🐸🐸🐸
وفجأة نسمع ليك صوت الباب كرو ككوكو كرورو كو والشفع جو جارين ونفسهم قايم.
وقالو : كتمت
كلنا وقفنا علي حيلنا . لانو الحاج كبس . اصلا ابوي لمن يجي داخل البيت كلنا بنطاقش واي واحد يشوف ليهو ركن يتلم فيهو لانو زول صعب كلنا بنخاف منو عندو عكاز كدا مدبب كان لبعك بيهو الا يرقدوك الحوادث وعندو مركوب من شدة ما قديم بقى مكعوج زي السفروق ( السفروق دا زي المخلب حق ماوكلي وبيصطادو بيهو الارانب) ، مرة كنت قاعد اتغدى معاهو ومديت يدي للعيشة الخامسة قام طقاني بالمركوب لحدي ما نفسي كتم وقام شالني ورماني برا الشارع وقالي ما تجي البيت دا تاني ، غايتو الا دخلو الاجاويد .
المهم الحاج كبس مع انو دا ما وكتو لكن ما عارف الجابو شنو ، جا داخل وسلم علينا وقعد يحمر لي نظام في ضيفة في البيت انت المقعدك مع النساوين شنو ، طوالي قلت ليهو دي زميلتي في الجامعة وجاية تسلم علي ناس البيت ، وقلت للبت يلا الزمن فات ارح نقدمك الزلط ، عشان ما تحصل حاجة من الحاج ، بعد طلعنا بت ميكي اتصلت علي السواق ووصفت ليهو وجا بي سرعة وركبت مشت وقبل ما تفتح خشمها قلت ليها بعدين بتصل عليك .
دخلت البيت ومشيت المطبخ قلت للحجة : بت ميكي دي رايك فيها شنو انا داير اعرسها .
الحجة : داير تعرس البت دي ؟؟
انا : ااي ياحجة ؟؟
الحجة : وهي بترضى بيك ؟؟
انا : اااي موافقة وما عندها اي مشكلة ،
الحجة مسكتني من حنكي وبقت تلف وشي يمين وشمال وقالت لي : قالت دايراك انت بي جلحاتك دي ووشك الحامض دا .
انا : ااي يا حجة هي راضية ومقتنعة بي وخسي دايرك تكلمي الحاج بالموضوع دا خلي يبيع لينا ارض في البلد ولا بقر ولا اي حاجة المهم اعرس البت دي .
الحجة: بري والله موضوع عرسك دا الا تكلم الحاج برااااك .
انا : خير يا حجة طالما ما دايرة تكلميهو خلاص بكلمو براي واليحصل يحصل .
مشيت للحاج لقيتو قاعد في عنقريبو تحت النيمة وخاتي الرادي وقاعد يقلب في الاذاعات .
وقفت بعيد و اتشجعت عشان بت ميكي ما تضيع مني وقلت ليهو : يا حاج انا داير اعرس البت الجيت لقيتا قبيل قاعدة ديك ودايرك تشوف لي حاجة في البلد تبيعا لي كان ارض ولا بقر ولا تتدين من اعمامي .
الحاج خت يدو في اضانو وقالي : تعال قريب ما سامعك ولو عندك حاجة تعال فهمني ليها.
انا قربت منو شوية وقلت ليهو : انا داير اعر…
قام مسكني ليك كربون وشالني فوووووق و دق بي الواطة وخنقني و قال لي : قلت لي داير تعرس ااااا وانت يدوبك اتخرجت ولا اشغلت ولا حاجة وداير تعرس ااااا ودايرني ابيع ليك ارض في البلد هو انت خليت لي حاجة تاني ابيعا ولا الديون الدخلتني فيها وتاني دايرني اتدين ليك ونحن راجنك تشتغل عشان تسدد ديونك وانت بتفتش للعرس لكن العرس دا لو ما طيرتو ليك من راسك ما ابقى ابوك انا ، وانا غلطان لمن سمعت كلام امك وخليتك تقرأ هسي لو كان دخلتك المنطقة كان عرفت ليك صنعة ونفعت نفسك.
وانا افرفر وعيوني مرقو بييييييض ، والحجة بقت تصرخ الليلة ووووب كتلت لي ولدي ، ما فكاني منو الا عمي بعد سمع صراخ الحجة جا ناطي بالحيطة ومسك الحاج وانا لقيتها فرصة قمت جاااري ودقشت الباب وطلعت مشيت قعدت جنب العمود بتنفس شرار شرار .
زهجت وقرفت من الدنيا وقلت ياخ انسى الفكرة طالما انا مفلس وما عندي قروش لكن اتذكرت بت ميكي انها متمسكة بي وانا زاتي ما داير اسيبها لانها ادتني دافع للحياة وحسستني اني انسان ما زي باقي البنات البضحكن فيني ، ف عشان كدا قلت انا لازم ابقى قوي وما أيأس و في حاجة واحدة انا لو عملتها اكيد بعرسها ان شاء الله .
قمت قشيت الدم الفي خشمي وجريت نفس طويييييل وقررت انفذ الحاجة الفي راسي. ويا روح ما بعدك روح والكاتبو الله بكون.
.
.
.
#يتبــــــع… ..
