دخلت قلبي دون إذن (باللهجة العراقية )

البارت السادس

بارت جديد وياكم حبايبي أتمنى تصوتون على القصة وتنشروها حتى انزل بارتات اسرع احبكم ❤️
.
̨ا̍ڸــڭــٰا̍ٺــبــۃ ̨: ̨مۘــڕڀــمۘ ּا̍ڷــڜــمۘــڕڀــۃ
.............................................................................
احمد :- حياتي صارت كآبة ..بعد ما اندعمت مينا اني ما صفى بالي ولا ارتحيت وصرت ما الي واهس ولا خلك بشي وتعبت نفسيتي كلش بحيث جانت شوفتها بالمستشفى شوية تسد من أشواقي وتصبرني بس اخر مرة رحت داشوفها لكيتها ماكو فسألت الممرضة كالتلي طلعوها .. وبعدين حاولت اتصل عليها بس ما حصلتها وتلفونها مغلق بعد فترة من الانتظار والأشواق الي ماكله عقلي وكلبي اجاني اتصل من صديق وهو شرطي بمركز الشرطة الي صارت بيها دعوى مينا فرديت :-
حسام 📱:- الوو
احمد 📱:- الوو هلا حبيبي شلونك
حسام 📱:- هلا حمودي حبيبي الحمدلله بخير انت شلونك
احمد 📱:- على الله .. شكو ماكو
حسام 📱:- ماكو شي سلامتك .. أكلك حبي اليوم عازمك يمي بالبيت مسوي كعدة اني والشباب اصدقائنا وضحك ونسة والله تفوتك
احمد 📱 :- والله حبي تعبان وما الي واهس
حسام 📱 :- هاي شنو ابو الشباب هيج تردني وداكلك عازمك .. والله العظيم اذا ما اجيت ترة ازعل عليك وما أصالحك وانت تعرف زعلي بعد
احمد 📱 :- هاهية عمي كلشي ولا زعلك .. تدلل جايك
حسام 📱 :- اَي هيج أريدك يلا منتظرك .. مع السلامة
احمد 📱 :- مع السلامة حبيب كلبي.
باله هاي شلون شغلة يلا ميخالف خلي اروح اتونس وياه أصدقائي صارلي كومة ما شايفهم .
بعدين كمت بدلت وكعدت اتفصح بتلفوني وادخل على محادثاتي اني ومينا وسوالفها اووف . صارت الدنيا ليل واتوجهت لبيت صديقي
.
.
.
وصلت جان أدك الباب وفتحلي الباب
احمد :- السلام عليكم
حسام :- وعليكم السلام شلونك خيي
احمد :- الحمدلله انت شلونك
حسام :- الحمدلله بخير يلا خوية تفضل ليش بعدك واكف .. يالله سوو طريق
احمد :- دخلت للاستقبال وكعدت وقدملي جاي وضلينا نسولف جان يكول .
حسام :- اكول احمد انت مو جبت هذا الولد الي دعم هاي البنية للمركز
احمد :- اَي شبي
حسام :-قبل تقريبا اسبوع اجوي أهل البنية للمركز وشافوا الولد وأبوهم تخبل وعرف انت تحب بنته وطلعوا من المركز وهو كلش عصبي
احمد :- هاا .. صدك تحجي
حسام :- اَي والله لعد اجذب عليك
احمد (يحجي بقلبه ) :- يا الله .. هاي شصاير اني اكول حجي توفيق مينطيني وجه ومن اسلم عليه ميرد وو.. مينا هسة شصاير بيها واهلها شسولها ، اني لازم ادز امي عليهم ما اكدر اصبر بعد .
حسام :- احمد .. احمد .. ابو الشباب هاي شبيك صفنت
احمد :- فزيت ها لا ما بيه شي
حسام :- لا بيك شي والحب هيج سوه بحالك
احمد :- هههه شسوي بعد القلب وما يهوى
حسام :- يلا ميخالف ادعي الله يجمعكم حتى أجي اركص بعرسك 😂
احمد :- هههههه 🙌 آمداك يعني هاي الدعوه مو الخاطري طلعت علمود تركص بالعرس
حسام :- شنسوي والله ضايج اريد عرس ويلا عساس انت متكيف تتزوج
احمد :- طبعا اكيف وافرح يلا الله كريم
حسام :- الله كريم .. الباب كاعد تندك يمكن اجوي اصدقائنا اروح اشوفهم
احمد :- اَي شوف
راح فتح ألباب واني صافن وحاير بأمري شلون وشراح اسوي وخاف مينطوها اذا خطبتها والف فكرة وفكرة اجتي ببالي وجان ينقطع حبل افكاري بصوت جماعتي
جماعتي :- السلام عليكم
احمد :- وعليكم السلام
جماعتي :- هاي شنو احمد هنا هلا خوية شلونك
احمد :- الحمدلله بخير
وسلمت عليهم وضلينا نسولف وضحك صدك الأصدقاء ينسوك همومك وشكد ما جنت شايل هم على كلبك همه يبعدوه وبكل سهولة صارت ساعة 12 وسلمت على جماعتي وتوجهت للبيت لان ابوية دك عليه وخطية امي وابوية بالهم يمي هسة وهم يخافون عليه كلش لان ابنهم الوحيد ...... وصلت للبيت ودخلت ولكيت ابوية كاعد ومنتظرني بالمطبخ
احمد :- ها يابة السلام عليكم
ابو احمد :- هلا والله ونور البيت (باستهزاء ) وين جنت ليش متأخر مدكول عندي ام وآب يخافون عليه
احمد :- يأبه والله جنت يم جماعتي واني كلش ضايج كلت خلي اروح اتونس يمهم لو ميصير حرام
ابو احمد :- لا ابني مو حرام بس تعرف احنا شكد نحبك ونخاف عليك وأمك ما قبلت تنام وهي تعبانة واني كلتلها اني انتظرك ..بعد ما اريد هذا التأخير افتهمت ابني
احمد :- اَي يأبه افتهمت واني اسف .. يأبه أريدك بموضوع انت وامي
ابو احمد :- ابني باجر جمعة واحجي الي عندك واني كلش تعبان وأريد انام وأمك نايمه
احمد :- يلا اذا هيج لعد تصبح على خير
ابو احمد :- وانت من أهل الخير
.
.
بعدين صعدت لفراشي وكالعادة افكر شنو راح يصير ومينا شاغلة كل تفكيري وجان اغفه ✨✨
.
.
.
كم القدر قاسي علينا... يؤذي من نحب ويبعدنا عنهم ويجعلنا تأهين في بحر الحب .
.
.
الساعة 10 صباحاً
احمد :- يا الله أصبحنا وأصبح الملك لله . وفتحت تلفوني وكعدت اتصفح شوي وبعدينا نزلت للحمام غسلت ورحت للمطبخ لكيت اهلي كاعدين..... صباح الخير
الأم والأب :- صباح النور
ام احمد :- هلا وليدي تعال الريوك على اوله
احمد :- اَي والله جوعان واليوم الريوك دسم كيمر عرب وكاهي
ام احمد :- اَي مو خطية ابوك اليوم كعد من الصبح وجابه
ابو احمد :- يلا سمو بسم الله وبالعافية
احمد :- سمينا بسم الله وبدينا ناكل واني قررت افتح موضوع مينا  وياهم اليوم بعد ما كملنا كلت ........ ماما وبابا اريد احاجيكم بموضوع .
الأم والأب :- اَي تفضل
احمد :- يأبه صراحة اني قررت اتزوج
ام احمد :- اَي يمة ليش لا يوم السعد والهنا الي اشوفك عريس وافرح بيك . وانت ابو احمد شدكول
ابو احمد :- اني ما عندي مانع بس ابني انت تكدر تتحمل مسؤولية الزواج والأطفال والمصاريف يعني انت متأكد من قرارك .
احمد :- اَي يأبه متأكد واني الحمدلله داشتغل وفلوسي مكفيتني والحمدلله
ابو احمد :- اذا هيج لعد بيها الخير والله يقدم الي بي خير وصالح والله يا ابني احنا قابل شنريد من هاي الدنيا غير نشوف فرحتك وأطفالك يلعبون كدامنا وانت ام احمد شدكولين مو صحيح
ام احمد :- اَي والله صحيح ... زين ابني العروس منو
احمد :- يوم تعرفيها ماكو داعي احجي
ام احمد :- ها مينا اي والله ونعمة الاختيار البنية خوش بنية
ابو احمد :- ها لازم تعرفيها
ام احمد :- اَي والله هاي ابنك يحبها وحاط عينه عليها من زمان بنت حجي توفيق اذا تعرفها
ابو احمد :- لك ها ابو الحب طلعت تحب واني ما ادري .. يلا ونعم الاختيار وبيت حجي توفيق خوش ناس واني اعرفهم ناس مثقفين وصوتهم ميطلع .
احمد :- بس اكو مشكلة
ابو احمد :- شكو خير ان شاء الله
احمد :- صراحة يأبه اني احبها وعندي علاقة بيها واهلها عرفو لان صارلها حادث واني نقذتها ولكيت المجرم واهلها عرفو من المجرم من راحو للمركز واني هسة خايف خاف مينطونياها .
ابو احمد :- ابني اذا انت حبك شريف وما صاير بيناتهم شي مخالف الشرع ان شاء الله ينطوكياها
احمد :- لا يأبه اعوذ بالله علاقتنا بس رسايل حتى لا مواعدها ولا هي تقبل وهي مو من ذني البنات الي يذبن روحهن على الرجال .
ابو احمد :- يلا ابني الله كريم واليوم اخلي أمك تروح عليهم ام احمد مو لو انتي عندج اعتراض أو رأي ثاني .
ام احمد :- لا بالعكس اني اكيف واليوم أخذ خالتك وعمتك وأروحلهم .
احمد :- لا يوم هم عمتي ..!
ابواحمد :- ليش لك شبيها عمتك ما تعجب
احمد :- لا يأبه مو متعجب بس انت تعرف هي تريدني لبنتها وبس تلمحلي بيها .
ابو احمد :- يلا هم صحيح ام احمد روحي انتي واختج .
ام احمد :- ماشي
ابو احمد :- يلا ابني كوم حتى نلحك لصلاة الظهر
احمد :- اَي يالله
كمت سبحت وتوضيت ولبست دشداشتي وإخذت سبحتي وساعتي واتوجهت اني وابوية للجامع وبعدين بدت الصلاة وصلينا ودعيت من كل كلبي ربي يجمعني بمينا حتى اكمل ديني وحبي لربي والها
احمد :- ها يابه دعيتلي
ابو احمد :- اي ابني دعيتلك وَيَا رب تتزوجها وتكمل فرحتنا
احمد :- أمين يا رب ... يابه شوف هذا حجي توفيق كاعد هناك روح حاجيه ولين كلبه واطلبلي بنته
ابو احمد :- ابني خاف اسمع كلامك وتسويلي مشكلة
احمد :- لا يابه روح لخاطري
ابو احمد :- يلا راح اروح شسوي امري لله ألواحد القهار
.
.
ابو احمد :- السلام عليكم حجي توفيق شلونك
حجي توفيق :- وعليكم السلام الحمدلله انت شلونك
ابو احمد :- والله الحمدلله بخير الأهل شلونهم
(هنا جانت نبره حجي توفيق ثكيلة وكلها عتب على ابو احمد)
حجي توفيق :- بخير !
ابو احمد :- صراحة يا حجي توفيق اني كلش متأسف منك على ألي صار وابني والله نيته شريفة وياه بنتكم واني اريد اطلب أيد بنتك لابني على سنة الله ورسوله
حجي توفيق :- أبو احمد اسمعني اني لو مو من أهل الله ولو ما ادري ابنكم نيته شريفة وياه بنتي وما عنده شي ويريد يخطبها جان من زمان صايره شغلة عشائر بيناتنا وبنتي ميته وابنكم همين بس تعرفني اني رجال ما ادور مشاكل وساد بابا بيتي عليه ومحافظ على عائلتي هاي وحدة ... وثانياً اذا على سالفة الخطوبة احنا نتشرف بيكم واهلا وسهلا بيكم بأي وقت
ابو احمد :- رحم الله والديك واحنا هم نتشرف بيكم وأنتو خوش ناس وعلى راسي والله يا حجي اني ادري بيك ما ادور مشاكل وكلت خلي أتفاهم وياك احسن لان شغلة الزواج والي يجمع راسين بالحلال ما بيها شي واله قصر بالجنه .
حجي توفيق :- الله يسلمك .. اَي والله ما بيها شي وان شاء الله البي خير وصالح الله يقدمه .
ابو احمد :- يلا حجي اني اترخص وأمنه بركبتك شتحتاج كلي اعتبرني مثل اخوك
حجي توفيق :- تسلم ما قصرت ...يلا يابه مرخوص مع السلامه الله وياك
ابو احمد :- مع السلامة
.
.
احمد :- ها يابه بشر شسويت
ابو احمد :- لك ابوك يدخل بيها وميسوي شي
احمد :- اَي يعني شصار
ابو احمد :- لك شنو شصار هاهية صالحته وكتله على الخطبة وكال اتفضلو .
احمد :- يابه صدك تحجي .. ما اصدك من الفرحة
ابو احمد :- لعد اتشاقة
وبست رأس ابوية وراها سمعنا خطبة الجمعة واتوجهنا للبيت وادغدينا والعصر اني اتوجهت لشغلي .
================================
مينا :- مر شهر واني بعدني على نفس لحاله وكلشي متغير بيه رجلي وايدي مكسرة وحالتي النفسية صفر الشي الوحيد اَي تغير بدال العربانة جابولي عكازه وبابا بعده زعلان عليه ولا صديقة سألت عليه ولا احد من المدرسة اجوي عليه معقوله هذا الحقد والكره والغيرة هيج تسوي لدرجة يسمعون بيه مكسرة ولا وحدة تتكلف وتجي تزورني مع كل الأسف .....😔 وكمت بعد ما اهتم بشي لان حياتي فقدت ألوانها وحتى المدرسة ما اكدر اروحلها الحمدلله والشكرعلى كل حالي بس رغم كل هذا امي مداريتني ومهتمه بيه كلش وتسولف ويايه وكلشي تسويلي بحيث متريدين احس انو اني بيه نقص . وخالتي بين فترة وفترة تجينا وخوالي هم وتصير لمه عائلية حلوة .
(أمّي ياقمراً باهراً أنار الدرب من عثراتي.)
الجمعة الساعة 10:30
لمى :- مينا .. مينا .. يلا كعدي ماماتي ... يلا اليوم جمعة والصلاة على محمد ..
مينا :- اَي ماما كعدت .. صباح الخير
لمى :- هلا حبيبتي صباح النور ... يلا كومي غسلي وتعالي تريكي
مينا :- اَي كايمة بس ناوشيني عكازاتي
لمى :- اَي حبيبتي هاج .... أجي اساعدج ؟
مينا :- لا ماكو داعي تعودت .. انتي روحي نزلي هسة اكمل واجي
لمى :- متأكده ؟!
مينا :- اَي متأكدة ..
لمى :- لعد يلا انتظرج
مينا :- اوك
كلت يا الله وكمت ودخلت للحمام وغسلت وطلعت بعدين نزلت من الدراج
مينا :- صباح الخير
الكل ما عدا بابا :- صباح النور
كعدت على الميز وياهم واكلت بلا نفس جان بابا يكول
حجي توفيق :- بنتي لمى من تكملين ريوكج طلعيلي دشداشتي البيضة لان راح اروح للجامع
لمى :- اَي يابه تدلل
بعدين جان يكوم من مكانه وراح للحمام وامي كامت جابتله الدشداشه سبح واتوضى
حجي توفيق :- رايدين شي راح اروح للجامع
بيبي :- لا الله وياك وقبل الله صلاتك
حجي توفيق :- اجمعين يلا مع السلامة
الكل :- الله وياك
.
.
وراها اخذت عكازتي ورحت للهول ضليت كاعده وامي تنظف وبيبي تقرأ قرأن واني افكر بوضعي وحالي ..... صار الظهر ودخل بابا وجان نصب غدة ومن كعدنا جان يكول :-
حجي توفيق :- عيني حجية
بيبي :- ها عيوني
واني صراحة جتني الضحكة وما تحملت كمية الرومانسية
حجي توفيق :- ها يابه شبيج تضحكين لازم ما عاجبج
مينا :- لا عاجبني .... وسكتت
حجي توفيق :- اَي اكمل السالفة .... اليوم شفت ابو احمد جيرانا ....(واشر بعيونه عليه) ... وكلش تعذر وتأسف وخطب مينا مني واني كتله هلا بيكم
مينا :- طبعا اني انصدمت من الي كاله جدو لان حالتي نهائيا متسمح بالخطوبة وبنفس الوقت فرحت لان احمد طلع كد كلمته وصدك خطبتي ومضحك عليه
أما لمى والحجية :- انصدمو ولمى كالت :- خطبهاا والله ما اعرف شكول يعني بنتي حتصير عروس وافرح بيها
أما بيبي :- اَي شكو بيها والله وصحيح طلع رجال وخطبها مو مثل هاي الشباب الي يلعبون على البنات مو صح وانت حجي شدكول
.
حجي توفيق :- اَي والله صحيح وصراحة اني تغيرت نضرتي عليه وطلع خوش ولد . يلا الحمدلله ... وكام من الميز وغسل وراح كعد بالهول
.
اني هم كمت وغسلت ورحت كعدت يمه لان أريده يسامحني بعد ما أتحمل زعله عليه وجان اكول
مينا :- بابا اريد احاجيك بشغلة
حجي توفيق :- اَي بنتي كولي
اني كبل انفجرت بجي لا إراديا
مينا :- بابا ارجوك سامحني والله ما قصدي ازعلك بابا والله اني احبك وما أتحمل زعلك
حجي توفيق :- زين اذا انتي تحبيني ليش هيج سويتي
مينا :- بابا والله طايشة وما فكرت اني اعترف ان اني جنت انانية وما فكرت بس شسوي 😭😭... بابا اترجاك سامحني
حجي توفيق :- يلا بابا لتبجين مسامحج اني وحظني .. بابا يعني اني لو ما اخاف عليج ما اسوي هيج يعني انتي شتتوقعين اني اذا احد جاب طاري شرفج اسكت .. واني عرفته هذا الولد صحيح طلعت نيته صافية لان دز ابو وحاجاني بالموضوع وخطبج ... زين بابا حاجيني بصراحة انتي توافقين على الخطوبة ؟!
مينا :- طبعا اني ردت اموت من الخجل .... وسكتت ما عرفت شجاوب
حجي توفيق :- هااا مبين السكوت علامة الرضا ... اني ضحكت ... زين ودراستج ..؟؟
مينا :- بابا اني هو هذا شرطي يخليني اكمل دراستي
حجي توفيق :- يلا بنتي ... الله كريم ..
=====================================
والى هنا وينتهي البارت وانتظروني بارت جديد واقوى .. وأتمنى تصوتون وتنشرون القصة بس مع وجود اسمي ... مع تحياتي الكم
#احبكم