انشالله خير قال حرارة ، قتله بالشفاء وقعمزت نراجي ف الحصه ترن بش يرقو العيال والراجل يبحت لين انحرجت منه ، جاني وحط ورقه قدامي ومع خشت لعيال ورد مكانه حطيتها ف دفتر بتاعي ومفتحتهاش وشرحتلهم وبعد انتهت الحصه طلعت طول وسمعت صوته ، راابحه لفيت وقتله نعم شن في ، قال فكري ف الموضوع كويس ومشى ، مهم روحت ودرت الغداء ونسيت موضوع الورقه بكل ، جا الليل وشفت شنطتي وقعدت نصحح ف كراسات وجيت للدفتر طاحت هذك الورقه شوي فتحتها لقيت رقم بس ، درت نص رنة وصكرت وقعدت نراجي يرد عليا ، قعدت قعدت قعدت لين جتني رساله شوي ونرن عليك قاعد برا ، قعدت نراجي لين تلفون ولع جيت لقيته هو رديت الو الو ، قال واخيرا كنت نراجي فيك منبدري ، قتله اها شن خطرلك بهي ، قال تقدري تقولي معجب ، قتله يعني تعبت روحك عشان تقولي معجب هيا نا نبي نصكر قال لا والله لا غير اصبري ي وليه كنك مستعجله نابيدي انريدك وراه عاجبتني ويشهد الله راني صادق قتله كملت قال يرا كنك ركابة انتي متعطيش نفس بكل ، شوي سكتت وحسيت روحي زودتها وقتله به شن مطلوب مني توا قال واو عليك جفاف ثاريتك قتلك نبيك وتقولي شن مطلوب مني ، وقتله بعدين منهي لي معاك يومته قالي اختي وعن قريب تو اديرلك زيارة قتله الستر عليش يعني ، قال فوق مانك جفاف وعبيطة اخرى مهم انا بكرا منش جاي راه وولدي شكله خذا عليك ، قتله اها ونا ف عقلي تو نفقدك ، مهم مشن ايام ونا نحكي معاه وثاريتني تعلقت بيه 😢 ، ف يوم من يومات العشية طق الباب وطلعت هذك العزوز ومعاها وحده باين عليها بنتها ولا مرت ولدها ، قتلها تفضلن تفضلن ، قالت البنت زاد فضلك رابحه قاعده ، شوي بحتت فيها العزوز قالت رابحه مصبيه قدامك بحتت فيا بتكشيرة يعني متوقعتنيش رابحه ولاكيف ، مهم خشن ودرتلهن قهوة وحطيت نوع بيتي فور ، وعاد تمينا نسهرو لين قالت العزوز ناجايتك نريدك لولدي ها شن قولتك قتلها والله انا ماني قايله شي وكل شي نصيب نخبر باتي ونرد عليكم ، قالت تمام باه ، مهم جا الليل ونا نبرم جاي وغادي ف الحوش روح باتي ودرتله عشاء بعدين قتله تبي شي ، قال لالا طلعت نبرم نبرم ورديت جبتله كباية عصير ليمون طبيعي وقتله هاك كويس وطلعت ، ونا دودة نبي نحكي خشيت عليه اخرا قتله نا نبي نرقد اتريد شي قال تعالي جاي منبدري وانتي اتحوحسي كنك طلعي الي هناك ، قعمزت قتله والله منحرجه كيف نخبرك ، قال قولي ، قتله انبدري جو عرب قال وبهي ، قتله جو يخطبو وطبست راسي لوطة عاد بش ميقولش هذي تبي تجوز قال يخطبو ف من قتله ف من يابااتي في رابحه بعدها قالي ورابحه ايش قالت ، قتله موافقه علا صوته قال ايييش ،خفت وقتلا بتاخذ شورتك رابحه ها ايش قلت ، نسألو عليهم قبل ونعرفوهم المن ف العرب وبعدين ساهل كلا نا مش هاين علي نطلقك ، شوي درت ضحكةة راني عارفتك اتبصر ،وقلت خلاص شوي ونقعد عزوز نا ، قال والله الحوش مظلم من غيرك ي رابحه من ميته امك الله يرحمها ونا نشوف فيها فيك ، تشبهيلها واجد ، وتذكري في بيها ، شوي قتله وليش مازوزت ، قال ايييييي ماعاد فيها كني هك متريح ، مهم صبيت ولقيت هذك يرن عليا رديت وحكينا ومجبتلاش سيرة العرب لي جو بكل ، بعد اسبوع هك باتي سال ع العرب اوافق وخذا شورة اسيادي وزادو سالو عليه اوافقو كلهم رديت عليهم وقالو بيديرو مقابلة شرعيه ، عليك يوم مانننساه وعليك فرحه ، مشيت لبست ومكيجت ولبست عدسات خرش ، وفتلكت روحي لكن الغضيب باتي قالي البسي عباية ولا جلابية ينعلي يبني نعنس ، مهم لبست زي قفطان مغربي طويل ولفيت وشاح نص راسي وطلعتله وراجل عيونه قريب ويطلعن من تبحيت ، قعمزت يلاه ، وقالي شن شروطك ، قتلا ، شغلي هو شغلي وشقه بروحي اهم شي هذا خاطي هك مانبي شي ، قال شقتي واتيه ومفروشة وحال غايتي يكون الفرح خلال شهرين ، نا ارتبكت وقتلا مازال بدري ، قال انقانك يابنت خشيتي خاطري ومن يومته وهو يسهرولي عليك ومش مصدق امتا نشوفك ، ونا درت روحي البنت الخجولة وقعدت نلف ف وجي ونبتسم ع الخفيف شريني راك احرجتني وقف خلاص 😂 شوي قال عندك نقال قتلا اه عندي بس خارب ، قصته طويله ، قال ماعليك تو نجيبلك احسن نقال ادللي بس ، بعدها قال عيونك سماح نا نحرجت طبعا لانهن عدسات ، بعدها قال طبيعيات ضحكت لاارادي ومسكتني ضحكه وقتله. ..
يتبع ..
والله يدي وجعتني من الكتيبة بكرا نكمللكم 😂😂😂 وممنوع نسخ ولصق رجاااء خااااصص
#نرمين_الحاسي
