رجعت ليكن بقصة جديدة وطبعا معنى كلمة نوفيلا هو قصة قصيرة
اتمنى تعجبكن ويوصل الهدف منها وللعلم راه قصيرة واجد عبارة عن ستة فصول بس
#صاحب_الظل_الطويل
الفصل الاول
انا .. خزيه عليك قريب رحت فيها
ايهم بضحك.. رغم انك الاكبر مني خوافة بشكل مش طبيعي
انا بعصبية.. كنهدا تيبس عظامي
ايهم ومازال يضحك.. بصراحة جو عليك رغم ان المقلب اندير فيه لك اكثر من مرة لكن تخافي بنفس الدرجة
انا .. امشي يابارد والله لنقول لبابا بيش يوقفك عند حدك
ايهم.. تبصري صح
انا .. لا هالمرة جد وتو تشوف
ايهم.. بالله عليك نغومي
انا .. تو طلعت نغومي
ايهم.. ماهو تبي الحق انتي غريبة راه
انا .. انا غريبة
ايهم.. نقولك بس ماتزعليش مني
انا .. قول
ايهم.. انتي غريبة في طبعك نحن خوتك القليل وين تخالطي فينا وجونا مش جوك بكل ولا تقولي خوتك الين وسما وحتى ادم جونا فستري وديمة نبصرو لكن انتي ديمة بروحك ولما نبصرو معاك بسرعة ماتحمقي حساسة زيادة على اللزوم وديمة نحسو فيك بعيدة علينا وحتى لما نبو نبصرو معاك نخافو منك انك تحكي لبوي او تخافي بسرعة وبسرعة دموعك ماينزلن تقول القناة الدمعية عندك مشروكة
انا .. هذا كله اني
ايهم.. اه واسئلي حتى خوتي تو يقولوك ان كلامي صح
انا ..............
ايهم.. خيرك سكتي اه هذا اللي نحكي عليه
انا .........
ايهم .. اسمعي نغومي انتي عارفة غلاتك عندي شنو شكلها ورغم انك منزوية علينا لكن اني مانتحمل فيك شئ وانتي عارفة هذا صح
انا بهزة راس .. ايه
تعالو تعرفو عليا قبل
اسمي نغم عمري18 نقرا في الجامعة سنة أولى
اقتصاد وعندي اربعة خوت غيري سما والين وادم و ايهم وكلهم اصغر مني على طول بعدي ايهم وبعده سما وادم والين هكي ترتيبنا ورغم هذا ديمة بروحي وحيدة انطوائية بطبعي وكلاسيكية عاداتي شكلي قصيرة وبيضة واجد وعندي خدود كبار وشعري طويل لنهاية ظهري ولونه اسود وفي الشمس والله الضي القوي يبان لونه قهوي غامق وماعنديش صاحبات واجد هي صاحبة وحدة كانت معاي من صف اول ابتدائي لعند الصف التاسع وبعدين تفارقنا وتو صاحبتي من ثالثة ثانوي يعني لينا سنة وخاشين في الثانية واسمها اروى
عايشة حياتي بالمعنى الصحيح لكلمة وحدة بالذات مع فوبيا الخوف من كل شئ عندي ليا افكاري وعقلي اللي ماليشي علاقة بحد حتى صاحبتي مرات تضايق مني وطبعا عندي اقارب ومانخالطش واجد ومخلية المهمة هذي لسما والين ماشاءالله خواتي عكسي تماما وطبعا كملت سنة اولى ونجحت بمجموع كويس تقدرو تقولو جيد جدا ومافيهاش حاجة تذكر الا اني تعرفت على بنية على الفيس بوك وعجبني اسلوبها ورغم اني مش من نوعية الناس اللي اندير معارف جديدة الا اني قلت خليني نجرب بالك نطلع شوي من وحدتي الا تعبت الكل ماعداي لان بصراحة اعشق وحدتي
سما.. نغومي
انا .. نعم
سما .. بالله بنطلب منك طلب
انا .. ادللي
سما.. بنكلمو بابا انه يرفعنا للبحر بالله عليك ماتخربي علينا
انا .. بس انتي عارفتيني نخاف منه
سما.. بس حرام عليك ننحرمو منه كلنا بسببك انتي وبعدين وعد اذا ماتبيشي تخشي تعومي ماحد يجبرك
انا .. اكيد ماحد يكرني ويعزقني فيه سما راه علامة جرح ركبتي مازلت قاعدة
على خشة ايهم .. وعد مني نغومي انه ماواحد فينا يكرك بالقوة بتخشي برغبتك باهي
انا .. خلاص به كلموه
أنت تقرأ
نوفيلا صاحب الظل الطويل
Short Storyعندما تقوم بجرح الناس والحكم عليهم دون معرفة دواخلهم فانسب عبارة تقال دع الخلق للخالق.. حياة التنزيل يومي
