نادر فودة 3

تحت الأرض (الخطيئة الكبرى)

         لحظات ...دقايق... ساعات ...يمكن اقل،يمكن اكتر..

         كل اللي بيحصل قدامي مش قادر استوعبه 

         مشاهد متداخلة وانا بغوص جوا الارض ،الوضع مش زي ما انت او انا متخيلين..

         الوضع مش قصة واحد اتشد تحت الارض فنفسه اتكتم وبدأ يموت..

         فقدت الشعور بالزمان والمكان وميقتش مدرك انا عارف اتنفس ولا مش عارف...

         مشاهد كتير جدا عمالة تجري ورا بعضها من اول دخولي قبر عمي (شحاتة)لدخولي القبر بالشكل اللي (كساب)كان مرتبه..لدخولي قبر ابويا 

         بعدها صوت (امنية )اختي بتصرخ وبتلومني اني سايبهم ..

        وصورة لمديري المباشر بيلومني على تأخيري في تسليم الشغل ..

        وصورة لأمي بتلومني اني انا السبب في موت ابويا ..

        وبعدها ظهرت صور واضحة لوشوش عم (مختار)والشيخ(لطفي)وكانوا ماسكين والدي وكأنهم بيمنعوه من الهجوم عليا ..

        لكنه صرخ بصوت لا يحتمل :

        "انت مدفنتنيش لييييييييييييييه ؟!"

       صرخة خلت التلاتة يدوبوا ادامي ويتلاشوا لأجد نفسي في مكان زي بهو او حوش كبير حيطانه حجرية عليها نقوش وكتابات بلغة لا افهمها معلق غليها مشاعل ...

       وقفت ابص حواليا وانا مش فاهم اية المكان ده،لقيت باب اوضة معمول من خشب قديم جدا زي اللي بنشوفه في المتاحف الاثرية ،وبعده بشوية باب تاني ،اتجهت للباب الاولاني ودخلت ،الاوضة مختلفتش كتير عن برة لأنها بردو فيها مشاعل متعلقة والحيطان عليها نقوش وحروف ..

       المشاعل كانت منورة تلات اركان من الاوضة اما الركن الرابع كان مظلم تماما وشكله غامض ومخيف ،قربت منه شوية سمعت صوت زي ما يكون حد بيتنفس ..قلقت ورجعت لورا خطوة ،فاذا بصوت اجش يتكلم :

       الصوت:"من انت ؟"

       نادر :"انا...انا...انا فين ؟!"

       الصوت :"من انت ؟"

       نادر:"انا اسمي نادر ...انت مين ؟"

       الصوت:"كيف تجرؤ على السؤال وانت من اقتحم بيتي ؟!!"

       نادر:"انا مجتش هنا بمزاجي،انا اتشديت تحت الارض ."

       الصوت :"ماذا تريد ؟"

       (نادر) مرتبكا :"لا اريد شيئا ..انا اريد الرجوع "

       الصوت :"اقتحامك لعالمنا هو الخطيئة الكبرى،ستدفع ثمنا باهظا "

       نادر:" بقولك مجتش بمزاجي ...(الوقاد)و(كساب)هم اللي شدوني"

       ملحقتش اكمل الجملة،سمعت صرخة غضب طالعة من الضلمة خلت جسمي كله يتنفض وشعر راسي يقف،بعدها الركن المظلم اشتعل فيه يجي عشر مشاعل وشوفت الصوت كان جاي من مين او تحديدا من ايه ؟!