مشاعر_مطرطشة (باللهجة الليبية)

الحلقة 37

سامحوني هلبا علي التأخر والله آسفة كانت عندي ظروف وكانت اقوي مني فامقدرتش نفتح هدين اخر حلقتين انشالله تستمتعوا فيهن

مشاعر_مطرطشة

الحلقة 37

ولع سيارته مازن ومشى شور العزاء
طلّع نقاله واتصل بمعاوية
معاوية : اهلا
مازن : تقريبا انا ويّاك هكّي
سالكين لاتبي مني لا نبي منّك
حتى الباشق امتاعك قتلته لكي
معاوية : اه عندي علم انّك قتلته
تمام ,, المهم معش نبيك اتجي
امقابلني في أي حاجة
واتخليني في حالي
مازن : متفقين
معاوية : لو احتجت أي حاجة كلمني
اطمّن حنخدمك عادي
,,,,,
كتيبة 505 واكلة الجو
وقعد عندها شعبية كبيرة في بنغازي
على آخر انتصار حققو مازن ومعاوية باسم الكتيبة
وحتى في مؤسسات مجتمع مدني
دارو احتفال خاص بالكتيبة 505
عشان شجاعتهم وبطولاتهم
,,,,,

بعد مرور كم يوووم

شبه رد الروتين العادي للحياة اليومية في حياة العقرب
الحاجة اللي تغيرت انّ العقرب
معش قعد يتصل باحمد او يتعامل باحمد
ويعطي فيه أي خبر عالجماعة اللي يبيعووو
في الحشيش ويهربوو فيه من مكان الى آخر
فارس شراء نقال جديد وطلّع شفرتة
ولما علق واتس من جديد
لقى مسجات واجد مفروض يوصلن
واغلبهن من نرمين
قعد يهدرز امعاها عادي
,,,
لؤي قعدت اكراعة اكويسة
ويقدر يمشي عادي
وفاء قعدت تعبانة ومريضة واجد
علي انتحار بنتها
ومروان ديما يخفف عليها
....
الساعة 5:00 عصرا

حنين : جديات شايلني للمول ولا اتبصر
مازن : جديات عليش كنك مستغربة
حنين : غريبة ليا وين معش شلتني
مشيتها كلها طالع خاش علينا
اتقوول رئيس دولة
مازن : قتلك كنت مشغول في بعض المواضيع بس
والحمد الله تميّتهن كلهن
توا فضيلك
حنين عطاته بووسة من بعيد
مازن : هيا البسي نرجى فيك في السيارة
وهوو طالع
شاف امّ وخواته
مازن : تبي حاجة يا امي انجيبها لكي وانا جي
ام مازن : لا نبي سلامتك ياوليدي
فاطمة : اسمّلا علينا بعد ماكانوو يطلّعو فينا
ويغيرلوونا في جوّنا
قعدوو معش اديروو فينا بكل
مازن : هيا تبي تطلعي اطلعي
فاطمة " لا نبّش انخرب عليكم جوّكم الرومنسي
حنين طلّعت راسها من باب الدار
حنين : أي رومنسي طيّح سعدك ماشيين انجيبو في حاجات ناقصتنا
فاطمة : عازقتيهن عاد انتي
حنين : هههههههههههه
مازن وهو يضحك : هيا ياحنين تلقيني في السيارة
لو خطرت حاجة في بالكم تبووها رنوو عليا قبل ما انروح
,,,,
معاوية بدت اتخش خاطرة مايا
هو اكبر منها ممكن ب 8 سنوات
كل يوم بعد يوم ايزيد يتعلق بيها
ويهتم بيها ويخاف عليها اكثر اكثر
,,,,,
مايا : خايفة ومش عارفة ردة فعلها
تخيل تطلع تعرف اختي وين
معاوية : نحن مش خاسرين شي
حنشيلك للكوافيرة وانتي خشّيلها
وهدرزي امعاها وخوذي منها الزبدة
كلّها
مايا : خلاص هيا انغير تو نطلعوو توّا
,,,,,
سهام : كنك رايح زعلان الأيام هذينا
احمد : لا بالعكس جووو سمح بكل
اليووم امفضي رووحي وقاعد امعاكم
عشان انغيروو جونا وانهدرزوو
واتفكيني من أسطوانة انت من
اول ماخشيت للشرطة
معش قعدت مهتم بيّا
سهام : لا معش قلتها لكي
فكّنا عاد
احمد : انقانّة وقت قهووة
ديرنّا قهوة مزبووطة
من ايدّيّاتك العسل
سهام : انت العسل ياعسل
" صبّت للمبطخ سهام عشان اديرلها
فعلا احمد كان زعلان ومضايق
عشان العقرب معش قعد يتعامل معا
ومعش قعد يقوولّه في اخبار التهريب اول بأول
قعد يستر عليهم
وتحالفة مع معاوية خلّاه يضايق اشوية منّا "
,,,,,
نرمين اتهدرز واتس مع فارس
نرمين : باهي اللي حنيت قلبك عليا اشوية
فارس : الله غالب انا نفسية تحمليني
نرمين : من ناحية نفسية نفسية
بس انحبك موووووت
انمووووت فيك حبيبي
فارس : حتى انا انحبك واجد
غيّرت راي امتاعي بعد خطرها
هدرزت مع مازن في موضوع معين
نرمين : شن شن
فارس : قتلى انا حاليا مزال امطول وموضوعي واجد
نرمين : باهي
فارس : نبو انديرو حفلة وحدة
وانجيبك اتعيشي معايا مع هلي
نرمين فرحت
نرمين : تحكي من جدك ولا مقلب
فارس : عمري بصّرت امعاك في حاجات كيف هذينا انا
نرمين : واو واو مش امصدقة
والله انحبك انحبك انحبك
فارس : لكن راهُ حتحملي امعايا
واتعيشي عالحلوة والمرة متفقين
نرمين : اكيدة يا اعيوووني
,,,,,
مازن يبرم هو وحنين في الموول
خطّموو من تلا قسم الأطفال
خشت حنين للقسم الأطفال واتفرج
مازن : حيجي اليووم اللي نشروو منّا القسم هذا
حنين : عليش حيجي اليووم ,, ليش مايمكن جا
مازن : كيف
حنين : الأسبوع هذا كنت تعبانة اشوية
وانحس في حاجة جديدة عليا
نسخن واجد ,, معش عندي نية ناكل كيف قبل
مازن : باهي يعني
حنين : احتمال نطلع حامل
مازن : شن شن شن الله اكبر الله اكبر
الله اكبر الله اكبر
عليك ابشارة سمحة منّك
حنين : اس وطّي صوتك قتلك مرات مش اكيدة
مازن : انوطّي صوووتي عليش
مازن بصووت عالي : أخيرا حنقعد بااااااااااااات
العقرب حيقعد بااااااااااااااااااااااااات
وقعد يبرم علي روحه ومش امصدق
والناس كلّها اتبحت فيه
حنين : يامازن بطّل اهبال الناس يبحتّوو فيّنا
,,,,,
الكوافيرة : امك كان صاحبتي واجد الله يرحمها
مايا : تعرفي اسم راجها اول واحد من
الكوافيرة : مانعرفش لكن نعرف اسم ابنه
من الولية الثانية اللي خذاها بعد امك
حياة امك كانت تحكيلي في كل شي
مايا : من
الكوافيرة : اسمه أحمد تقريبا تقريبا
توا يخدم في مكافحة المخدرات
الفترة اللي فاتت جابو عالتلفزيون
كان يحبط في محاولات تهريب
مايا : نكذبش عليك ماعندش عالتلفزيون واجد
كوافيرة : هذا اللي نقدر انفيدك بيه
وهاكي رقمي خليه امعاك
تبي أي شي تستفسري حنحاول نذكر وانقوولك عادي
مايا : بارك الله فيك ,, في ميزان حسناتك
" كان معاوية يرجة فيها في السيارة "
,,,,,
لؤي امكسد عاللاب وكان حاط نقّاله عالصامت
مسك نقاله عشان يرن علي فاطمة
شاف اكثر من مكالمة لم يرد عليها
من أحمد
لؤي : غريبة ران عليا واجد
نادر ما يرن عليا
تو انرن عليه اكيدة
يبيني في حاجة ضرورية
" اتصل بيه "
أحمد : اهلا لؤي
لؤي : اهلين القيتك ران عليّا واجد
غير كان النقال صامت
احمد : نبي منك خدمة
لؤي : نعم
أحمد : تقدر تخترقلي ايميل معاوية مرة اخرة
لؤي : نقدر لكن مانبش , عارف انت عليش
أحمد : عارف .. بس لازم نبي نعرف
اكيدة توا بعد ما قعد مطمّن
يقعد يحكي ويراسل عادي
لؤي : العقرب قالي خلاص مهمتك انتهت
وقالي رد بالك اتفكر اتخش علي ايميلا
احمد : هذا واجب وطني ,,
لؤي : اسف مانقدرش نخترق الا باذن العقرب
العقرب قالي اخترق
حنخترق
غير هكي استحالة نخترق
أحمد : انقولك واجب وطني اتقولي العقرب
ماعندكش غيرة عالوطن
اتحط في العقرب مكان الوطن
لؤي : اكيدة العقرب اهم عندي
أحمد : غير فكّر في الموضوع
وحتطلع بيها بمصلحة معيّنة
,,,,,
معاوية ومايا في السيارة
بعد طلعت مايا من الكوافيرة
حكتلة كل حاجة
معاوية : الافندي احمد يطلع خوووك ؟؟؟؟
مايا : اها قالت هكي ,, تعرفة انت ولالا
معاوية : لا نعرفش شخصيا ,, بس شايف صورته عالتلفزيون مرة او مرتين
مايا : خلاص نبيك توصلي فيه نبي نعرف اختي من
معاوية : خليها توا ساهل ,, المهم عرفنا من يطلع باتك
الباقي خليه عليّا
مايا : كنك جايبنا هنا في المطعم
معاوية : عازمك عالعشاء
مايا : حي عليا وحي .. بعدك جعانة
معاوية : ههههه مافش رومنسية بكل ,, هيا انزلي انزلي
,,,,,
مازن نزل للحلواني وجاب قاتوووو للسيارة
حنين : قتلك شكلي '' مرات لاحمل لاشي
مازن : حتى لو كان مرات ,, اهم شي فرحتيني
حنين : المهم رد بالك اتقولها الهلك
لين نتاكدوو قبل
مازن : حاضر
حنين : تخيل توا سألووك عالقاتوو شن اتقوول
مازن : حنقووللهم جايبا لكم هكي وخلاص
"ومازن وهو يهدرز مع حنين سمع نقاله
يرن طلع لؤي "
مازن : لؤي يرن ,, ان شاء الله خير
فتح الخط عليه
لؤي : اهلا اهلا عقرب شن جوك ياباشا
مازن : تمام يالغالي ,, شن جوك انت وشن داير
لؤي : الحمد الله . نبيك في موضوع
نقدرو انهدرزوو توا فوون
ولا انرن عليك بعدين
مازن : قريب نوصل للحووش
اول مانوصل ونفضى
حنودرك وانرن عليك
,,,,,
قاعدين يتعشوو في المطعم مايا ومعاوية
بعدها خففو الظي امتاع الصالة
وتغيرت الاغنية اللي كانوو
حطيّنها وحطوو اغنية رومنسية
مايا : كنهم هذووما قوللهم مزال عيد الحب
فاهمين الموضوع غلط
معاوية يبحت فيها ومبتسم
مايا : جوك رايق اليووم
,,,
" مع انّ بعد عرف انّ خوها الافندي احمد
نفسه اللي كان يتعامل مع العقرب
غيّر جوّا وخلّا يتنكد
لكن مايبّش يحرق اليووم
وينكد علي مايا
وقال في باله حنعرف كيف اندبر راسي
في موضوعها "
,,,,
مايا : نحن هنا وينك
معاوية : امعاك قاعد
بعدها صبّى معاوية
وطلّع من جيبة خاتم ذهب
مايا اتبحت ومستغربة فيش ادير هذا
معاوية : لو قتلك نبيك بالحلال ترضي ولالا
مايا معش فهمت شي
مايا : نعم
معاوية : لو قتلك نبيك بالحلال ترضي ولالا
مايا : معاوية بطل ابصارة سالتك الله
معاوية : ما انبصرش كنك مش امصدقة
مايا : معاوية خلينا نتعشوو
وكانت الدمعة علي عينها
" معقوولة بعد العمر كلّة حنتريح "
معاوية جا جنبها ومسك يدّها
ولبسّها الخاتم
مايا خنقتها العبرة ومش عارفة شن اترد
وقعدت ساكته
ومعش عرفت حتى تاكل
ورد معاوية في مكانة
معاوية : كنك زمطي السانك ولا شن
ماكنتي من امبدري لوك لوك
مايا قعدت ساكته وجسمها رعش وثلّج
,,,,,
مروان : خلاص يا امي لعند امتى هكي انتي
وفاء : خليني يارب انمووت ونفتك من هالدنيا وخلاص
مروان : وانا المن تبي اتخليني
وفاء وهي تبكي : نجاح نجاح وجعتني
مروان : كلنا وجعتنا ,, نسال الله ان يرحمها
مالنّا الا الدعاء
" مزال مازن ماحكلهش انّ خذا
بثار نجاح لان رقمها مقفل
ومعرفش كيف يوصلّها في العزاء "
,,,
الساعة 11:00 مساءا
مازن اتصل بلؤي
مازن : شن يالغالي شن في
لؤي : حنقولك احسن ما اندس عليك
مازن : شن فيه شغلتني
لؤي : كلمني احمد وقالي
نبيك اتخش علي احسابات معاوية
ويبي معلومات
قالي توا اكيدة هو بعد ما امطمن
حياخذ راحته
مازن : هذا بيش يفهم
قتله نحنا معش دخلنا بيك
الراجل عطيته كلمة
ومانبش نطلع عيل امعاه
لؤي : شن الحل
مازن : رد بالك تسمع كلامه
خليه هو يدبر راسه
نحنا مش حندافعو علي معاوية
هو مسك علي حاجة
صحّى له
لكن انا وانت وفارس ومروان
معش دخلكنا بالمواضيع هذينا بكل
لؤي : حاضر ,, حبيت انقولك
مازن : احسن ما درت ,, تو بكرة نمشيله
وحنحاول انفهمّة اكثر واكثر
,,,,
مايا في دارها تبكي
مش عارف ليش تبكي
خطر في بالها امّها
وخطرت في بالها المعاناة اللي كانت اتعاني فيها زمان
وياما شافت في دنيتها
ومعاوية في داره يحكي مع روحه
" ماعمرش جرّبت شعور الحب انا
لكن عليش خشيتي خاطري هكي
بسرعة هل لاني ناقص حنان
لاني فاقد الاسرة واللمة
وخوك طلع الأفندي أحمد أخرة
سمع باب الدار يدق عرفها مايا
فتح الباب مايا كانن الدمووع علي اعيوونها
معاوية : كنك تبكي شن فيه
وقعد يمسح علي دمووعها
حضنها وقعد يمسح علي راسها
معاوية : مزلتي اتفكري قصدك هذا كلّه
قعدت تبتسم وادمووع علي اعيوونها
وهو حاضنها ويطبطب عليها
حاسّة بالآمان امعاه
,,,,,,,,
في اليوم التالي الساعة 10:00 صباحا