مشاعر_مطرطشة
الحلقة الثالثة
احمد : خلاص توا خليني نمشي للشقة انرووح اكيدة ترجى فيا الولية
لامار : تم احمد وراك تنسى الحلوو بكرة
حنين تعكر جوّها واضايقت مش عارفة ليش
"""
احمد طلع منهم وعدّى شور شقته
"أحمد مزوج وعنده بنووته اسماها روان "
رقدت حنين مضايقة ومش عارفه عليش جوّها قعد مضايق فجأ هكي وخلاص
""""
نرمين قعدت تبكي في نص الليل
سمعتها فاطمة ناضت
فاطمة : كنك شن في نرمين كنك تبكي
نرمين : نبكي عشان خنت الثقة امتاع مازن
فاطمة : اي ثقة فهميني وبطلي ابكاء
نرمين : مازن ماعمره فتش نقالي ماعمره شك فيا ماعمره ضغط علينا
بالعكس وامخلينا علي راحتنا بكككل
فاطمة : صح كلامك كله بس ليش تحكي هكي
نرمين قعدت تبكي وماوقفتش ابكاء
فاطمة : سالتك بالله فهميني را نبدا نبكي حتى انا امعاك
نرمين : اليوم طلعت مع الصادق بالسيارة برة الجامعة
فاطمة : شن شن شن شن من امتى نحن نركبوو في سيارات
نرمين : مش عارفة كني ضعفت والله نادمة بكككل
فاطمة : كيف جاتك الجرءة بس وتركبي معقووله اديري حاجة كيف هكي يانرمين بجديات انصدمت فيك بكككل
نرمين : خلاص انا نادمة وسكّرت عليه بكككل
واضبطت فاطمة وقعدت تبكي
مازن كان نايض ومش راقد يفكر ويحاسب في نفسه
ويقوول امتى التوووب علي حالك
واتفوووت هالوجيج وهالقصص اللي خاش فيهن
وفجا سمع صوت من دار البنات
مشى شوور الدار وخبّط عالباب
مافش حد رد فتح الباب
لقاهن رقدات
قال شكلي تهيالي
دارن روحن راقدات لما خش مازن عليهن في الدار
مايبنش مازن يفطن انهن كانن يبكن
""""
احمد وصل للشقة
سهام : انست حبيبي نورت كنت نرجى فيك كنك طولت معقوله اتروح تو نص الليل
احمد : كنت في حووش هلي وخذتني الدوة والهدرزة امعاهم
سهام : باهي رن عليا معش تشغلني عليك ,, المشكلة رنيت عليك ماردتش كالعادة هالحركة البايخة اللي فيك
احمد : مانفطنش بس سهام
سهام : باهي عشاك واتي انسخنه لكي
احمد : لاتعشيت في حوش هلي
سهام : تعشيت اخرة تمام بكل بكل
احمد : تي كنك انتي ناوية مشكلة ولا شن
سهام : مكني شي جو تمام حمادي
احمد : وين روان
سهام : راقدة قاعدة
""""""
نرمين : نووض نووض مازن هيا وقت عالجامعة
ناضوو وافطروو وشالهم للجامعة
"""""
حنين فرحانة عشان تعرفت علي فاطمة ونرمين
وتبي اتعرف عليهن اكثر واكثر واتصاحبهن اخرة
قاعدة مع باتها في السيارة وشايلها للجامعة ,,
وجوّها تعدل احسن من امس في الليل بواجد
""""
وصلن نرمين وفاطمة للجامعة وكل وحدة مشت لمحاضرتها
وحنين مشت لمحاضرتها حتى هيا
ومازن ماشي يشووف البضاعة عشان يتمم عليها شن صاير امعاهم
الجماعة
""""
أحمد مشى لمبنى الامن الداخلي عشان يستلم شغله الجديد
رحّبوو بي كلهم
ودار مؤتمر صحفي نقلنا جميع القنوات الليبية
""""
قوبعة : تعال يالعقرب هذا اللي حطوو جديد ماسك الامن الداخلي
مازن : اها شكل جديد علينا هذا ,, لكن حنخفّفو ونلعبوو ارضي
""""
سهام : روان تعالي بسرعة بابا عالتلفزيوون جابوووه
روان : امبش شوفه بابا لعبش معايا
ضبطتها سهام وزعلانه علي معاملة احمد ليهم
"""""""
بعد كمل المؤتمر الصحفي
مشى احمد للمكتب يقلّب في الملفات
قابلة ملف العقرب
شاف صورته وشاف القضايا والمحتوى اللي فيه
اللي شغلت باله ولفتت انتباه
ان العقرب ماعندش ولا حالة قتل
ولا حالة سرقة
كلهن قضايا بيع مخدرات واسلاح فقط
"""""
امكسدات فاطمة ونرمين في الكفتريا
لين جتهن حنين
رحبن بعضهن
اتقوول يرجن في بعضهن من امس
قعدن يهدرزن عادي
نرمين : نسالك انتي البنت اللي هذكي اليوم جا واحد نابشها
في حد دافع عليها وبعدها جت الشرطة شلتهم كلهم
حنين : اها انا ,, هذا كان خطيبي وفسخنا الخطبة
نرمين : عليك حظ عارفة من هذا ولا لا
حنين : نعرفه انّ يشيل فيكن ويروح بيكن
فاطمة : انا انقوول عليش خشيتي فينا هكي من الاول
نرمين : اها توا فهمت حتى انا
حنين : ههههه حرام عليكن كنكن ركبتن فيا دغري
نرمين : هذا خونا مازن وامس سالنا عليك
حنين : بجديات سألكن عليا
فاطمة : كنك فرحانة
حنين : بطلن سماطة كنكن هكي
نرمين : اها سالنا عليك وقالن شوفن زبدتها شن وضعها بالزبط
فاطمة : شكله خويا انعجب بيك بدوون مايشووفك
نرمين : بعد خطرها سمحة ولا شينة انتي
حنين : شينة انخووف بككل
فاطمة : اهم شي الاخلاق ههههههه
نرمين : صح الجمال جمال الرووح
حنين : هابا عليكن كلا انتن
وقعدن يهدرزن ويضحكن عادي
"""""""
قوبعة : كنك رايح اتفكر واجد يالعقرب
مازن : العقرب شكله لذع روحه بروحه
قوبعة : كيف صار
مازن : في بنت شاغلة تفكيري مع اني مش شايف وجه
قوبعة : كيف جت هذي ,, انت بعقلك ولا مسطول
مازن : بعقلي ,, قصدي لابسه خمار مش باين وجها
قوبعة : العقرب طلع عنده مشاعر واحاسيس
مازن : راني انسان كيفي كيفكم هههه
قوبعة : مانك عادي ياعقربنا
مازن : مستغرب معش كلمني ايمن
" ايمن تاجر مخدارات واسلاح معروف في طبرق "
قوبعة : صح اقل شي يطمن عالبضاعة اللي بعثها لنا
مازن : اكيدة حيرن ,,
قوبعة : نرجو رادا الله علينا ايش ورانا
"""""
احمد بعد ماطلع من العمل مشى شور الحلواني عشان يشري باسطي .. وشرا باقة ورد لسهام ,,
""""
اول حاجة مشى شور حوشهم وعاطهم الباسطي عشان اول يوم للعمل رسمي وبعدها مشى لشقته
روان : بابا جا بابا جا
سهام : انست حبيب نورتنا
احمد : النور نورك اعويناتي ,, احلى روان تعالي في حظن بابا هيالا هووب
سهام : لكي واجد ماجبتلش باقة ورد ,, رايح راضي علينا الايام هذينا
احمد : ديما ضلمتيني حرام عليك
سهام : نمشي انديرلك حاجة تاكلها
""""""
نرمين : اليوم فتنا المحاضرة الثانية وخذتنا الهدرزة
فاطمة : عادي غيرنا جونا وتعرفنا علي حنين
حنين : انا فرحانة عشان كسبت خيات نفسكن
نرمين : تو انجي ماشيا الحمام
حنين : خذوني امعاك ماشيا امعاك
فاطمة : خلاص حنرن علي مازن ايجي يروح بينا بما ان نص المحاضرة فاتت
نرمين : حتّى هذا راي ,, هيا حنين
وبعدها جا الصادق شوورهن عند الكفتريا
صبّت فاطمة قدام وجه
فاطمة : اسمع فوووت اختي خيرلك ومعش اضايقها ولا تجري وراها
راه انكلموو مازن واللي ايصير ايصير هيا وجك شووف حالك
الصادق : كنك انرن عليك ما اتردش يانرمين
فاطمة : نحكي امعاك انا ,, اقلب وجك هيا ,, لما تقعد راجل اترد عليك
: وعدن مشن وسيبّنا ابرووحه :
فاطمة مشت شوور الباركي وحنين ونرمين شوور الحمام
حنين حولت خمارها في الحمام قدام المرايا
شافتها نرمين
نرمين : اوووووووو حي علي امه وحي
حنين : تي كنك ياهبلة
نرمين : اووووو حي علي امه وحي
حنين : كنك بجديات شن فيه
نرمين : تي اتهبلي وسمووحة طلعتي ,, عنجد التواضع امتاعك وخلاص
حنين : اي سمحة انحس في روحي عادية بكككل \
نرمين : سمحة راك طلعتي طررف ,, انا اللي بنت وانعجبت بيك ههههه
حنين : تي كنك انتي انهبلتي
تليفون نرمين رن وهنا في الحمام
نرمين : نعم يافاطمة
فاطمة : تعالي مازن اقريب بكككل قريب يووصل
نرمين : جايتك
حنين : كنها فاطمة
نرمين : نستاذنك نبي انعدي مازن قريب يووصل
حنين : خلاص رقمكن عندي ,, لو في حاجة دوريني
نرمين : تم تم هيا سلام
حنين : سلام
" حنين فرحانة اخيرا خليت اخته اتشوووفني هكي حتحكيله عليا
تي فرررررررحانة بكككككككككل انا
حتى انا انرن علي بابا ايجي ايروح بيا مدام المحاضرة فاتت
"""""
فاطمة : كنك طولتي عارفة مازن وهرجته واجد
نرمين : تي طلعت طرف بكككككل
فاطمة : من طلع طرف بكل
نرمين : حنين حولت الخمار في الحمام ماشاء الله لاقوة الا بالله
فاطمة : يافرحة مازن ,, حنبشروو في السيارة
نرمين : جا مازن هيا
مازن : مرحب بالنفّاخه واختها
نرمين : مرحب بالغالي مرحب
فاطمة : عندنا لكي اخبار اكويسة
مازن : شن بشرووونا
نرمين : هات الحلوو قبل
مازن : انقانكن اكبر نصبات في العالم
فاطمة : المهم طلعت هي نفس البنت حنين ومش مرتبطة
نرمين : تبي القاضية الاخرة ولا لا
مازن : شن
نرمين : طلعت طرررف واتهبل
مازن : احلى شوكلاطة لا حلى نصابات
وبعدها علق وصلة المسجل امتاع السيارة بالنقال ولع اغنية يابنات يابنات
امتاع نانسي عجرم
وقعدن يغنن امعاه وفرحان هووو واجد
""""""
لامار : غريبة فرحانة اليوووم
حنين : اها قريب انطير طلع مازن داوي هله عليا
لامار : ماشاء الله ان شاء الله يكووون وجه خير عليك
حنين : امين يااااااااااارب
""""
مازن يتغدى هو وخوته وامه رن نقاله طلع قوبعة
مازن : كنك ران عليا توا ان شاء الله خير
قوبعة : قتلك يالعقرب ايمن جاي اليوم بعد العصر يكوون في بنغازي
مازن : تم حنتقابلووو في المخزن
""""
احمد وهو يهدرز مع سهام ويلعب مع بنته رن نقاله
احمد : نعم
اسلام : قتلك يا افندي اليوم جايهم واحد من طبرق وحيجتمعوو في مكان معين شن انديرو من راي
احمد : حاليا راقبوووو بس ما اديروو شي فاهمين
اسلام : حاضر يا افندي
" اسلام يعتبر المساعد الشخصي لــ أحمد والذراع اليميين امتاعه "
سهام : امتى تفضالي انت وروان واتفوت عملك حتى اسبووع
احمد : هذا واجب وطني مايصيير شي
""""""""
بعد اذان العصر مشى مازن شوور المخزن عشان يرحب بزميله في العمل
مازن : مرحب مرحب يا ايمن ليك وحشة
ايمن : مرحب بالعقرب وايامه
مازن : راحت علينا خلاص
ايمن : اي راحت عليك وانت هربت البضاعة من العقورية لعند الوحيشي
مازن : حتى هيا البضاعة حقها نص مليوون ههههه
ايمن : سمعت عليه اللي حطووه جديد في الامن الداخلي اسمه احمد
مازن : شفته داير مؤتمر صحفي
ايمن : لازم يحصل قرصة وذن عشان يفطن
مازن : كنّا لعند توا مادار شي
ايمن : فيش تحكي انت ,, عندك علم ان يراقب فيك اول باول وماسك ملفك الشخصي ,, هذا كان مش عارف ان دايريين اجتماع سري ,,
مازن : تحكي جديات انت
ايمن : مخترقينهم نحن واي شي نبوو انحصلوووه
مازن : معناها لازم من قرصة وذن رسمي
ايمن : عنده بنت اسماها روان ,, وانت فاهم قصدي
مازن : اكيدة ,, لو اضطررنا لقرصة وذن ,, حنستعموولها اخر ورقة هذي ,, امتاع بنته
ايمن : خلاص توا خليني نمشي ,, التطويلة مع بعضنا مش في صالحنا
مازن : لو في اي جديد قووولي يا ايمن
ايمن : تم يالعقرب
"""""
حنين مشت للخلوة والمسجد في العشية
لكن في عقلها مازن بس واخذ عقلها قعد
تدعي ربي يكوون من نصيبها ومش عارفة شي ولا فاهمة حاجة
""""""
روّح بعد المغرب مازن للحوش كلم نرمين
نرمين : نعم يامازن
مازن : نبيك بكرة اتقولي الحنين ,, راه ناوي نخطب بجديات خلاص
نبيك تاخذي منها وصف الحووش ماشيين اعمامي شور باتها عشان نطلب يدها الاسبوع الجاي,, لازم انفرحوو امي
نرمين : تم تم يامازن حااااااضر
"""""
تقابلن في الجامعة الاخرة
خوات مازن مع حنين
نرمين : نبيك تعطينا وصف حووشكم ,, جينكم رجالة للحووش الاسبوع الجاي
حنين : مش لازم ادير نظرة شرعية مرات مانعجبش
فاطمة : عنجد التواضع اللي عندك بكل
حنين : لا نحكي بجديات افطوومة
نرمين : هو ماشي بكلامنا وقلناله اكويسة
حنين : براحتكم ,, راه يقوولو بعدها لقد وقعنا في الفخ
فاطمة : ههههه رسمي لقد وقعنا في الفخ
""""
وصفتلهم الحووش في الليثي حنين
ومازن كلّم اعمامه عشان يمشوولهم
"""""
حنين : فرحانة يا لامار , يبوو ايجوو يخطبووو
لامار : طيب فيك ,, اهم شي مايدخنش ومش امتاع حشيش وسكير ومحترم
حنين : دخان يدخن بس ,, وحنخليه يسيبه فترة الخطووبة
لامار : ان شاء الله ياااارب
"""""
سهام : فيش اتفكر يا احمد
احمد : لا شي عقلي سرحان بس
سهام : ان شاء الله ربي يحفضك يا اعيووني
احمد : ويحفضك ياغلايا
" أحمد يفكر مزال كيف يخش في موضوع مازن وكيف يقدر يخش للوحيشي ويمسك مازن متلبس هو وجماعته "
"""""
مازن الايام هذينا ضميرة يانب فيه
علامات التوبة والرجوع الى الله
بدن يابانن عليه
لكن يبّي من ياخذه من يده
يبي من يقعد سند له
""""
نفس الروتين العادي لاجديد
بعد اسبووع
نسّقووو يووم مشووو اقارب مازن لهل حنين
لكن مازن ماعدّش ..
انتم عارفين عادات والتقاليد في ليبيا
يمشوو كلهم الرجالة ماعدى العريس نفسه
رحبوو بيهم خو حنين وباتها وعمّها
وهدرزوو عادي في البداية
وبعدها خشوو في الموضوع
بات حنين : قال اهم شي عندي راجل يخاف الله ويصلي
وفي فترة الخطووبة ماعندش جو تكليم بالتليفون والنت لين يطلع الفرح
اقارب مازن قعدوو يبحتوو فيه بعضهم
عم مازن : اكيدة هذي اهم حاجة ,, لكن للعلم هو يبي يسكن مع امه في نفس الشقة ,, لو عاجبكم عادي ,, لو ماتبووش عادي ,, يقعد مافش نصيب
بات حنين : عطوونا مهلة وحنردوو عليكم
" ولعند توا احمد مزال مش عارف ان اللي جي يخطب هوو مازن العقرب"
اتفقوو علي كل شي يرجوو في موافقة حنين ترضى اتعيش معا مع امه ولا لا
""""
بعد روّحوو اقارب مازن
مازن : شن صار اموور طيبة
عم مازن : انت متاكد تبي اتناسبهم راهم عائلة ملتزمة كلها
مازن : اها متاكد عليش شن صار
عم مازن : قالو اهم شي يصلي
مازن : كنك ياعمي راني قعدت انصلي من فترة
عم مازن : باهي تمام
" مازن اضطر يكذب وخلاص قدام اقاربه "
""""
احمد : خذيت رقمه اللي جي يبيك ,, حنرن عليه وانتقابل امعا في كافيه
وانهدرز امعا وانشووفوو ميّته وين اتصب ,, وبعدها نمشي لشارعهم نسال عليه الجيران ,,
قبل مانعطووهم الموافقة
حنين : نجك ليا يا احن اخ عندي في الدنيا
:::::
مازن امكسد في المخزن مع الجماعة
رن علي رقم غريب
مازن : الوو من امعايا
احمد : امعايا مازن
مازن : تفضل
أحمد : انا احمد ونبي انتقابلوو انهدرزوو امعاك في كافية بكرة بعد المغرب
" مازن عارف ان حنين عندها خو اسماه احمد لكن مش عارف هو نفس الافندي امتاع الامن الداخلي "
مازن : ماعندكش اي مشكلة عادي
""""
فاطمة رنت علي حنين
فاطمة : شن انزغرتوو ولا لا
حنين : عن نفسي موافقة عادي ,, لكن خويا احمد يبي ايشوفه ويهدرز مع قبل
فاطمة : ان شاء الله خير
حنين : ان شاء الله
فاطمة : كنك من صوتك مضايقة
حنين : مش عارف انحس في روحي مش متفائلة
فاطمة : عيب شن هالكلام مهناك الا كل خير
حنين : ربي يسمع منّك
""""""
مازن لبس احسن لبسة عنده ولبس هذكي القيافة
قال اليوم نبوو انشووفوو خو المدام
لازم يشووفنا بقيافة سمحة
قوبعة : نمشوو امعاك يالعقرب
مازن : شن تبي اتخرب كل شي انت ,,
قوبعة : قعد معش اتشرف بينا
مازن : تي عيب ياهبل انبصر عليك ياغالي
""""
احمد : اليوم نبي انشووف اللي يبي يناسبنا وانهدرز امعاه
سهام : لازم تبي اتحقق امعاه طبعا حشيشتك الجو هذا
احمد : يابال موضوع في اختي
روان : بابا امتى شيلنا مول
احمد : بكرة يرووح بابا العشية كلها نمشوو للمول انا وانتي وماما ونلعبوو جميع اللعبات
احمد فتح ايديه عشان اتجي روان تجري في حظنة
مشت شوور امها وحضنتها
احمد مضايق اشوية يحس رووحه امقصر في حقووقه
""""
نرمين : كلمتي حنين شن قالت
فاطمة : حنين اموافقة ,, قالت خويا يبي ايشوفه ويهدرز امعاه
ام مازن : يارب يسر امر مازن وفرج عليه
نرمين وفاطمة : آمين يااااارب
""""""
مازن امكسد في الكافيه ويشرب في القهوة امتاعه يرجى في احمد
احمد جا للكافية ومش عارف شكل مازن
مازن كان امقعز قدامه لكن معطيه بظهرة
رن عليه احمد
مازن : وينك قاعد في الكافية
احمد : وين قاعد انت في اي جهة
"أحمد كان وراء مازن "
" مازن وهو يحكي بالنقال صبَّى من عالكرسي وبحّت وراء
مازن : وينك انت
احمد : قولي شن لابس بس
جت عينهم في عين بعضهم وتغيرن ملامح وجهم
احمد : قصدك مازن العقرب هو اللي يبي اختي
مازن : قصدك انت هوووو خوووها
يتبع .....
أنت تقرأ
مشاعر_مطرطشة (باللهجة الليبية)
Teen Fictionرواية باللهجة الليبية -) هيا منقولة من الكاتب ديندار وهي روايا حلوة بكل نبي نزلها بس نبي عليها تفاعل ارجوكم ولو مايلقتاش حانوقفها
