🐸🐸🐸
من بعيد نشوف ليك عربية جاية علينا وتولع وتطفي في النور والجماعة قالو ديل قطاعين الطرق ، انا خفت شديد وولعت عيوني كبااار وخفت علي ال 7 الف المعاي (طبعا هي بسيطة لكن لي زول فقير زيي كدا بشوفها كتيرة)
خلاص لمن العربية قربت مننا قمنا وقفنا وجات وقفت العربية جنبنا ونزل منها صحبي ودفعتي ، انا اتنفست جاز جاز ومشيت سلمت عليهو قال سمع انو في بير في اتجاهنا وقعت افتكر انو دي البير حقتنا ، يلا حكيت ليهو الحصل وركبت معاهو مشينا مع الجماعة ديلك لحدي وصلناهم وعملنا واجبنا ورجعنا .
المهم صاحبي في الطريق قال لي يا زول ما تخاف وما تيأس لانو المنطقة دي فيها دهب وانا بلمك مع جماعة ماشين بكرة ديل خبرة وبعرفو مكان الدهب الجد انت امشي معاهم واحفر في البداية بس لمن البير تبقى غريقة ما تدخل وانا بوصيهم عليك ، المهم بعد تعب وتحنيس رجعت مع التيم الجديد واتحركنا مكان تاني غير الاول .
الجماعة ديل زي ما قال صاحبي انهم ناس خبرة في الشغلة دي والدهب بحسو بمكانو تقول عندهم جن ، اشتغلت معاهم وهم زاتهم حمسوني للشغل بعد كنت خايف لانهم كلهم خبرة وعرفو كيف يوروني اشتغل .
مرت فترة وانا شغال مع الجماعة ديل نحفر نلقي دهب ونقسمو وانا بدي القروش لي صحبي يوصلها لي ابوي وكنت بوصيهو انو جزء من القروش يبنو لي بيها اوضة في الركن كدا ، طبعا الحاج ما قصر لانو كان مبسوط اني برسل ليهو قروش وعمل لي غرفة وظبطها كويس ولمن خلاص صحبي قال لي ابوك قاليك غرفتك جاهزة ، طبعا بت ميكي بعد ما انقطعت منها ولقت وتلفوني مقفول حاولت توصل بيتنا وتعرف الاخبار وكانت بتزورهم كل فترة .
قعدت بعديها لملمت قروش كويسة عشان اظبط بيها الغرفة جوة و العرس طوااالي قلت ليهم يا جماعة انا خلاص بعمل كششششش ، وبرجع اهلي وكان ربنا سهل ما بجيكم تاني .
رجعت ومعاي حصاد 8 شهور في الدهب كان مبلغ حلو جدا قدرت اتقدم بيهو لي بت ميكي ، في البداية اهلها من اعمامها وخيلانها كانو رافضين تماما زواجنا لانو هم من ناس مرطبين ونحن تحت خط الفقر والحمد لله ، بس هي كانت متمسكة بي شديد وابوها وامها ما عندهم مشكلة بس دايرين سعادة بتهم ،لذلك ما كان عندهم خيار غير يوافقو ، وقالو بعد الزواج نمشي نقعد معاهم في الفيلا بتاعتهم ، انا نطيت فوق وقلت ليهم السما قريب واصلو ما بنستقر ونسكن معاكم وبتكم ممكن تجيكم اي وقت انا ما بمنعها لكن سكن معاكم لا ، ابوها وامها استغربو وقالو لي : ليه انت كارهنا ولا شنو رافض تقعد معانا ؟؟ قلت ليهم : انا ما كارهكم ولا مابيكم لكن دي حاجة في نفسي اني اسكن في بيتي عشان اكون مرتاح ☺ نفسيا وما اسكن مع نسابتي واستصغر نفسي وما يكون عندي كلمة ، وبتكم لو دايرة تقعد معاي في الكركور حقي داك اهلا وسهلا ولو مصرين انها تسكن معاكم انا ما بسكن معاكم وربنا يسهل عليها ويسهل لي ، المهم بعد شافوني راكب راس قامو وافقو وحددنا يوم العرس وقالو في صالة ،انا قلت ليهم ناسي الغبش ديل ما بتاعين صالات ولا بعرفو الصالات ونحن حفلاتنا في الحلة بس نتدردق في التراب لمن تجينا قطيعة، قالو خلاص خير مافي مشكلة .
انا كنت جسمي زي الورل من شغل الدهب لكن خشيت صيانة شديدة و فازلين وودك عشان اقفل بيها شقوق كرعيني .
اها قبل اسبوع من يوم العرس دقينا صيوان من الشارع للشارع ويعجبوك ناس العشوائيات جنهم طرب وكتمات واصلا بكون في ساوند وفنانين وقونات في الحلة ، طبعا ما قصرو عشان اخوكم زول واجب ويوميا الكتمة بتدا من العصر والناس تهجج وتحتو حت وغبارهم فوق تقول جارين في سباق .
يوم العرس عزينا اهل العروس عزة شديدة والعرس انتهى علي خير والناس انبسطت معاي وقضينا احلي ايام عمرنا مشينا كسلا وبورسودان وقصينا شهر عسلنا ورجعنا قعدنا في الكركور بتاعي داك.
طبعا ابوها كان دايرنا نمشي شهر عسل ماليزيا بس قلت ليهو انا ما عندي قروش للسفر قال لي بديكم حق السفر هدية لي بتي ، قلت ليهو قرش منك ما داير وانا راجلها وبعرف كيف اسعدها بالقليل .
ابو النسب اتكيف من كلامي شديد وقال لي بتي عرفت تختار راجل وبعد رجعنا من شهر العسل عرض لي اني اشتغل معاهو في المصنع حقو ، بعد عزة نفس وتحنيس من بتو وافقتا واشتغلت معاه وربنا فتحها علي.
.
.
#النهايــــــة
.
#كســـــــرة
قصتي حكيتها لانو داير اوريكم انو ممكن تلقى زول يحبك انت شخصيا عشان روحك وما يحبك عشان شكلك او قروشك ، وممكن الواحد يجتهد ويثابر ويكافح عشان يحقق حلمو ايا كان حلمو سوى كان زواج او غيرو ، ويصل لي مبتغاهو ويبقى قدر الكلمة الاداها لي بت الناس ، ما ضروري تمشي الدهب لكن اسعى وابحث واتوكل علي الله وربنا بقيف معاك.
ودمتم في امان الله.
لو عجبتكم القصة ارجوكم تصوتو لي وتشجعوني اكتب قصة حيات بت ميكي في الارياف والعشوائيات 😍😘
#تحياتي_عدووول
