قاعدين اميره و عزالدين في الحديقه و قدامهم شاي..
اميره:( يعني ي عزالدين عاجباك تصرفات ولدك دي?)
عزالدين:(تصرفات شنو?)
اميره:( بقي قاعد مع خيلانو طوالي و مهتمي بيهم شديد)
عزالدين:(اعمل ليهو شنو? راجل كبير احبسو? وله اشاكلو? زمان كان صغير و قدرتا اتحكم فيهو بس اسي م بقدر)
اميره:(لا بتقدر اتصرف معاهو اعمل ااي شي احنا م دايرين مشاكل بعد ده)
عزالدين:(امنه هي المشكله بس مجدي و طلال م عارفين حاجه)
اميره:(شنو العرفك انو م عارفين?اختهم اكيد حكت ليهم)
عزالدين:( لو كانو عارفين م كانو سكتو)
اميره:( انا مقلقه منهم جدا..اتفاهم مع ولدك في الموضوع ده لو سمحت)
عزالدين:( حاضر ي اميره.. حاضر)
مصطفي جا بليل متاخر م حاولتا اتكلم معاهو ابدا.. و هو كان تعبان نام طوالي..
قاعده مع علياء في الشغل بنحكي بالحصل..
قلتا:( و هاني قال شنو?)
علياء:( م قال حاجه كلنا م لينا ذنب في الحصل ده بس تاني قال لي ابعدي منها م تمشي حته هي فيها)
قلتا:( صح ..بس لحدي متين?)
علياء:( ربنا بسهلا)
قلتا:( انتي بتقنعي نفسك بآي كلام و خلاص? لازم هاني يعلن عرسكم..م تمشي المواضيع ساي كده)
علياء:(اعمل شنو?)
قلتاليها:( اتكلمي معاهو الظروف م معروفه.. احتمال ذي م. حصل بالصدفه اسي لاقيتي ناديه.. احتمال ناديه برضو بالصدفه تعرف انك مرتو...كلميهو و اعلنو عرسكم في اقرب وقت)
علياء:( طيب ان شاءالله)
قلتاليها:(ان شاءالله)
كنت خايفه علي عليا۽.. خايفاها تدخل في مشاكل مع هاني و مرتو و خايفه ناديه تعرف ب العرس قبل ما هاني يكلمها.. و تحصل مشكله و فضيحه..
نور ماسكه تلفونها و بتضرب ل حسن بس حسن م برد عليها ليهو يومين م برد عليها و هي عارفاهو زعلان و م داير يرد رسلت ليهو مسجات كتيره بس م عبرها.. ضربت ل متوكل ردا عليها..
نور:( ايوا ي متوكل....الحمدلله انت كيف? ......دايره امشي ل ناديه...م قادره اسوق ب ميمي.. ممكن ترسل لي حسن? ..... اوكي تمام.... باي)
و قفلت.. و مشت تجهز طوالي م كانت دايره تمشي ل ناديه بس كانت دايره تشوف حسن و تتكلم معاهو... بعد نص ساعه حسن دقي ليها..
حسن:(ايوا ي نور انا تحت العماره)
نور:(حاضر نازله)
و شالت ميمي و نزلت ركبت معاهو... من ركبت سالتو..
نور:( حسن انت ليه م بترد علي?)
حسن سكت و بقي ماشي..
نور:(حسن انا بتكلم معاك لي يومين بضرب ليك م بترد لي.. في شنو?)
حسن بكل جديه:(نور علاقتنا لازم تنتهي)
نور اتخلعت شديد:(شنو?)
حسن:( علاقتنا غلط و م تنفع و لازم نخلي بعض)
نور:(لا ي حسن.. م ينفع)
حسن:( راضيه لي العذاب يعني? نور والله م متحمل انا)
نور:(بس م ينفع نسيب بعض)
حسن:( ممكن اسالك سؤال? اخر علاقتنا دي شنو?)
نور:( حاتطلق من متوكل و اعرسك)
حسن:( بكل سهوله كده? تخلي العز و القروش و العربات و السواقين و تعرسي واحد ذي? م عندو شي.. بيت ساي م عندو? م بتقدري ي نور م بتقدري تنتقلي من اعلي سما لاخر ارض.. م بتقدري و اهلك م حيرضو ليك و مستحيل تحاربي اهلك و كل الناس عشاني..و بتك من حقك ابوها.. تعيش مع ابوها)
نور:( لا بحارب.. بحارب كل الناس)
حسن:( نور الموضوع م بسيط م بتقدري.. و انا ذاتي م داير اتعبك معاي و اعذبك...خليك انتي مرتاحه جدا اسي.. خليك علي كده)
نور:(بتحمل ااي شي عشانك ..اي شي)
حسن:( م بتقدري ي نور )
نور بتحدي:( بقدر)
و سكتو.. نور وصلت بيت ناديه و نزلت بدون م تقول حاجه..
