الحلقه 6
بسم الله الرحمن الرحيم و الصلاة و السلام على اشرف المرسلين
في شقة تبدو عليها الفخامة كانت تجلس على الكرسي تضع قدم فوق الاخرى يبدو عليها الغرور كانت تجلس مع رجل يبدو انه في الخمسين من عمره يظهر عليه انه ذو شأن عالي من ملابسه و طريقة كلامه
عصام الالفي : نفذتي
نسرين : نفذت يا باشا بس انا مش فاهمة احنا ليه بعتنا الجواب ده للدكتور ايه علاقته بالموضوع
عصام : هتفضلي كده طول عمرك لو فكرتي شويه هتلاقي ان الدكتور ده اقرب واحد لفارس فلو فارس بيمثل اكيد ده هيكون عارف كل حاجه ولو طلع كلامي صح يبقى لازم نخلص منهم هما الاتنين
نسرين : معتقدش يا باشا ان فارس بيمثل انا كنت خطيبته لسنة بحالها و عارفاه كويس اوي
عصام : خايفه عليه يا مزة
قامت نسرين من مكانها بدلع توجهت اليه وقفت خلفه وقامت بعمل مساج له
نسرين : اخاف عليه ليه يا قلبي مكنتش ساعتك في اللي عملته يا باشا
عصام : كله بتمنه يا قلبي
نسرين : حبيبي انت والله بقولك ايه موحشتكش
عصام بنظرات جريئة لها : طبعا وحشتيني تعالي اما اقولك
نسرين بضحكه جريئة : يلا يا قلبي
_____________________
في شقة بهاء تجمعت الشقيقتين حنان و كريمة
حنان ' جنان يا ربي جنان
كريمة : خلاص بقى يا حنان انت موتره نفسك ليه احنا مش هنعمل حاجه اصلا
حنان : انت مجنونة صح ازاي مش هنعمل حاجه واهل جوزك اللي جايين انهارده دول يقولوا ايه لما يلاقونا مش عملين حاجه يقولوا كنا بنكدب عليهم
كريمة : تصدقي مفكرتش في كده
حنان : امال انا بعمل ايه انا بقى من ساعة ما عرفت الموضوع امبارح وانا بظبط كل حاجه صحيح معزمتش ناس كتير بس اهه هنقول في الفرح هنعزم كل الناس وان دا بس عائلي واصحابنا بس وبالنسبة للجنينة انا اتفقت مع الناس هيجوا كمان ساعة يظبطوا الدنيا
و في ميكب ارتست جايه لينا وايه كمان يا حنان
كريمة : حيلك حيلك كل ده عملتيه امتى
حنان : انا منمتش اصلا عشان تعرفي انكم متعرفوش تعيشوا من غيري و بالنسبة للفساتين انا بردوا كلمت وجيه و هو هيجيب انهارده اتنين موديل لكل واحده فينا نختار منهم ايه رايك
كريمة بحزن: كان نفسي يكون اللي بنعمله ده بجد و يبقى جوازهم بجد
حنان : هو انت فاكرة انه مش بجد تبقي عبيطة انا عارفه و متأكده انهم هيستمروا مع بعض
