نوفيلا صاحب الظل الطويل

الفصل الخامس

#صاحب_الظل_الطويل
الفصل الخامس ماقبل الاخير 

انا رفعت راسي وشفت الظل الواقف عليا
اكرم .. خيرك ماجبتيش حاجة تاكليها
انا معرفتش انرد عليه
اكرم .. به تعالي افطري معاي طاولتي فاضية
انا بصوت واطي وغصب عني طلع يرعش .. لا لا شكرا
شوي عدى اكرم من احذاي وقدرت انتنفس لاني فطنت لروحي اني شادة نفسي وبعدها بشوي جاء اكرم وحط قدامي كريب بالنوتيلا ومعاه شوكة
اكرم .. واكل منهم اني بس راه
انا في الاول خفت الحق لان قدمهن ليا بنظرة قاسية تخوف وماعرفتش نفسر نظراته شنو لكن الحق الجوع كافر لقيت روحي لاشعوريا ناكل بمجرد مامشى من حذاي وماحسيتش بيه الا هو يحط قدامي في طاسة عصير فروالة طبيعي رفعت راسي واني ناكل بسرعة لقيته هو غلبتني الضحكة الصراحة معش عرفت شنو اندير وهو ابتسم *فيه ابتسامة تقتل *
اكرم .. صحة صحة
نسحابه بيطلع فطنت بيه جبد كرسي وقمعز مقابلني اني معاش عرفت خيره ولا فكر عقلي للحظة انه يفهم شنو نواياه
خذيت ممكن لقمة وحدة بس من الكريب وشربت من العصير والحق عصير فروالة لعنده ينتهي كل شئ من عشقي ليه وحطيت الشوكة فوق الكريب ودفيته شوي من حذاي لقيته جبد الصحن وخذا شوكتي وقعد ياكل بيها واني قعدت نشبح لصحباتي  من بعيد بعيوني نقوللهم خيره وهنا على وجهن صدمة من تصرف اكرم اصلا انه يتنازل ويقمعز مع بنت هذي معجزة لابال اني الخوافة والساكتة طول الوقت كمل هو باقي الصحن والكارثة انه ياكل ويشبحلي طول الوقت واني مقمعزة قدامه ونرعش مع بعضي لدرجة المنديل في ايدي تفتفت من كثر ما ضاغطة عليه وقعد يضحك عليا وخذا مني فتفت المنديل اللي في ايدي وقعد يتكلم بيخفف التوتر اللي عندي
اكرم .. خيرك نغم ترعشي هكي تقولي في القطب المتجمد
انا حاسة بقلبي يدق بقوة نين النفس نحس فيه ضاق
اكرم بضحكة .. خلاص يا بنتي قلبك بيطلع يجري قدامي هدي روحك
انا الصمت مسيطر عليا بدرجة كبيرة
اكرم .. نغم خيرك هدرزي معاي نبي نتعرف عليك
انا حسيت روحي بتطلع وبنبكي ومانندريش على روحي قلت ليه
انا بصوت واطي ويرعش .. ممكن  تنوض من قدامي بنبكي
اكرم باستغراب .. جديات تدوي
انا بهزة راس اه
اكرم ضحك ضحكة كبيرة وبعدها هدا شوي .. ديري بالك من روحك يابنتي لينا لقاء ثاني
واني على طول روحت حتى ماعطيتش فرصة لصحباتي انهن يسئلني شنو دوا لاني اصلا من موقفهن البايخ بانهن قمعزن وماشدنش ليا مكان قهرني الصراحة وروحت زي العادة لمذكرتي  وكتبت فيها اللي حسيته اليوم ومش عارفة لاول مرة نحس بداخلي سعادة كبيرة وكتبت
(صاحب الابتسامه الخلابه وعيون ملونه بلون العسل صباحا والقهوة ليلا ؛قوام ليس بطويل او قصير؛نظرات حادة ثاقبه ؛هدوء قاتل...
بنظرة اصبح مرحا،جلس بجانبي ابتعد قليلا عندما لاحظ توتري وإرتجافي ،اخذ يحادثني كانه يعرفني منذ زمن طويل، ثقته بنفسه كبيره ...
ليتني استطيع اخبارة باانني اخاف منه اني اهابه ...لكن لا استطيع تملكني الخوف واجتاح وجداني  ..انها معادله صعبة لااستطيع الموزانه)

وعدن ايام وجن ايام وكل مرة اكرم يفاجأ فيا بتصرفات حلوة واحلى حاجة فيهن منادته ليا ببنتي نحس معاه بشعور الامان والاحتواء غير الاهتمام ولان صح بشكلي قدام شكله  نبان بنته وفي يوم مكسدة في القاعة ماطلعتش بعد ماكملت المحاضرة قلت نكتب شوي في مذكرتي واني في عز انغماسي في الكتابة حسيت بظله فوقي رفعت راسي اصلا حتى قبل مانرفع راسي عرفته من ريحة عطره اللي تسبقه من ظله اللي يعكس عليا عرفته
اكرم بضحكة خفيفة ونضرة قاسية في نفس الوقت *تركيبة صعبة * .. ليش قاعدة بروحك
انا بصوت واطي .. ماخاطريش ننزل
اكرم.. شنو اديري
انا بنفس الصوت الواطي .. نكتب
اكرم .. ممكن نشوف
انا بسرعة وبدون اي تفكير سكرت المذكرة وحضنتها
اكرم .. اني قلت بنشوف شنو تكتبي ماقلتش بناكلها راه
انا.. لا مانبيش
اكرم .. يابنتي بنشوف شنو تكتبي شوي بس
انا بهزة راس لا 
اكرم .. اما انتي تفاجأي فيا بتصرفات غريبة
انا بصوت يرعش .. بننزل
وماعطيتاش مجال يدوي وطلعت نجري
وعدى اليوم عادي وكانن خلاص ايام وتكمل القرايا عشان نستمتعو بباقي الصيف
وجاء يوم جديد واليوم اخر يوم  طلعت اخر وحدة من القاعة لقيت اكرم قدامي
اكرم .. عندك فون
انا وخوف من نظرته هزيت راسي بايه
اكرم .. هاتيه وكان فيه باسورد افتحيه
وبدون اي تفكير من خوفي عطيته الفون وكان مافيشي باسورد وخذاه مني اكرم
اكرم .. غريبة بنت ومش دايرة ليه باسورد
انا ولا حرف
اكرم تكلم بسرعة وبثقة .. كتبت رقمي وخزنته ورنيت منه على رقمي بيش نخزنه انا معجب بيك ونبيك وان شاءالله تكوني حلالي فهمتي
وانا قاعدة تحت تأثير صدمة كلامه جبد مذكرتي اللي شافني مرة نكتب فيها ومابيتش نعطيها له
اكرم .. لما تجي تاخذي النتيجة تو نعطيها لك يابنتي
وعدى بدون مايعطيني فرصة ندوي او نقول اي حاجة اصلا ليش مستغربة من تصرفه راجل  فاطن وذكي حيفهم اني من النوعية الساهل السيطرة عليها بس هالمرة مش غصب عني او خايفة او مترددة لا لاول مرة اني نبيه يقرب مني نبيه يخش حياتي نبيه يكون معاي نبيه يفهم وضعي ومايبعدش عليا زي ما هلبة بعدو عليا نبيه يكون شريكي نبيه يحتويني يبيه يطمني انه يكون معاي ديمة نبيه  ......
كمل المعهد وجن ايام الكساد والحمدلله استفدت هلبة من الفترة هذي وان شاءالله السنة الجاية حنجيبها بتفوق ومرة مرة يتصل بيا اكرم ونقضي في طول المكالمة ساكتة او يادوبك تطلع كلمة ايه او لا
ومرة بعد ماكانو عندنا عيت خالي وبعد تسهوايك بنات خالي عليا اضايقت واجد وحسيت بروحي بتطلع من كثر ضيقي استنيت نين روحو بفارغ الصبر وخشيت داري وقعدت نبكي من قلبي وبحرقة ليش مايخلونيش في حالي بس اني مانبي منهم شئ وحسيت بفوني يرن رديت بدون مانركز
اكرم .. ماتبكيش يابنتي دموعك غاليات عليا
انا وباستغراب كيف عرف اني نبكي لكن مارديتش مسحت دموعي وتقول عرف شنو دار في دماغي
اكرم .. يابنتي حسيت بيك تبكي انتي عارفة اني عارفك انتي شنو ومافيش حاجة تستاهل يابنتي انك تبكي عليها فاهمة امسحي دموعك واهدي وتو نعاود نكلمك
وانتهت المكالمة واني مازلت تحت تاثير الصدمة والاستغراب وفعلا بطلت بكاء لا شعوريا وشوي خشت عليا ماما

ماما.. عادي يا نغومة انتي عارفة بنات خالك ديمة يحبن يركبن عليك
انا....... ساكتة
ماما.. فوتيهن خلينا في المهم
انا.. شنو
ماما .. تعرفي عيلة عبدالله المالك
انا بصدمة .. خيرهم
#حياة
فكرة الرواية وكتابة مابين القوسين لي الاء محمد
  والشكر الجزيل لمصممتنا الحلوة على الغلاف الجميل #رورو_سالم