نوفيلا صاحب الظل الطويل

الفصل الثاني

#صاحب_الظل_الطويل
الفصل الثاني

انا بضيق .. نستاذن
وطلعت ونا شادة دمعتي بالغصب هذا لاش مانحبش نطلع للضيوف بكل

الضيفة .. خيرها بنتك يا نجلاء
ماما.. بنتي انطوائية وتزعل من كل حاجة
ماجدة .. مش تزعل من كل حاجة هيا حساسة بس زيادة عن اللزوم وكلامك اكيد ضايقها
الضيفة بقلة ذوق .. حساسيتها لروحها شنو بناخذها لولدي نا
ماما اضايقت من كلمتها لكن هذي ضيفتها ماعندها ما ادير
الضيفة .. انا الحق ماجدة ديمة تشكر فيك وحبيت نتعرف عليك والحق عجبتني سما هلبة ونبيها لولدي

انا كنت جاية بسفرة العشاء وسما وراي بالمشروب وسمعت كلمتها بالذات مع كلمة ماما

ماما .. بس نغم  اكبر منها
الضيفة .. الحق انا مانبي وحدة ماتعرفش تتعامل مع الضيوف او تطلع تهدرز معاهم الحق انا نبي وحدة شهلوللية زي سما وجوها حلو
ماما بضيق .. يصير خير نسئل بوها وسما ونردو عليكم ان شاءالله

سما بصوت واطي .. نغومه خيرك وقفتي خشي بالعشاء
انا  انتبهت لروحي .. هيا هي

وخشيت حطيت العشاء ومابيتش نتعشى معاهم وهذا طبعي اصلا وطلعت للمطبخ الحق وقعدت نبكي هذي منين تعرفني نين تقول عليا هكي ومعقولة حياتي كلها هكي يعني لو كان جوي مش مليح ونضحك طول الوقت معناها مايصيرش مني زوجة ومسحت دموعي لما حسيت بحد بيخش المطبخ ونضت درت روحي نكمل في الضمان

ايهم .. خيرك نغومي
انا .. مافي شي
ايهم .. ليش مش مع الين وسما تتعشي معاهم
انا .. ومن امتى نتعشى مع الضيوف او نقمعز في سفرة معاهم
ايهم بتنهيدة .. لامتى يا نغومي  لامتي وانتي بتقعدي منعزلة عن الناس هكي
انا.. مرتاحة يا ايهومي والله مرتاحة غير الناس تخليني في حالي والله مرتاحة
ايهم .. الناس مستحيل تخلي حد في حاله والناس ليها الظاهر بس انتي قلبك طيب وحنينة لكن الناس ماتشوفش في هذوم كلهم الناس يشوفو فيك وحدة منعزلة عليهم ومتكبرة ومغرورة
انا باستغراب .. متكبرة ومغرورة
ايهم .. ولاد شارعنا من هما صغار مايحبوكش مش لسبب لانهم كبرو وانتي عمرك حتى سلام ربي ما قلتيه ليهم فيقولو ليا ديمة ان اختك مغرورة ومتكبرة على الناس
انا .. وانت عارفني اني والله ماني هكي وحتى لما نجي وانا خاطمة من بحذاهم بننطق السلام نخاف ومايطلعش مني
ايهم .. وهذا اللي بيجنني انتي مش مغير خوف من الاولاد بس حتى بنات عيلتنا يقولو عليك هكي شنو حتى هما تخافي منهم
انا .. والله زي مانقولك  الخوف اللي عندي مخليني منعزلة من كل حد ممكن بسبب طفولتي مش عارفة
ايهم .. ماعندي مانديرلك يا لولي غير ربي يكون مع اللي بياخذك
انا  بحزن .. علاش
ايهم .. لانه بيتعامل معاك كانك بنته مش مرته
انا  بدموع على سبلة وينزلن .. غير يجي قبل وبعدين ساهل
ايهم وبيغير الموضوع لما عرفني خلاص بنبكي .. ارتاتحي تو نسيتيني شنو جايبني للمطبخ
انا .. شنو
ايهم .. بوي قالك يبي قهوة جايه عمي خليفة
انا .. به
وطلع ايهم وجهزت القهوة وجابو سفرة العشاء وغسلت المعاين وضميت المطبخ وروحو الضيوف وخشيت لداري لراحتي الكبيرة وشديت مذكرتي وقعدت نكتب