مصطفي بخلعه:( ده شنو? الجوابات دي كانت وين و جات هنا متين?)
قلتا:( دي كان برسلوها خيلانك طلال و مجدي ليك.. بس اميره كانت بتدسهم عشان م تلقاهم و لا تتواصل مع خيلانك)
مصطفي عاين لاميره بزعل:( صحي الكلام ده?)
اميره بخوف:( دي تعليمات ابوك.. م كان دايرك تتواصل مع امك الخاينه دي)
مصطفي باستغراب:( خاينه?)
اميره:(ايوا اسال ابوك و ام رجب)
مصطفي:( حاكلم ابوي يجي نشوف ااقصه دي)
شال تلفونو دقي ل ابوهو:( الو.. ايوا ي ابوي.... تعال البيت اسي ضروري.. في جوابات و حاجات انا م عارفها...تعال وريني الحاصل ده...تمام)
و قفل...قعد في الكرسي بعاين ل اميره بزعل.. و اميره قاعده متوتره و خايفه..
قعدنا استنينا عزالدين يجي.. شويه و جا داخل.. جانا في المكتب بعاين.. اول مره احس عمو عزالدين خايف.. هو و اميره كانو خايفين شديد بس حاولو يدسو الخوف ده.. مصطفي مدا ل ابوهو الجوابات..
مصطفي:( كدي وريني الجواابات دي ليه م وصلتني? ليها هنا اكتر من 5 سنه و م وصلتني)
عزالدين عاين لاجوابات و ختاها في الطربيزه و سكت..
مصطفي:(ليه الجوابات دي م وصلتني ي ابوي? ليه?)
عزالدين:( كنت بحميك)
مصطفي كورك:( بتحميني من شنو?)
عزالدين:( من امك.. من خيانتها...امك كانت بتخوني.. عشان كده طلقتها و بعدتها منك)
مصطفي:( لا الكلام ده م صح.. وين اثباتك?)
عزالدين:(اسال من رجب.. شافتها و حاضره ااي شي)
مصطفي مشي علي الباب سرعه..
مصطفي كورك:( ام رجب.. ام رجب)
جات ام رجب طالعه من المطبخ مخلوعه..
ام رجب:( ايوا)
مصطفي:( تعالي)
دخلها المكتب و قفل الباب..
عزالدين:( ام رجب...متذكره زمان لمن آمنه كانت بتخوني?)
ام رجب:( ايوا متذكره)
مصطفي:( صحي الكلام ده ي ام رجب?)
ام رجب:(ايوا شفتها بعيني)
مصطفي اتوتر شديد بقي بعاين حولو عينو وقعت علي مصحف مشي شال مصحف ختاهو في الطربيزه قدامهم..
مصطفي:( دايركم كلكم تتوضو و تجو تحلفو مصحف علي الكلام ده)
عزالدين:( انت جنيت ي ولد? داير تحلف ابوك?)
مصطفي:( انا م مصدقكم...انت شايف الكلام البتقولو فيهو ده ساهل...يلا ي ام رجب.. امشي اتوضي و تعالي احلفي اول وحده ورينا شفتي شنو بالضبط)
ام رجب اتوتر و خافت شديد..
ام رجب:(لالا م بحلف مصحف م بحلف)
مصطفي:( ليه? لو م حلفتي معناها كذابه)
ام رجب بقت بتبكي...
ام رجب:( انا م بحلف انا م بحلف م شفتا حاجه)
مصطفي:( تمام اتفصلي ي ام رجب)
ام رجب طلعت طوالي..
مصطفي عاين لابوهو و اميره و قعد في الكرسي..
مصطفي بحسم:( كدي احكو لي الحصل ده شنوو?? و عملتو في امي كده ليه?)
عزالدين و اميره سكتو ...م كانو قادرين يتكلمو..
مصطفي:( و رب الكعبه ي ابوي م تحكو لي الحصل شنو كلو والله اطلع من البيت ده و تاني م تشوف وشي ده ابدا)
عزالدين عاين لمصطفي بخلعه...و اخد نفس..
عزالدين:( حاحكي ليك...حاحكي ليك ااي شي لانو لو م سمعتو مني حتسمعو من امك)
استغربتا انو عزالدين يعترف ب خشمو.. اميره اتخلعت شديد و بتعاين ليهو م دايراهو يقول الحقيقه..
عزالدين:( انا و امك كنا بنختلف كتير و كرهتا العيشه معاها.. كان عندها دهب و عندها ارض باعتها و اشترت ب قروشها دهب.. انا قلتا ليها اديني دهبك...ابيعو و اشتغل بيهو.. بس هي رفضت قالت حتخليهو ليك انت...انا الوقت داك زعلتا منها شديد..لانو كان شغلي واقف و م عندي قروش الوقت داك دخلت اميره في حياتي و حبيتها و اتعلقت بيها و قررتا اتزوجها...يوم رجعت من الشغل لقيت آمنه معاها جارنا كان داير يشيل مويا من الحوش و هي واقفه معاهو بتتونس.. انا اتخلعتا فيها كيف تدخل راجل البيت و انا ماف شاكلتها و ضربتها و اتهمتها بالخيانه و الشيطان لعب ب راسي.. لقيتها فرصه اني اطلقها و اكون ماسك عليها زله..حاولت تبرر كتير بس م صدقتها في الاخر اديتها خيارين.. ي اما اكلم ليها اخوانها و افضحا... ي اطلقها من سكات و تخلي لي الدهب و انت...اتنازلت عن الدهب ب سهوله بس انت اصرت تشيلك بس رفضتا جدا...في الاخر مشت بدونك... ده كل الحصل ي مصطفي.. دي القصه الكنت داسيها منك كل السنين دي.. كنت عارف انك حتعرف...مصيرك تعرف.. لانو ماف شي بتدسا للابد)
لمن عزالدين خلص القصه مصطفي كان ببكي و جسمو كلو برجف.. قام علي حيلو م كان قادر يقيف الا وقفتا جمبو سندتو..
مصطفي:(كل العز ده حق امي? و تشيلو انتو بكل سهوله.. و ام حايمه في الشوارع تشحد.. م عارف اقول شنو.. م عارف)
و طلع و انا وراهو...خلينا عزالدين و اميره بعاينو لبعض بزعل..
مصطفي طلع الغرفه قعد في الكنبه و جسمو برجف خوفتا عليها شديد.. جربت عملتا ليهو عصير.. مصطفي ساكت بفكر م قادر يقول او يتكلم.. صدمتو في ابوهو كبيره شديد.. م قارد يتخيل ابوهو يطلع بالسوء ده.. م قدر يتخيل ابدا.. مصطفي قعد ساكت قريب النص ساعه و انا جمبو اصلا م قادره اتكلم.. في الاخر شال التلفون ضرب رقم..
مصطفي:( الو...كيفك? ..... الحمدلله...اسمعني البيت جاهز? دايرو الايام دي...يومين بالكتير.... نضافه بس? تمام... خلاص جهزو لي و لو في ااي شي تمو و بنتحاسب... تمام...شكرا)
و قفل..
سالتو:( بيت شنو?)
مصطفي:( بيتي.. اشتريتو زمان.. بس كنت مستني القي امي... عشان نعيش فيهو مع بعض.. و اسي جا وقتو... محتاج شويه تجهيزات.. الليله حنبيت في بيتكم و بكرا ان شاءالله حنبيت فيهو.. امي ذاتها حتطلع بكرا ان شاءالله)
قلتا:( طيب)
ناديه واقفه قدام المرايا لابسه و طالعه...جا داخل هاني الغرفه سالها:( ماشه وين?)
ناديه بمساخه:( عن نور...العيال خليهم معاك لو جيت طالع وديهم لامي)
و شالت شنطتها و طلعت..
قاعدين نور و ناديه في بيت نور...
نور بتبكي:( م عارفه اعمل شنو.. حسن خرب لي حياتي.. متوكل م حيسامحني ولا حيصدقني .. اعمل شنو بس انا اعمل شنو? م قدرتا امشي ناس امي بحالتي دي... حيعرفو في حاجه و م حاعرف اقول الحقيقه و م حاعرف اكذب)
ناديه:( اهدي ي نور شويه و بطلي بكا.. متوكل عاقل و بتعامل بعقل.. لو كان داير يطلقك كان طلقك من هنا.. م كان خلاك لسه علي ذمتو.. سفرو ده حاجه كويسه معناها حيفكر بعقل.. و ان شاءالله لمن يرجع حيكون كويس و حيتفاهم معاك)
نور:( م اظن ي ناديه.. مستحيل يسامحني مستحيل...الله يلعنك ي حسن...الله يلعنك)
ناديه:(وريتك من الاول حسن م ينفع ليك.. حته سواق لا مشي لا جا دايره تسيبي متوكل و العز ده كلو عشان حسن و عشان شبابو و عشان كلمتين حلوين بقولهم ليك... مستحيل)
نور:(م عارفه كنت حاسه اني بحبو ده كان نقص بس عشان متوكل م كان معاي...بس اول م متوكل بقي معاي و مهتمي بي انا كرهتا حسن.. و كرهتا ااي شي منو)
ناديه:( بتتحلا ي نور.. اهدي شويه.. قومي سوقي بتك و امشي ناس امك م تقعدي براك هنا)
نور:( بمشي بكرا.. الليله م قادره)
ناديه:( حتقلقيني عليك والله)
نور مسحت دموعها:( اتطمني انا كويسه.. اتطمني)
قاعد مصطفي مع امو في المستشفي.. هي قاعده في السرير و هو قاعد في الكرسي بياكل فيها..
آمنه:( كفايا ي مصطفي شبعتا خلاص)
مصطفي:(اكلي ي امي..مريم عملت الاكل ده مخصوص عشانك)
آمنه:(الله يبارك فيها.. هي م جايه م شفتها كويس)
مصطفي:( بتجي اسي مشت تطمن علي ابوها.. حتحبيها شديد ي امي.. طيبه جدا)
آمنه:( الطيبات للطيبين ي ولدي)
مصطفي ختي الصينيه بعيد و ادي امو مويا شربت..
مصطفي:( انتي حاسه انك كويسه ي امي?)
آمنه:( والله كويسه ي ولدي)
مصطفي:(الحمدلله.. حنطلع بكرا ي امي.. حتمشي بيتك)
امنه:( بيتي?)
مصطفي:(انا قبل كم سنه اشتريت بيت كبييير.. و قلتا ده بيتك.. م حادخلو ولا حاعيش فيهو بدونك.. و الحمدلله لقيتك و حنمشي نعيش فيهو مع بعض)
آمنه:(الحمدلله ي ولدي.. ربنا اكرم علينا و لما شملنا تاني.. الحمدلله)
مصطفي حبي علي يد امو.. اللحظه ديك جيت داخله..دقيت الباب و دخلتا..
مصطفي:( مريم.. تعالي)
قلتا:( السلام عليكم)
مصطفي و امنه:( و عليكم السلام)
دخلتا.. مصطفي قام مسكني:( دي مرتي الحلوه ي امي)
آمنه رفعت يدينها:( تعالي ي بتي)
و حضنتي عليها..
قلتا:( كيفك ي خالتو? حمدلله علي سلامتك)
آمنه:( الله يسلمك ي بتي.. الله يبارك فيك) و فكتني..
آمنه:( ماشاءالله حلاتك ربنا يحفظك)
قلتا:( الله يخليك ي خاله)
آمنه:( زين م اخترت ي ولدي والله)
مصطفي:( شفتي زوقي كيف ي امي?)
آمنه:( ماشاءالله)
نتلاقي♥
