الحلقة 34
وصل احمد بسهام لعند العيادة اللي فيها لامار
لقى العقرب قاعد قدام العيادة
احمد : نهارك سعيد يا امتاع الفلايط
العقرب: نهارك اسعد ,, انت امركب ودرت موضوع
احمد : توا خلينا في المهم .. اكيدة سمعت الخبر
العقرب : اكيدة
أحمد : بكرة نفضوولهم
العقرب : واتيين يالافندي أحمد
أحمد : من امتى قاعد هنا
العقرب : امبدري اشوية كيف جبت حنين
نسـتأذنك توا ,,
احمد : حتى انا نبي نرقى نطمن علي اختي
العقرب : بكرة لنا لقاء
أحمد : تم عابي عليكم
,,,,
نجاح كانت اضم في حوشهم
سمعت رسالة واتس اخرة
طلعت من رمضان
" انتي درتي الجو هذا برضاك
ماتحسسنش انّي غصبت عليك حاجة
مش داعي اتعيشي جو الظلم وانّك مظلومة
واتعيّشي اهلك انّك بريئة "
اذكّرت لما قالتلها امّها
رد بالك اتردي عليه
وخليه يحكي ابروحه
مشت ورّت المسج لامها
,,,,,
فارس امكسد قدام المحل
شاف سيارة شرطة تبي اتخش علي حوش جنبهم
فارس بحسن نيّة ماشي
يبي يشووف شن صاير
بحكم جيران وهكّي
فارس : شن فيه كنكم ان شاء الله خير
الشرطة : اطلع منها
فارس : شن اللي اطلع منها حوش جيراني نبي نعرف كنهم
الشرطة : انت مش شورك امشي للمحل امتاعك
فارس : ههههههههه
الشرطة : نضحكش امعاك راه نحجزك امعاهم
فارس : مادروها رجّاله تبي اديرها انت
الشرطي جا يبّي يطلّع كلبشات يبي يمسك فارس
فارس فكّهن منّا
,,,
واحد من الجيران رن عالعقرب
وقاله راهو فارس داير مشكلة
مع شرطة مركز العروبة في الشارع
وكان العقرب جي بسرعة للمنطقة
ومش فاهم حاجة
'''''
فارس : شن شعورك لمّا مدني يفك منّك كلبشاتك
الشرطي : اقبضوو عليه
فارس قعد يوخر ويوخر
هما كانوو ثلاث انفار
قعد يمشي بيهم شور المحل
الشرطي : امكسو ابسرعة
فارس قعد يضحك وهو ماسكينّة
نفس الوقت دار هكّي
عشان جيرانه يهربووو ويزقبوو عالحووش الآخر
لما عرف انّهم اهربوو تريّح
حطّوو في الشيّلا
الشرطة تبي تقتحم الحوش
خشّت للحوش لقاته فاضي وكانوو هاربين
من السطاح
الشرطي : خليتهم يهربووو صار ,, احسابك امعايا
غادي في الحجز
السيارة طلعت من الشارع
كان يقدر يطلع منهم فارس
ومايخلهمش يطلعوو من الشارع
لكن مازن كان قايلّة
ردبالك تقتل شرطي او تضربه وانت الغلطان
,,,,
وصلو بيه عند مركز شرطة العروبة
والمركز هذا أصلا في منطقة الوحيشي
وكلها تعرف العقرب والقوبعة فيه
نزل فارس من سيارة الشرطة
لقى سيارة مازن قاعدة جنب المركز
فارس ابستم : أصلا عارف روحي حنطلع ليش مابيتش انكثّر امعاهم
اهم شي هرّبت جيراني
السيّارة نزّلاته للحجز ودارو في محظر وسلموو للافندي اللي جوّا
هُمّا اطلعوو من هنا
طلع فارس من هنا
وكان العقرب يرجى فيه برّة
مازن : حكولي الجماعة .. احسن مادرت خليتهم يهربوو
فارس : كيف جيراني لازم نقعد سند إلْهم
مازن : شفت لما قتلك ماتقتلش حد ولا تضرب حد
نعرف كيف انديرلك راي وتطلع
فارس : وانا عمري مشيت عكس كلامك
مازن : مزلت شريك الدرب واذراعي اليمين
انت افضل صديق واخ بالنسبة ليا
فارس :انت خويا الكبير اللي خذاني زمان
وخلاني تحت ظلّه وحماني
مازن : هيا اركب نمشو للسوبر ماركت
,,,,,,
طلع معاوية من مقر الحزب ومشى
شور الكوافير اللي اسمه
نجم النجوم امتاع الكيش
عشان يسأل ويستفسر من الجيران
,,,,,,
حبس الكويفية قعد خارج السيطرة
والمساجين دايريين اضراب وعصيان
قعد محاصر من كل مكان من برّة
بسيارات عسكرية
الباشق مزال يرجى في يوم بكرة
,,,,,,
معاوية يسأل في الجيران اللي جنب الكوافيرة
لكن مافش حد يعرف عليها حاجة نوال
,,,,,,
حنين : طالع سمووح الأمه
احمد : ماشاء الله ان شاء الله يطلع من حفضة كتاب الله
لامار : اللهم امين
حنين : وين مازن
أحمد : قالي ماشي تو ايرد عليك
سهام : تبارك الرحمن سموح البيبي
شن حتسميّه اكيدة فتحي صح
لامار وهي مبتسمة : اكيدة
,,,,
فاطمة : الحمد الله علي سلامتك
لؤي : الله يسلمك باهي اللي طلعنا مانحبش جو المستشفيات
فاطمة : اهم شي دير بالك علي صحتك
وماتضغطش علي روحك وتهملها
لؤي : حاضر ,, حندورك بعدين انرن عليك
,,,
نرمين : من هذا لؤي
فاطمة : اها طلع امبدري
رن عليّا يطمن فيا عليه
نرمين : الحمد الله ,,
فاطمة : تعالي هنا بما انّ حنين مش قاعدة
وامي قاعدة جوّا
كنك امس لما قتلك عقبالك انتي وفارس
قلبتي وجك
نرمين : اول حاجة حنين عارفة ,, ثاني حاجة معش قعدنا نفس قبل انا وفارس
هو تغير وانا تغيرت
مش عارف شن صار في علاقتنا
قعدنا معش اندورو بعضنا واجد
نفس قبل
اللي صارنّا صارنّا
فاطمة : لالا ,, في موضوع صار
مش معقولة هكي
مرات انتي قعدتي معش ادّوري هو قعد نفسك هكي
نرمين : معش اندور بالعكس ماعمرش قصرت امعاه
ممكن اكثر طلب كنت ديما نسكن عليه
انقووله ليش مانطلعو فرحنا
ونسكنو مع امك بس
فاطمة : ممكن الطلب هذا هو اللي خلّا يتغير عليك
نرمين : لا استحالة ,, عرفته زين انا فارس
مش هذا الموضوع اللي يستاهل
يخلّيه يتغير عليّا
مزلت مش عارفة شن صارله بس
فاطمة : هدرزتي امعاه
نرمين : امس دزلي رسالة مابيتش انرد عليه
فاطمة : شفتي توا من الغلطان
نرمين : حتى هو ياما دارها من قبل
فاطمة : خليك احسن منّا مش معقولة
تقعدوو هكي راه مزال ماشفتو شي
ياما حديرو مشاكل وياما حيصير
سوء تفاهم
لازم واحد منكم يمشّي للآخر
عشان تمشي علاقتكم
نرمين : يعني توا شن اندير انا
فاطمة : اتصلي بيه هدرزي امعاه
كلمي واتس احكيلا فضفضيلا
واللي يصير يصير
بدل ماتحكي الغيره
وتقعدي كاتمة علي قلبك
طلّعي اللي اهناك
والل يصير يصير
نرمين : خلاص حنهدرز امعاه ونحكيله كل حاجة
,,,,,
الساعة 1:00 ظهرا
معاوية روّح للشقة
شم بنّة مكرونة
قعد يضحك
مايا :شن رايك اليوم درتلك مكرونة صح مرطازة
لكن عادي يمشي الحال
معاوية : هههههههه والغداء اللي جبته امعايا
مايا : مش قتلي مش تبدي اتسوي خير ولا انسيت
معاوية : صح انسيت
مايا : باه شكلك انسيت حتّى انك كنت قالب وجك عليا
ان شاء ديما تنسى
معاوية : ههههههه هبلة
مايا : خلاص قريب يطيب الغداء
,,,,,
مازن يتغدى مع حنين وامه وخواته
حنين : البيبي طالع يهبل بكل ربي يحفضه
نرمين : طالع الامه ولّا الباته
حنين : اكيدة طالع الخوالة
مازن : مدام طالع الخوالة معناها شكله شين
حنين : شن قصدك
مازن : خوالة وقاعدين عندنا في الحوش
وين الجمال
فاطمة : ههههههههههههه
نرمين : ههههههههههه تم قصف الجبهة
ام مازن :يبصر عليك عرفتيه مازن
حنين : باه عليش خذيتني من الأول
مازن : حي زعلتي قصدك
حنين : اكيدة
مازن : ههههههههه احلى حنوووو
تي انتي عسل واتهبلي مافش زيّك بكل
فاطمة : لا فيه
مازن : من
نرمين : انا وفاطمة
حنين : هههههههههه نجكن
,,,,,,,
مروان : باهي اللي قعدتو اتغدو امعايا
أخيرا حسيت عندي ام واخت
نجاح : تسلم مروان ربي يحفضك ياصقووعي
صبّى مروان يبي يغسل ايديه
وفاء : مزال مارنيتش علي مازن
حنكلمّه العشية افضل
نجاح : تمام ياماما
وفاء : المهم رد بالك اتردي عليه
نجاح : اكيدة ياماما نفس ماوعدتك
,,,,,,
بعد مرور ساعة
أنت تقرأ
مشاعر_مطرطشة (باللهجة الليبية)
Novela Juvenilرواية باللهجة الليبية -) هيا منقولة من الكاتب ديندار وهي روايا حلوة بكل نبي نزلها بس نبي عليها تفاعل ارجوكم ولو مايلقتاش حانوقفها
