محمد:( لحدي اسي م عرفتا ااي خيط يوديك ل امك او اهلها?)
مصطفي:( لا.. مشيت بورسودان كم مره فتشتا و سالتا بس م لقيت ليهم ااي اثر.. م عارفها حيه وله ميته.. حاموت لو لقيتها ماتت بدون م اشوفها.. حاموت والله)
محمد:( ربنا يجمعك بيهم ي رب و تلقتها )
مصطفي:( ي رب)
سكتو مسااافه.. فجاه مصطفي قام وقف بسرعه..
مصطفي:( يلا ي محمد عازمك علي اكله م حصل)
محمد وقف:( اكلك ده انا م بتطمن ليهو)
مصطفي ضحك:( يلا معاي بس)
و شالو شنطهم و طلعو من الميدان.. ركبو عربيه مصطفي و اتحركو.. مشو مطعم و جابو ليهم طلب كوارع..
محمد عاين للاكل و ضحك:( دي عزومتك اسي?)
مصطفي:( مالها الكوارع ي باشا.. احلي اكله..اكل اكل)
محمد ضحك:( كويس كويس) و بقي بياكل...
محمد:( ي مصطفي انا عايز شغل ب دوام مسائي)
مصطفي عاين ليهو باستغراب:( ليه?)
محمد:( عشان اقدر اكفي المصاريف حقت البيت)
مصطفي:( ي محمد قلتا ليك مصاريف بيتكم علي)
محمد:( لالا م ينفع)
مصطفي:( ليه يعني?)
محمد:( م ينفع م ليك ذنب في اي شي .. اسي لو انت داير تساعدني بس شوف لي شغل)
مصطفي:( طيب بشوف ليك)
محمد:( طيب)
مصطفي واقف في البلكونه حقت غرفتو بشرب في سيجائر لقي ساره جات داخله البيت مصطفي استغرب و عاين في الساعه في التلفون لقاها عامله9 و نص.. مصطفي نزل سرعه لاقي ساره في نص الصاله..
مصطفي:( كنتي وين ي ساره?)
ساره بخوف:( كنت بقرا مع صحبتي)
مصطفي كورك:( صحبتك منو و قرايه شنو لحدي 9 و 10 بليل?) و مسكها من يدها..
ساره:( مصطفي فكني انا كبيره م شافعه عشان تحاسبني كده)
بكوراكهم جات نازله اميره..
اميره بخلعه:( في شنو ي مصطفي?)
مصطفي:( ساره يدوب راجعه شوفي الساعه كم)
اميره:( هي استاذنت مني و انا اديتها الاذن)
مصطفي:(م ينفع تتاخر كده)
اميره:( ساره امشي غرفتك)
ساره مشت علي غرفتها و هي زعلانه و قالت في نفسها( متخلف و معقد و رجعي)
اميره ربعت يدينها:( مصطفي م ليك دعوه ب ساره..انا و ابوها عايشين انت م ليك حكم عليها)
و مشت خلتو واقف زعلان...
واقف عز الدين قدام اميره..
عزالدين بزعل:( م ليك حق تتكلمي مع مصطفي كده)
اميره:( انا بعرف اربي بتي كويس هو م يتدخل)
عزالدين:(لا يتدخل دي اختو )
اميره كوركت:(لا ي عزالدين م بسمح ليك ولا ليهو انكم تشاكلو بتي او تتكلمو معاها كده..كلم ولدك ده.. يشوف نفسو و م ليهو دعوه ببتي) اميره طلعت من الغرفه زعلانه..
عزالدين قعد في السرير ساكت م عارف يقول شنو..
مصطفي لقي ل محمد شغل في مكتبه من 5 مساء لحدي10 بليل.. محمد م قال لي اشتغلتا دوام تاني بس بقي م بجينا الا الجمعه .. زمان بجي من الشغل او المساء.. ركزتا ل غيابو بس م سالتو..
سامي و علياء عايشين براهم في السودان.. اهلهم في السعوديه.. سامي بقرا في الجامعه في اخر سنه..عليا۽ اكبر من سامي ب 3 سنه..
سامي قاعد في المطبخ بياكل الباب دقي.. قال في نفسو دي اكيد علياء.. مشي فتح الباب لقاها سحر صحبه علياء..
سامي شافها اتخلع و اتوتر..
سحر بدلع:( سامي كيفك?)
سامي:( الحمدلله)
سحر:( الجامعه كيف?)
سامي:( كويسه)
سحر:( مالك متوتر كده?)
سامي:( ها...ماف شي.. علياء لسه م رجعت)
سحر بدلع:( طيب ممكن استناها لحدي م تجي?)
سامي:( ايوا ممكن)
دخلت و سامي وقف جمب الباب متوتر خايف زول يشوفو او علياء تجي.. سحر قعدت في الكنبه و خلفت رجل علي رجل..
سامي لسه كان واقف جمب الباب..
سحر:(م حتدخل?)
سامي قفل الباب و دخل.. جا قعد في الكرسي قصادها..
سحر :(قاعد بعيد ليه?)
سامي سكت..
سحر:( مالك خايف?)
سامي:(ماف شي)
سحر:( لا انت خايف.. في شنو?)
سامي:(الجيران لو شافوك منظرنا حيبقي كعب)
سحر:( م حيقولو حاجه انا بجي طوالي ل علياء.. بعدين احنا ساكنين قريب من بعض كل البينا كم شارع)
سامي:( برضو)
سحر:(تحب نتقابل برا?)
سامي بخوف:( لشنو? )
سحر:(نتونس ..نتعرف علي بعض.. بصراحه نفسي اتعرف عليك)
سامي اتخلع من كلام و جراءة سحر و سكت..
سحر:( عاين اديني رقم تلفونك و حاضرب ليك بكرا و نتلاقي.. تمام?)
سامي:( طيب)
سحر:( يلا قول)
اداها رقمو لمن خلص الباب دقي سامي وقف مخلوع ..
سامي بخوف:( دي علياء)
سحر ضحكت:( عادي ي سامي افتح الباب)
سامي مشي بخوف علي الباب و فتحو.. لقي علياء..
سامي:( سحر مستنياك جوه اسي جات)
علياء بفرح:( بالجد?)
و دخلت..
عليا۽ بعتاب:( ليك كم يوم م جيتيني)
سحر:(اعمل شنو كنت مع خالتي في المستشفي)
سحر قامت سلمت علي علياء و قعدت..سامي دخل المطبخ..
عليا۽:( بقت كيف)
سحر:( كويسه)
سحر قعدت جمب علياء..
سحر:( الاخبار شنو?)
علياء:( كلو تمام)
سحر:( هاني اخبارو شنو?)
علياء:( كويس الحمدلله)
سحر:( م حيعمل خطوه جديده?)
علياء:( م عارفه والله.. م قال حاجه)
سحر:( خليك منو تعال انا اعرس ليك واحد ليهو مركز و هيبه كده)
علياء( منو ده? اتعرفتي عليهو في المول برضو?)
علياء ضحكت:( لا معانا في الشغل.. جا جديد.. شوفيهو)
ورتها صورتو...
عليا۽:( لا شكرا م عايزه زول غير هاني)
سحر:( ده متزوج ي حبيبتي م حيعرسك)
عليا۽:( لا حيجي ان شاءالله)
سحر:(نشوف)
عليا۽:( طيب.. انا حاعمل قهوه)
و قامت مشت...
ماشه مرا كبيره في الشارع و شكلها وسخان و لابسه عبايه سودا و طرحه سودا و بتشحد..لونها قمحي و جسمها مليان شويه.. ماشه في الشارع بخطوات بطيئه.. كانت تعبانه من حر الشمس.. لقت رصيف قعدت فيهو و بقت تقول(لله ي محسنين...لله ي محسنين)
الناس جو مارين جمبها في ناس ادوها قروش و ناس عاينو ليها سااي و مشو..
محمد جا داخل بيتو الساعه 12 كان تعبان شديد و رقد طوالي علي السرير و وقفت سهي قدامو..
سهي:( يعني معقوله كده ي محمد? كل يوم ترجع الساعه12?)
محمد بصوت تعبان:( اعمل شنو بس?)
سهي:( ماف داعي للشغل ده.. بنمشي حالنا بشغلك القديم و خلاص)
محمد:( سهي.. عليك الله م كل يوم نفس النغمه دي...خليني انوم انا تعبان)
سهي بزعل:( حاضر ي محمد بس انت حتنوم كده? بدون م تستحما? وله تاكل?)
محمد:(اكلتا.. اكلتا.. داير انوم بس)
و غمض عيونو.. سهي عاينت لقتو لازم جزمه و شراب طلعتو ليهو و غطتو كويس و طفت النور و طلعت من الغرفه..
قاعده في غرفتي و جمبي ريم و مي بذاكر ليهم.. جا داخل ابوي..
عبدالرحمن:( ريم و مي اطلعو برا شويه)
قامو الاتنين طلعو..قلبي اكلني.. ابوي م بجي بدون سبب..
قعد في الكرسي الجمبي..
قلتا:( خير ي ابوي?)
عبدالرحمن:( صلاح بسال كل يوم عملنا شنو في موضوعو و انا شايف انك بقيتي احسن.. و بفكر نحدد العرس طوالي)
استغربتا من كلام ابوي..
قلتا:( عرس شنو ي ابوي و انا مكسره كده?)
عبدالرحمن:( كلها شهر و تفكي الجبس و تبقي كويسه)
قلتا:( ي ابوي ده كلام شنو? كيف افك الجبص و اعرس طوالي العرس ده داير حركه و مشاوير...و انا م حاقدر امشي ب رجلي دي كده طوالي.. ابوي انت مستعجل لشنو?)
عبدالرحمن:( صلاح المستعجل و خايفو يمشي يشوف غيرك و يخليك)
قلتا بزعل:( خليهو يخليني...ي ريت لو خلاني...صلاح ده بقي منو اصلا)
عبدالرحمن:( احترمي نفسك ي بت)
قلتا:( ي ابوي م ممكن كلامك ده لكن.. انا في شنو و انت في شنو?)
عبدالرحمن وقف و كورك فيني:( انتي بت م محترمه و قليله الادب و انا حاآادبك)
و طلع زعلان.. بقيت ببكي...زعلتا شديد من كلام ابوي و تفكيرو لا حسي بي لا ب اني كاسره رجلي لا اي حاجه كل همو يعرس لي صلاح و خلاص.. ابوي جافي معانا شديد و تعاملو معانا في حدود و اغلب كلامو اوامر و شكل.. عمره م حضن وحده فينا او ضحك معاها او هظر.. سمعتا صوت ابوي بكورك برا شويه هدا براهو..
تاني يوم دقيت ل محمد احكي ليه بالحصل قال لي بجيك بكرا الجمعه لانو الليله م عندي طريقه...م فهمتا عندو شنو بس مشيتو..بالمسا۽.. اللي هو يوم الخميس لقيت من الصباح سميه بتنضف في البيت و تجهز فيهو م فهمتا في شنو.. سالتها قالت لي ساي بنضف البيت.. المسا۽ قاعده في غرفتي بقرا في كتاب سمعتا صوت ضيوف جو...شويه جات جاريه ريم ...
ريم:( مريم...صلاح و اهلو جو)
لمن سمعتا اسم صلاح اتخلعتا ..
قلتاليها:( جو زياره عاديه يعني?)
ريم:(م عارفه...بس جايبين معاهم حاجات.. شوكلت و بيبسي و كده)
انا اتوترتا شديد خوفتا ابوي يكون واعدو ب حاجه..
قلتاليها:( اطلعي افهمي لي الحاصل)
ريم:( طيب)
و طلعت...بقيت متوتره شديد و خايفه.. بعد شويه سمعت سميه بتزغرد.. اتخلعتا شديد و جسمي بقي يرجف.. جو جارين ريم و مي قالو لي:( صلاح طلبك من ابوي و ابوي وافق)
ختيت يديني في راسي و بقيت ذي الزول الصابه فيهو مطره.. دموعي نزلت.. ريم و مي قعدو جمبي خايفين و زعلانين علي حالتي...شويه جا ابوي داخل مبتسم..
عبدالرحمن:(غطي راسك خطيبك جاي يسلم عليك)
نتلاقي♥
