أهواء القدر 😍😍 كورنيك جزائرية منقولة 😍😍

جزء 10

  خلت تحضنتها و وصاتها على راجلها وعلى دارها كاي ام توصي في بنتها و الدموع غالبينها كيفاش متبكيش و هي لي رباتها و كبرتها كيفاش متبكيش و هي ام كيفاش متبكيش و هي لي راح تزف بنتها لي شافتها تكبر قدام عينيها...ضحات على جالها...خدمت ليل و نهار باش تكبرها و ترجعها مرا راح تتزوج دوكا راح تروح و تخليها للحظة ندمت لي هي زوجتها كانو حست واش راح يصرالها لكن خبات احساسها ب "هادا في مصلحتها " خرجت العروسة من الدار و ركبت فالطونوبيل لي كان فيها "شاهين " شاهين لي كي شافها للحظة تخطف بزينها و عجباتو مي سرعان ماجات في عينو عايلتو و ختو و تفكر انتقامو منها و تعمرت عينيه بالكره و الحقد لي لاحظتهم شهد الفتاة لي راح تعاني معاه و هي معلابالهاش .......قاعدة تشوف فيه لابس كوستيم كحلة و شوميز بيضة و خلا الفيستة محلولة لي بينتلو عضلاتو ...شعرو كان دايرو بالجال كان شباب ...

للحظة راحت بتخمامها لبعيييد ...حلمت تعيش معاها la belle vie ...خممت تنسى كلش و تعاود تبنى حياة جديدة ...في بلاد جديدة ...في دار جديدة ..مع اشخاص جدد.......مسكييينة شهد معلابالهاش بلي الماضي راح يقعد يلاحق فيها وين ماكانت ...ماعلابالهاش بلي الماضي راح يكون سبب عذابها ....الماضي راح يقعد يلاحق فيك يا شهد غلطة شكون هي ؟! غلطة شهد لي كانت حابة تحوس على باباها ؟! ولا غلطة ميس لي كانت مثال حي للصداقة و الوفاء و حبت تعاون صحبتها ؟! ولا غلطة باباها لي امر باطلاق الرصاصات ؟! ولا غلطة امها لي خبات عليها و هربت على باباها ؟! في الاصل كل واحد شارك فهاد الغلطة مي الوحيدة لي راح تدفع الثمن هي شهد وصلو لصال ماداروش عرس كبير جوست حفلة صغيرة عرضو غير شوية باسكو راح يباتو ليلة برك و غدوة صباح يروحو للندن ...  

  قاعدين فالكرسي كل واحد يخمم في حاجة شاهين يخمم فالانتقام و كان فرحان لي راح ينتقم لعايلتو لي دمهم ماحاش يروح خسارة و في نفس الوقت يخمم في عينيها البريئة لي كي شافهم قال محال تقدر هادي تقتل و تكون من المافيا لكن المظاهر خداعة ......... شهد لي كانت خايفة من هاد العلاقة و خايفة من هاد الزواج و ماشي حابة تبعد لكن لازم تكمل نصف دينها كيما تظن هي وتقبل بمكتوب ربي ،كمل العرس وشاهين مشافش كامل فيها الناس كامل بدات تروح وحتى هوما لازم يروحوا للأوتيل ودعوا دارهم وشهد غرقتهم بالدموع حزينة على خاطر امها.

ركبوا فالطومبيل ومشاوا طريق كامل وهوما ساكتين شهد تستنى فيه يجبد موضوع ويحكي معاها كيما اي عريس فرحان بعروستو وهو ولا كأنوا موجودة معاه وصلوا للأوتيل هبط رفد فاليزتو وراح وهي بقات تشوف غير وقتاه يرفدلها تاعها مشافش فيها كامل ودخل رفدتها ودخلت تميل معاها لأنوا ثقيلة لحقاتوا للغيسابسيون حجز غرفة وهي غير تتفرج فيه وهو ماشي معبرها كامل طلع وهي لحقاتوا هو جوست موصل غلق في وجهها الباب بقات طبطب عليه محبش يفتح بقات يجي عشرين دقيقة وهي تستنى فيه ظنت بلي دخل رقد وهي تبقى لبرا ،،شاهين بعد ما دخل لشومبرا عمل دوش ولبس حوايجوا وخرج لقاها قاعدة عند الباب كي شافها قاعدة غاضتو مبعد تحولت نظرة الشفقة الى غل وحقد {قال في نفسوا مزلتي مشفتي والو يا مدام***** راح ندمك على النهار لي قبلتي تتزوجيني فيه}كمل خرج وخلالها الباب مفتوح جات تسقسيه وين رايح لقاتو هبط وخارج دخلت هي لشومبرا حلت فمها فيها هو حجز في فندق غالي وهي ماشي متعودة على أماكن الطبقة البورجوازية حطت لافاليز تاعها فوق السرير فتحتها تجبد قشها باه تدوش وتتفاجأ بما فيها لقات غير لي شوميز ودو بياس مها ربي يهديها هي لي دارتلها قشها تاع ليلة الدخلة ضحكت شهد على مخ مها لمسوفج:
"يهديك ربي يا ماما هو خرج وخلاني ناسي بلي راني معاه أصلا وبلي متزوجني من المفروض نقضيوا ليلة كأي عريس وعروسه في ليلة عمرهم هو راح وخلاني في أول ليلة" حوست على حاجة مستورة ملقاتش لقات غير شورت يغطي غير اللازم و تريكو بلا ذرعين فوق الصرة يعني هذي أستر حاجة لقاتها بين لفضح لي فلاvاليز دخلت عملت دوش وخرجت ترقد منشفتش شعرها لي يوصل تحت ظهرها وخلاتو مطلوق جات في لفراش وبقات تخمم علاه شاهين تصرف معاها بهذا البرود حرقت مخها حتى رقدت رجع شاهين على الثلاثة تاع الصباح دخل للشومبرا تفاجأ مالمنظر لي شافو لقاها بالشورت وتريكو لي زاد طلع على لي كان هو اصلا يوصل للسرة شعرها لي موزع على لمخدة بقى باهت فيها مبعد فطن على روحوا راح نوظها فطنت وهي مزالت دايخة بالنوم قالها: شاهين: معليش تنوضي من فوق السرير هذي بلاصتي وراح نرقد. شهد(وهي نص فاطنة):وانا وين نرقد. شاهين:ميهمنيش فيك ارقدي وين ما كان نوضي. شومبرا في حجزها فيها غير هذاك السرير شهد ناضت من فوقوا وهو دخل بدل قشو وخرج لقاها مزالت تخمم وين ترقد شاف فيها وراح طفا الضو ورقد توسد مخدة وثانية تحضنها باه متقدرش تديها وتتعذب في نومتها شهد لقات فوطة شوي كبيرة تفرشتها ودارت قشها مخدة ورقدت، غاضتها روحها هي لي تخيلت ليلة دخلتها بكامل تفاصيلها مع أنو مكانتش تعرف ساهين لكنها متوقعتش ليلة عمرها تفوت هكذا بكات حتى داها النووم......... في صباح ناض شاهين هو لول........