🐸🐸🐸
بعد زهجت وقرفت وقررت انسى الموضوع بس اتذكرت كلام بت ميكي انها دايراني ومتمسكة بي وبالجد حسيت اني انسان فقررت اني اشوف اهلها يمكن عندهم راي تاني قبل ما اتهور واخوض التجربة الانا كنت خايف منها ، قمت اتصلت عليها وقلت ليها داير اجيكم في البيت واتعرف علي امك وابوك واخليهم يشوفوني ويعرفو حالتي كيف ولو موافقين خلاص انا بتوكل وبعمل الفي راسي ، قالت لي خلاص تعال بعد المغرب يكون بابي جا من الشغل ، ووصفت لي البيت.
يلا من مكاني داك مشيت البيت عندي بنطلون وقميص عبدالواحد ديل للحفلات والمهمات الخاصة بس ، طلعتهم وجهزتهم وحلقت شعري وعملت صبغة غتيت بيها جلحاتي شوية ،
ومن العصر قمت استحميت واتشيكت ومشيت لي بتاع قدر ظروفك اتريحت منو ، و يا بت ميكي جاك زوول.
وصلت حلتهم كلها ناس راقين وهاي كلاس ما زينا نحن ناس ام دفسو وقريعتي راحت ، المهم وصلت قدام البيت لقيتو فيلا عجيبة ترقش من الانوار ، قمت طوالي اتصلت عليها وقلت ليها انا موجود حسب الوصف الاديتيني ليهو ، قالت لي دقيقة بس وانا عندك .
وانا واقف فاتح خشمي وبتلفت بعاين في المناظر والعمارات والفلل دي ، سامع ليك صوت حنين بنادي بي اسمي ، اتلفت لقيتها بت حلللللوة كدا واقفة في الباب وانا قعدت اتبسم واقول البت دي بتعرفني من وين اتاريها دي الشغالة بتاعتهم ، المهم دخلتني في الصالة ومشت ، وانا قعدت اعاين واتلفت ومبهور بالاثاث بتاعهم كلو فخم وخاتين تحف وحاجات اسكتو ساكت ، بعد شوية جات الشغالة وجابت صينية فيها جك عصير و شكولاتات وحلويات ، ختتهم قدامي في الطربيزة ومشت ، اتلفت جاي جاي ما شايف زول قمت مليت يدي شكولاتة وحلويات وختيتها في جيبي ومسكت الجك كرطعتو (شوبتو ) كلو وقشيت خشمي وعملت نايم .
جات داخلة تتقدل ومعاها امها ، سلمو علي قلت ليها دي اختك الكبيرة ، امها قعدت تتبسم قالت لي دي مامي ، المهم قعدنا نتونس كدا ابوهم جا داخل ، هو زول ماشاء الله لسه شباب والراحة ظاهرة فيهو وجسمو مندي ، ما زينا الواحد فينا اغبااااااش وكرعينو مشققات وكملنا ملايات البيت كلها ، هو شكلو زول متواضع جدا سلم علي وقالي خلينا نتغدى اول وبعدين نتعرف عليك ، مشينا صالة الاكل لقينا الشغالة مجهزة الصفرة وعليها ما لذ وطاب ( قلت الليلة مولد عديييل كدا علي الطلاق اضرب ضرب لمن اقول كفي وكويس انو مافي عوارض ، اولاد اختي وشفع الحلة ديلك الواحد بياكل بيدينو الاتنين) ، قام ابوها وصف لي المغسلة ، مشيت اغسل يديني لقيت الماسورة لكن مافيها مكان يفتحوها منها (الماسورة اصلا بتشتغل بي حساس يعني تخت يدك تحت الماسورة وتعمل نفسك بتغسل الموية بتنزل براها) بقيت اكركب في الماسورة والفها يمين وشمال ابت تكب لمن ما عرفت ليها قمت مسحت يديني في جيوبي ومشيت ، نزلت ليك في الاكل دا تقول صايم لي سنين (انا من اشوف اكل اعصابي بتبوظ وما بتكلم وبفقد كل الحواس لا بسمع ولا بشوف غير قدامي بس) ، طبعا اصناف ما بعرف منها اي حاجة لكن طقيت طق لمن وقفت قربة ، ياخ اول مرة اشبع كدا لانو عندنا هناك لمن الصحن يقرب يخلص في واحد بيختف الصحن وبيقوم جاري .
خلصنا الاكل والشراب وقعدت مع ابوها وامها وعرفتهم علي نفسي ووضعي العصب واي كلام داير يعرفو وريتهم ، ولقيت امها انسانة راقية و طيبة وابوها زول فاهم وانسان راقي جدا قال لي يا زول ابشر ولا يهمك طالما بتي دايراك وهي مصرة عليك وانا داير سعادة بتي وراحتها وانت جيتني في البيت وعرفتني عن نفسك وبتي زاتا كلمتني عنك وعن اسرتك والفيهو الخير يقدمو ربنا ، قلت ليهو خلاص خير انا بجهز وبجيب اهلي نتقدم لي بتك ، قالي مافي مشكلة وربنا يسهل .
مرقت من بيتهم وانا كلي امل اني اخوض المغامرة الفي راسي عشان احقق حلمي واعرس بت ميكي سريع .
.
.
المغامرة كانت صعبة شوية بس انا كان عندي هدف لازم اوصل ليهو وكنت بشوف بت ميكي قدامي بتقول لي انا منتظراك ما تتأخر .. خلاص انا بقيت ما شايف حاجة غير انفذ الفي راسي.
.
.
.
#يتبـــــع.
