الساعة ثمان الصبح تلفوني يرن اشوف من المتصل!؟
"هشام يتصل بك "
-الو هشام!
-ها جهزتي قدنا بالطريق ؟
-ايوا ايوا اعطيني نص ساعة وبجهز!
-طيب هيا قليل وتلاقينا جنب بيتكم اول م ادق هون اخرجي
-تمام تمام اطبق دحين عشان اغلف الاكل
هيا حبيبي براعي لك
-معسلامة
-معسلامة
هشام ذا طبعاً بن عمتي هو شخصية مرحه كثير مايحبش الرسميات ولا يحب انه يقول سيدتي او عزيزتي زي مايقولو البقية مايحبش يرتب لحيتة دايما مخليها مغطيه نص وجهه مايحبش الجينز كمان اغلب لبسه سروال الجيش وجرم ابو نص كم وبنفس الوقت مايحبش القهوة ولا فيروز يحب دايماً الشاهي الملبن ويفضله عيدروسي وفنانة المفضل محمد سعد وجنبه خليل واحمد قاسم ووقت مايخزن يتسمع فيصل ولا كريدي !
بدأت قصتنا اول ماخلصت الثانوية بدء يظهر لي اهتمامه لمن كان كل يوم عصر يجزع لي سندوشات لخم "بحكم انه وجبتي المفضله ويزيد فوقه سمبوسة وباجية وبمية وخمسين شبس "عواف العصر " ولمن كان ميرضيش ياكل الخبز غير من يدي بديت الاحظ ذا الشيء بس استبعدته بحكم اننا تربينا سواء وطول عمري واني قدام وجهة بشعفتي وجلابيتي وصوتي اللي يفزز الميت وقت عصبيتي حتى هو بيوم انضرب مني بالمكنس لمن نظفت ودخل مهري فوق الموكيت برجولة هههههههههه يستاهل فحرني اصلا
لما بيوم وكان بيت جدي معزومين عند بيتنا غداء واني بحكم اني وحيدة امي من البنات كنت شايله اليوم ذا فوق راسي سويت ذاك اليوم كبسة دجاج وسويت مطفاية وخبز التنور ،العيال بمخزن والحريم بمخزن البيت كان مليان جداً فجاة واني فوق الشوله الاقي هشام واقف بالمطبخ :
-ويه يامشاطل ايش معك هنا كيه طير لك خليني اطبخ!
وهو ساكت مايردش لفت له
-عودبالله ايش لطمك جني يابني؟
-لا انتي لطمتينا!
-هيا اليوم مله بلا هباله وربي بيحرق عليا الصيد وانت تتبهدل لك اخرج وصيح لهناء عشان تتفاقد معي التنور بلصيه
-ليش عادو هناء؟!قدنا معك بلصيه انا
ولصينا التنور وهشام يساعدني يخرج الخبز من داخل وفجاة حرق بيده ذيك الساعة مدريش مالني والله حسيت بخوف عليه كنت زي المربوشة اسوي طماطم وفوقه معجون الاسنان وهو يتفرج لي ذيك الساعة كانه مستغرب من شيء او انه حصل اللي واجي عشانة جلس فوق حجر واني اطبخ جنبه محد كلم التاني لمن بعد نص ساعة صمت قطع صمتنا صوت هشام وهو يقولي :
-فطوم كيف تشوفينا؟
-اشوفك غشاش!
-يابنت يوم بالله هادرينا جد زي باقي البنات!
-مله انت تتهابل كيف اشوفك بالله رجال زي باقي الرجال !
-قصدي هل بيوم تشوفينا انفع اكون زوج لك؟
-فرششششششششششت ضحك وقتها
-ليش تضحكي قلت نكتة انا؟
-ها ولا ايش؟ ايش شارب اليوم!
-فيمتو جابلي ياته امك اول
-عليك بالعافية
-الله يعافيك
اقتلب وجهه فجاة وشل نفسه وراح المخزن اتمدد وحط المشدة فوق وجهه
بعد نص ساعة قربنا الاكل اجا يشل مني الصحون وجهه تقول كبه مخزوقة اهادره مايردش عليا سقلته ذيك الساعة لما العصر خرج الرئيسي رجع المغرب قلت له فين عوافي برضه مايردش!
شل نفسه وجلس فوق تلفونه
اني ذيك الساعه اهادر الناس وداخلتي يغلي ليش يعاملني كذا من الظهر ماجاش ببالي انه ماسك من كلام الظهر...
#يتبع
