🐸🐸🐸
اها قلت ليها اتفضلي بس مجرد ما دخلت البيت العصابة هجمو عليها زي الضبان ودخلوني في حتة ضيقة .
العصابة ديل هم اولاد اختي ومعاهم شفع الحلة بجو يلعبو تحت النيمة بتاعتنا والشفع غبببببببش تقول فول مدمس ما بتفرزهم من التراب واخر اليوم امهاتهم ما بعرفوهم الا يشطفوهم ويغسلو وشوشهم حتان يفرزوهم من بعض دا ود فلانة و دا ود علانة.
اول بت ميكي اتخلعت لكن بعد ما لاحظت ليهم كويس عرفت انهم بنو ادمين . حضنتهم بكل براءة وحنية لمن دموعها سالت وقالت لي : ياااااي اطفال ابرياء بالله ديل مشردين ولا يتامى .
قلت ليها يتامى شنو يا بت ميكي هنديك ليها امهم قاعدة في المطبخ والباقين ديل اولاد الحلة اصلا بيتنا دا زي الملجأ اي طفل 👶 رايح بجو بفتشو هنا .
اها بعد سلمت عليهم وباستهم قعدو يكوركو فيني وينا حلاوتنا وينا حلاوتنا ، قلت ليهم نسيت هسي بمشي اجيب ليكم من الدكان ، بت ميكي طوااالي فتحت شنطتها وطلعت منها شكولاتات وقعدت توزع ليهم ، يا كافي البلا الشكولاتة زاتا ما بيعرفوها بس ضاقو طعمها كدا لقوها سمحة قامو اكلوها ومشو مننا ،
بعد ما خلصنا من العصابة قلت ليها اتفضلي في البرندة ورسلت ولد اختي قلت ليهو امشي نادي امك خليها تجي تسلم علي الضيفة دي .
يلا اختي كانت بتقطع في البصل وجاتنا مكفكفة يدينا زي المصارع وشايلة سكين بس دايرة مشاكل .
المهم شافت البت قامت رمت السكين وقشت يديها في جلابيتها وسلمت علي بت ميكي وقعدت بالجنبة تعاين ليها ، طواالي انا قمت طلعت وناديتها قلت ليها : عليك الله ما تقعدي تعايني للبت كدا بتسحريها ياخ ، كدا اعملي ليها عصير .
اختي : خليك من العصير البت النضيفة دي رايحة ولا شنو?? اصلا ما بتشبه البنات البجو بقولو دايرات قروش الموية ولا النفايات ديلك ، البت دي عاملة زي المزيعات البجيبوهم في التلفزيون .
انا : ياخ اسكتي دي زميلتي في الجامعة وقالت دايرة تتعرف عليكم هسي امي وينا .
اختي : ليه يعني تتعرف علينا دايرة تكتب فينا بحث ولا شنوو?? .
انا : بحث شنو يا بت عليك الله خلي نضميك الكتير دا وقولي امي مشت وين ،
اختي : امي مشت تعوس عند الجيران وهسي بتجي .
انا : خلاص اعملي ليها عصير خليها تشربو لحدي ما امي تجي .
قامت اختي عملت ليها عصير عرديب حاااامض النوع اللامن تشربو داك اضانك تعمل صنننننننن ، وجابتو لي بت ميكي ، اها البنية شربت ومبسوطة ومتكيفة من العصير ،
بعد شوبة سامعين الباب كركب دي الحجة جات وشايلة طبق الكسرة والشفع اتلمو فيها ويكوركو : دايرين كسرة ب موية دايرين كسرة ب موية . ( كسرة ب موية دي عبارة عن كسرة وموية وشوية سكر او ملح او بصل او زيت او اي شي حسب الموجود ، و دي اكلة الناس المساكين والغلابة ) ،
الحجة دخلت المطبخ وختت طبق الكسرة وقالت لي اختي : اعملي للشفع ديل كسرة ب موية خليهم ياكلو ،
اختي : هيييي يا امي ما شفتي ولدك جاب ليهو واحدة كدة زي بنات الدعايات البجيبوهم في التلفزيون ديلك وقال دي زميلتو في الجامعة كدا امشي شوفيها قاعدة في البرندة .
الحجة جات داخلة علينا وسلمت علي بت ميكي وقعدت تتونس معانا ، وبت ميكي عرفتها علي نفسها عن امها وابوها انهم كانو مغتربين خارج السودان بس رجعو استقرو عشان هي تقرا جامعتها هنا .
وفجأة نسمع ليك صوت الباب كرو كو كرروووو ككوو كو والشفع جو جارين ونفسهم قايم .
وقالو كتمت ..
كلنا وقفنا علي حيلنا….
.
.
الله يستر من الكتمة.....
.
.
#يتبع…
