نوفيلا صاحب الظل الطويل

الفصل الرابع

#صاحب_الظل_الطويل
الفصل الرابع

رفعت راسي شور الظل اللي وقف عليا واندهشت
اكرم .. السلام عليكم
انا بصوت واطي وجسم يرعش ..وعليكم السلام
اكرم .. خيرك خفتي مش حندير لك شئ بس نشوف فيك ديمة في المكتبة تحبيها شكلك
انا .. هزيت راسي بس
اكرم .. نغم
رفعت راسي شوره وتلاقت عيونا ونزلت راسي بسرعة ولميت اوراقي وطلعت بسرعة من المكتبة وقلبي ينبض بقوة وبعد ماهديت شوي مشيت جيهت اروى وقلت ليها بنروح وهيا قالت انها مازلت تبي تهدرز سيبتها وروحت وخشيت لداري بعد ماغيرت دبشي وصليت صلاتي وشديت مذكرتي زي العادة
وكمل يومي عادي لكن ملامح اكرم ماغابتش عن عيني
وعدن ايام من حياتي عادي بدون جديد انا ووحدتي اللي نحبها وفرحانة بيها وكل مرة لازم نسمع كلام يوجع فيا تقول الكون واقف ومافي شئ بيخليه يمشي الا اني ولازم نختلط ونضحك ونفرهد بيش يتسقم حالها لاحول ولاقوة الا بالله كان يخلوني في حالي بس

( لاتزعجني فكرة انني اسهر وحدي واعيش وحدي ... وان الوحدة تتعرش على جسدي وشفتاي تتصلبان من الصمت ... وانني احيانا احتار في الليل بين الشاي الاخضر والقهوة
ولايزعجني انني لا اجد شيئا مشتركا بيني وبين العالم الذي يتقاطع طريقي معهم كل يوم
لاتخيفني فكرة عدم وجود انسان اخر يبحث عني والشعور العظيم الذي كان يكنه لي احدهم واختفى
وانني قد اصبح في يوم ما منفية ...
وانني لا اسمع كلمة انت عظيمة لانني لم افعلها بعد
ولايعنيني ان كرهت الثلاثاء مثلا واحببت يوم الخميس اكثر
لايعنيني ان عرفني الناس ام لا او اظهرت على التلفاز او نفيت في المنزل وقتلني احدهم دون ان يعلم الناس عني شيئا
كل مايخيفني ان اصل الى الثلاثين بكل هذا الاعتياد
يخفيني الا الاحظ مصابيح الشارع التي اضيئت في المساء مع زخات المطر والا يسعدني ضوء المدفأة ولايتحرك بي ساكن مع حلول الشتاء
يخفيني ان تمرض عيناي فلا تعود تلاحظ التفاصيل .. اخاف الا تؤثر بي عودة اللاجئين من السفر وان كل المشاعر العظيمة اخذتني قبل ان آخذها معي الى الثلاثين
خائفة من اصل الى الثلاثين قبل ان امر بالعشرين كما حصل في الخامسة عشر مرت بسرعة حتى دون ان تلقي السلام على مراهقتي..... من يعيد العمر الذي ضاع )

وبعد فترة غاب اكرم عن الجامعة وبعدها ممكن يومين او ثلاثة بعد غيابه جابو لنا معيد ثاني بداله وكان جواي شعور مانعرفش نوصفه الحق كأنه شعور بالفقد وكملت السنة لكن مجموعي مش ولابد الحق تأثرت واجد لان مستواي كويس وكملت القرايا وحاجة هكي خطرت في بالي اني نرفع الحضر على صاحبتي اللي تعرفت عليها في الفيس هي وخطيبها وممكن ثاني يوم جتني رسالة منه يسئل عليا فالبداية مكنتش بنرد لكن بعد مابعث اكثر من مرة رديت عليه وسئلني ليش حضرته قلت ليه الموقف اللي درته انت وخطيبتك اللي مفروض صاحبتي شنو مازل تستنى مني وتأسف  واجد وقالي انه عارف انها غالطة لكن ماقدرش يوقف معاي ووقف مع خطيبته والحق وجعني الموقف يعني وقف معاها حتى وهيا غالطة عليش الناس تخاف من الحق او توقف معاه وفته معاش دورته وحتى لما بعتت ليا فتتها بالطويل الصراحة حسيت روحي بمعرفتي بيها غلطة درتها لان اني مش طبعي المغامرة  وبعدها خطر عليا حاجة وقررت قرار وكنت مترددة فيه زي العادة بس كلام بابا وماما شجعوني عليه وهو ان في معهد خاص بتخصصي زي الدروس الخصوصية فقلت ناخذ فيه دروس للسنة الجديدة خصوصا انهم قالولي ان فيه واجد من اساتذتنا اللي في الجامعة وبعد تشجيع بابا وماما عديت اني وبابا وسجلت ودفع الرسوم وطبعا ماخلاش الامر من خوتي يعلقو عليا

ايهم بضحكة .. معقولة نغومي الواحد مايصدق تكمل القراية بيش يرتاح وانتي ماشية مسجلة في معهد خاص بيش تقري فترة الصيف
انا .. ماهو نتيجتي مش راضية عليها بكل معقولة من مجموع جيد جدا في السنة الاولى لجيد على الحافة في السنة الثانية
سما .. يابنتي في الجامعة حتى المقبول يحسبو فيه ممتاز مش جيد
انا .. اني سقف طموحي عمره ماكان يوصل للمقبول ولا الجيد
سما بضحكة .. هو انتي اصلا عندك طموح بيش يكون ليه سقف
ايهم بتكشيخة .. سما
سما .. مش قصدي حاجة والله بس بطبعك نغم مستحيل نتخيل انك تكوني انسانة طموحة انتي حتى الاقتصاد كان اقتراح بابا ووافقتي طول
انا بغصة .. لا عندي طموح طموحي نكون كاتبة ومعروفة حتى مش شخصيا يعرفوني لكن بالاسم على الاقل
ايهم .. اووووه نغومي والله
انا .. اه نحب نكتب خواطر وحاليا نفكر نكتب روايات
ايهم بحب .. مع اني مانحبش القرايا لكن لو انتي بتكوني الكاتبة معناها بنقرا اكيد
انا .. باذن الله اول من نقرر اني نوري اللي كتبته لحد حنوريه لك
ايهم .. ان شاءالله
سما.. واني حتى اني بنقرا
انا .. غير نقرر قبل
سما .. معناها يا طول رجانا
ايهم بصوت عالي .. سماااااا

سيبتهم وعديت لداري قديش نحبه خوي ايهم الوحيد اللي فاهم وضعي ومايطلبش مني فوق من احتمالي وديمة مراعي ليا عكس سما رغم اني عارفتها تحبني لكن لازم ماتوجعني بكلامها والمعهد بيبدا بعد اسبوع وطلعت اني وماما شريت شوي حوايج صيفية بيش نمشي للمعهد بيهم
وجاء اول يوم معهد وبمعنى اصح مركز ومشيت وطبعا نسيت نقوللكم ان حتى اروى سجلت فيه ومعانا زوز من قروبنا في الجامعة وتلاقيت اني وياها وخشينا حضرنا المحاضرة الاولى وطلعنا وطبعا عندي اوراق ناقصة فجبتهن معاي وخشيت للادارة بيش نعطيهم ليهم ودقيت الباب وسمعت الاذن اني نخش
انا بصوت واطي ومطبسة راسي.. السلام عليكم
الاستاذ .. وعليكم السلام ... اهلين نغم
انا رفعت راسي .. اهلين بيك
وحسيت بشعور داخلي مش عادي لكن يهبل بس برضو ماعرفتش زي العادة نسيطر على رعشة جسمي
اكرم .. تفضلي نغم
انا بصوت يادوبك طالع .. هـ هـ هذي ا ااا الاوراق الناقصة
ومديتهن وايدي ترعش وعشان بيش نداري رعشة ايدي مسكتهن بايديا الاثنين وحطيتهن على الطاولة بسرعة وطلعت
ومشيت بسرعة جيهة اروى وخشينا للمحاضرة الاولى ومشت الايام عادي واني نحاول نتجنب اكرم لكن في نفس الوقت نراقب فيه ونتأمل في تفاصيله وطبعا ديمة صحباتي يحاولن يلفتن انتباهه وهو مش معدل على ولا وحدة فيهن هكي تشوفه وهو ماشي وكله ثقة وغرور بنفسه مش عادي تحسي ليه طلة وهيبة وطبعا اليوم عندنا امتحان ومن
كثر ماني متوترة طلعت من غير فطور وامبارح رقدت من غير عشاء وحسيت روحي جعانة واجد وكملت الامتحان وطلعت نبكي لاني حسيت روحي ماحليتش واجد وقعدو صاحبتي يهدو فيا ولما ايسو مني قالو انهن بيعدن للكافتيريا عشان عارفتني كان فتحت وصلت البكاء نطول ولاننتهي منها
وبعدين خشيت حشاكم للحمام غسلت وجهي وطلعت وجيت للكافتيريا لقيتهن مقمعزات على طاولة مافيش فيها كرسي فاضي وعمري مادرتها قبل لكن قمعزت على كرسي بروحي وشوي وجاني
انا ...................
#حياة
فكرة الرواية وكتابة مابين القوسين لي الاء محمد
  والشكر الجزيل لمصممتنا الحلوة على الغلاف الجميل #رورو_سالم