الحلقة 27
في الماضي وقبل عدّة سنوات وقبل ان تولد حنين
كان بات حنين في عز المراهقة
امكبد علي بنت تخدم كوافيرة
حبّها واجد
لمّا جا يبي يخطبها ويزوجها
اهله هو رفضوو البنت .. قالوله
هذي بنت مش تمام
معروف تاريخه
هو سكّر راسه كان يحبّها موووت وامكبد عليها
قعد معش يشووف فيها الا هيا
قعد شبه قريب يعبدها
كان باين قدام الناس انّ هو يحبّها
لكن في الحقيقة هي كانت دايرتله عمل وسحر
قعد معش يشووف في حد غيرها
لما اهله ارفضوو الفكرة
زوّجها غضبن عن هله
وقعد ساكن في اجار كان مجرد موضف وقتها
بعده سنتين يرجى في مولود
لكن مافش امل
وكانت اسماها نوال
كانت امراة مستلطة
يحكيلها يقووللها هيا انديرو تحليل
نبو انعاينوو عليش مافش بيبي لعند توا
هي كانت اتسكر في راسها وماتبش تمشي
بعد مشاكل ونقاش رضت ومشت للمستشفى
قالوللهم الدكتور مافش أي حاجة عادي
انتم الاثنين اموووركم طيبة وسليمة
بات حنين استغرب
وروّح مع نوال للشقة
في يوم من الأيام روّح بدري
للشقة كانت نوال في الكوافيرة
خش للدار قاعد ايدور في حاجة رايحة منّا
بالصدفة لقى في الدولاب
احبوب منع الحمل
بات حنين : يعني بِعت هلي عشانها
وهذا كلّه تبي تحرمني من اول بيبي في حياتي
ضرب المرايا امتاع الدولاب بووووني
قعدت يدّة دم
وطبّس وقعد يبكي
شن درت بس انا مع هلي
وين كان عقلي بس
وكأن اصحصح وضبابة حوّلت من اعيونه
وقعد يشووف في الحقائق
,,
روّحت نوال شافت راجلها
يرجى فيها
نوال : اهلين حبيبي كنها يدّك دم
بات حنين : الحبوب هذينا فيش اديرن في الدار
نوال : اسكتت توا كيف شفتهن انا
بات حنين قعد يضرب فيها ويضرب فيها
بات حنين : نبيك تحكيلي كل حاجة
من وين طلعتيلي انتي
ومن وين جيتيني
كنت عايش حياتي عادية
لين جيتي انتي خرّبتي حياتي كلّها
نوال قعد تبكي
نوال : الله غالب حبيتك عشقتك انت كنت فايتني
مش امعبرني قلت حندير المستحيل عشان ناخذ
لو اضطريت نسحرك عشان ناخذك حبيتك
بات حنين : حبتيني ليش تاخذي في احبوب منع الحمل
نوال : انا ملمووسة وفيها جن
عارف شن معناها فيّا جن
مانبش البيبي ينضر افهم
افهم والله نقدر انجيبلك بيبي
بس مانبش انجيبه
انخاف يطلع نفسي انا وتطلع فيها جن ولا ملموسة
بات حنين طلع من الشقة وفاتها
ومشى شور هله عشان يعتذر ويبي السماح منهم
,,,,,
بعد فترة من مشكلته مع نوال
أهل بات حنين سامحوو
وازوج بنت قريبته
وقعد ساكن في حوش اهله
مابش يطلّق نوال وخلّاها معزوقة في شقتها ابروحها
هي قعدت تدفع في الاجار ابرووحها
تمشي للكوافيرة وتصرف علي روحها
وزعلان عشان
حسبتها غلط
,,,,
بعد أيام سمعت انّا نوال
ان راجلها زاد عليه ولد وبعد سنة زادت عليه بنت
اللي هما أحمد ولامار
زاد غضبها وزاد اهبالها
احقدت علي مراتة الثانية
نوال غيرت معاملتها علي أساس تغيرت للاحسن
وقعدت طيبة وقالت لي راجلها
راني تغيرت خلاص وقعدت احسن من قبل
ومعش نبي اندير حركات اهبال
بات حنين قعد مرة مرة يمشيلها يبات عندها في الشقة
ويجامع فيها
وقعد عادي يصرف عليها
وام احمد ولامار كان عندها علم بكل حاجة
,,,,
بعدها حملت نوال
وجابووو بنت سمووها حنين
بات حنين إشْرا حوش جديد
وقال خلاص مدام تغيرت نوال وزاد عليها بيبي
خلينا انعيشو في حوش واحد
احسن من المرمدة كل مرة في مكان
لما جت حنين
كان وقتها احمد ولامار
ممكن اكبر من حنين بثلاث سنوات
ماطشووق مع بعضن شهر فقط
نوال ومرات راجلها الثانية
وبدت الحرب بين نوال ومراته الثانية
مشّاها بات حنين يحل في مشاكلهن وخلاص
لين وصل لقناعة
خلاص مل من اهبالها ونفسيتها
خذا منها حنين وطلّقها
وكانت هي وحيدة
لان هلها متبريين منها
وماعندهش حد في هالدنيا
لما لزّها كانت دايرة احسابتها
وكانت واخذة من شعر مراته الثانية
مشت لسحّار قالت له نبيك اديرلي عمل فيها
وتاخذ السعر اللي تبيه
وفعلا درلها السحر
انشلت مراته الثانية
في البداية كانو يحسابوها جلطة
لكن هو كان سحر
بات حنين عرفها من نوال
قعد يبحث عليها معش حصلّها
,,,,
مشى بيها لجميع الشيوخ مافش امل
حالتها نفس ماهيا ام حنين
,,,
في يوم من الأيام
جت نوال لعندهم في الحوش
بات احمد اول مرة يضعف
شن درتي في مراتي
عليش هذا كله شن انتي
شيطانة ولا شن
معش عرفتك شن تبي
امتى اتخليني انا وعائلتي ابروحي
لقاها اتبحت في حنين
وكانت مزالت تقرا في ثالثة ابتدائي
نوال : نبي حنين
بات حنين : شن تبي فيها عليش تبي اتخربي
تبيني انكلملك الشرطة
تبيني انبلغ فيك ولا شن
شن تحسابي روحك
نوال : انت اللي خليتني هكي
انت اللي فضلت زوجتك عليّا
حتى بعد جبتلك بنووته
قعدت اتفضل فيها عليا
بات حنين : نعطيك المبلغ اللي تبيه
بس ابتعدي عليا وعلي بنتي حنين
نوال : اوكي حنبتعد
لكن مش حنفك العمل امتاع مراتك
حنخليها تتعب لين اتمووووت
بات حنين : باه عادي المهم معش نبي انشوفك بكل هنا
وطلعت نوال واختفت عليهم
وانقطعن اخبارها
<<
بات حنين خاف علي حنين
انّها بعد تكبر تطلع نفس امّها
من طفولتها حطّها في المسجد
وحاول يخليها متلزمة من طفولتها
ويحفضها كتاب الله
ادير في المستحيل عشان ماتطلعش نفس أمها
وخلّاها تكبر في المساجد مع البنات
حتى لما اهربت من الحوش زمان
كان بات حنين ديما تخطر في باله نوال
كل لقطة اديرها حنين فيها جرأة
يقوول طالعها الامّها
ولعند توا مافش حد عنده العلم بشي الا الافندي احمد
لما كبر حكاله باته القصة
ومع الوقت ام حنين تعالجت وانفك السحر امتاعها
,,,,,
في الوقت الحاضر
أنت تقرأ
مشاعر_مطرطشة (باللهجة الليبية)
Teen Fictionرواية باللهجة الليبية -) هيا منقولة من الكاتب ديندار وهي روايا حلوة بكل نبي نزلها بس نبي عليها تفاعل ارجوكم ولو مايلقتاش حانوقفها
