نوفيلا صاحب الظل الطويل

الفصل الثالث

#صاحب_الظل_الطويل
الفصل الثالث

اروى .. وووك من هالمكتبة وانتي ماتملي منها
انا ... انتي عارفة ان القراية والكتابة عقلي
اروى بضحكة.. ربي يشفي
انا .. بعيد السو هناك واحد يحب يشفى من مرض زي القراءة والكتابة
اروى .. به خلاص انتي كان فتحتي فمك على القراية معاش نخلصو خلاص تو نجيك غادي

ومشت اروى للكافتيريا واني مشيت جيهة المكتبة زي العادة يانقرا يانكتب في مذكرتي ولما خشيت وقمعزت بهدوء شفت الاستاذ اكرم والحق خطر عليا الموقف وبسرعة دموعي نزلو ومستحهم بسرعة قبل ماحد ينتبه وشديت مذكرتي وكتبت
(يراني الجميع غريبة وبداخلي فضاء تسبح الافلاك فيه ... فسلاما عليا في اخفاء مابي فأني اواسي نفسي بنفسي)

ولما كملت الكتابة ورفعت وجهي شفته يشبح فيا ومانزلش عيونه من عليا درت روحي عادي وطلعت من المكتبة على جيت اروى خذينا تركينة زي العادة وكلينا وكملت محاضراتنا وروحت للحوش وبعد الروتين المعتاد خشيت لداري زي العادة وفتحت الفيس ولقيت صاحبتي اللي نعرفها من زمان رجعت وفعلت حسابها وبعتتلي رسالة ولقيتها مغيرة الحالة الاجتماعية لمخطوبة وفرحت ليها هلبة ورديت علاها طول وقعدت فترة طويلة ونا نحكي معاها وحكتلي كيف جاء حبيبها وخطبها ونا قلت في خاطري زعمك حنعيش قصة حب حتى اني وخطر في بالي كلام بنت خالي من فترة

رهف .. تعرفي يانغم لو قعدتي على حالتك حتكملي  حياتك كلها في حوش بوك
انا وبوجع من كلامها .. ليش
رهف ..ماهو انتي ماتعرفيش شنو يقولو عليك في العيلة
انا .. شنو يقولو
رهف .. يقولو عليك ان عندك التوحد من كثر ماتطلعي لحد وديمة بروحك حتى لما نجتمعو وتبدي مطرة اتجي مع عمتي تقعدي بروحك زي تو حاطة سماعتك في وذنك ومقمعزة في اخر الجنان ومسيبتينا كلنا نهدرزو وجونا حلو وقاعدة بروحك
انا  ودموع على وشك النزول .. اولا التوحد مرض ليه اعراضه لو اصيب بيه الكبار واني اكيد مش وحدة منهن (ودموع بدت تنزل ) وبعدين ياستي اني حرة نخالط او مانخالطش الحكاية مش بالغصب
رهف بدون مبالاة .. اني حبيت ننصحك ونفهمك شنو يقولو عليك
انا .. اني لو فكرتو شوية بيا اني انسانة نحب الوحدة ومانحبش الاختلاط انسانة لاقية راحتي في وحدتي ليش ماتبوش تفهمو
رهف وبمكر .. معناها مستحيل تتزوجي او تكوني اسرة بوضعك هذا لان اي رجل يبي مرا قوية مرا تكون سند ليه مرا اجتماعية حتى لما يجوها اضيوف تعرف كيف تتصرف معاهم ترا قوليلي يا نغم لو تتزوجي ويجوك ضيوف كيف بتقعدي معاهم كيف بتسايريهم انتي اذا اهلك ماتعرفيش تسايريهم
انا .. لما نفتح حوش تو نقولك تعالي انتي سايريهم
حمقت مني وعدت وسيبتني لوجعي من كلماتها رغم مرات نحس فيه صح لكن مستحيل اني لو فتحت حوش مانقيمش ضيفي او نهتم بيه حتى لو خلاف طبعي في حوش اماليا عابية على سما والين وماما في مسايرة الضيوف كنهدا راه نساير فيهم اني

ورجعت من ذكرياتي وعدى باقي اليوم عادي غير اصرار صاحبتي في الفيس على انها تعرفني على خطيبها وبعد اصرار قلت ليها باهي وتعرفت عليه بس عن طريق الفيس بس والحق عجبني اسلوبه وشخص محترم ومرة تعاركو هما الاثنين وهو كلمني وطلب مساعدتي وادخلت بيش انحل الموضوع بينهم وللاسف هيا فهمتني غلط وتعصبت عليا لدرجة قعدت نبكي من تعصيبها عليا شنو درت انا نيتي نصلح بينهم والمشكلة الاكبر ان خطيبها وقف معاها رغم عارف انها غالطة وبعدها قررت انديرلهم حضر لانهم مايلزمونيش في حياتي مش ناقصها عاهات سادني العاهات اللي تحكم عليا بدون ماتعرفني
ومر باقي اليوم عادي بين شغل الحوش اللي نتقاسم فيه انا وسما والين ادير في حاجات بسيطة بس وبين كتاباتي ونحب نقرا روايات هلبة وخطر في بالي اني نكتب حتى رواية لكن قلت لازم نفكر ليها كويس
وجاء يوم جديد وجهزت روحي ومشيت للكلية وحضرت محاضرتي وطبعا اروى تحب تكسد واجد مع البنات لكن اني كان نلقى نخلي اقصر وقت في القعدة معاهن لان الحق ماعندهن حاجة غير التقريم في عباد الله واصلا احد اسبابي الابتعاد عن الناس والمحاضرة الثانية كانت لاكرم وطلبت من اروى انها ماتحكيش معاي بكل وفعلا عطا محاضرته والحق يشرح كويس وطلعت من المحاضرة اني مشيت للمكتبة وهي مشت شور البنات وقعدت زي العادة نكتب وحسيت بظل طوووويل وقف عليا وعلى طول جت في بالي جودي ابوت في #صاحب_الظل_الطويل ورفعت راسي
#حياة
فكرة الرواية وكتابة مابين القوسين لي الاء محمد
  والشكر الجزيل لمصممتنا الحلوة على الغلاف الجميل #رورو_سالم