دعوة للفرح

٣٦

وقفت ناديه علي الشباك طالت ب طول مناقشات ليلي مع هاني في الاخر ليلي قالت:( حاديك مهله 24 ساعه تجيب اهلك و تجيني البيت غير كده م تلوم الا نفسك)
و مشت علي الشارع انا لحقتها وقفتها عشان نوصلها..
مصطفي:( ي هاني كلام خالتو ليلي صح...انت مفروض تعلن زواجك خلاص...علياء حامل الموضوع م بتحمل ااي تاخير)
هاني:( انا م بتهدد و م حاصلهم البيت و الدايرين يعملو يعملوو)
و طلع علي العماره زعلان.. انا مسكتا خالتو ليلي و ركبنا العربيه و اتحركنا..
هاني دخل شقتو لقي ناديه واقفه ليهو قدام الباب..
ناديه بقلق:( في شنو ي هاني?)
هاني بزهج:(ماف شي)
و دخل علي الغرفه رقد و طفي النور و اتغطا.. ناديه وقفت محتاره م قادره تفهم في شنو..

قلتال مصطفي:(هاني مقوي راسو.. م حيجي يتقدم)
مصطفي:(كدي بحاول اتكلم معاهو بكرا بهداوه كده )
قلتا:( م حيسمع كلام زول...صعب شديد)
مصطفي:( ربنا يسهل الموضوع كبير و م ساهل)
قلتا:(ناديه لمن تعرف م حتقعد معاهو تاني)
مصطفي:( هي حاره كده? )
قلتا:( شديد)
مصطفي:( اسي لو اكتشفتي اني متزوج فيك حتعملي شنو?)
قلتا:( حاقتلك)
مصطفي ضحك..
مصطفي:( طلعتي مجرمه)
قلتا:(طبعا..م بفرض فيك.. مستعده اخسر ااي شي الا انت)
مصطفي عاين لي بفرح:( و انا كمان مستعده اخسر اي شي الا انتي)
و مسك يدي حبي عليها..  مصطفي وصلني لحدي الشقه فوق و مشي البيت...دخلتا اتطمنتا علي ابوي و مشيت نمتا..

ساره راقده في الارض و حاسه ب نار بتجري في جسمها و دمها و شكلها اتغير شديد و تعبانه شديد و بتبكي لا بتاكل لا بتشرب.. و مرات تاخد الادويه و مرات لا.. كرهت امجد و كرهت اليوم العرفتو فيهو..

ابوي الصباح صحي صلي و اديتو شاي و سندوتش ..رفض ياكل شرب حبه من الشاي و مشي رقد مكانو.. حالتو كانت كعبه شديد قلقنا عليهو.. محمد و مصطفي كل شويه بضربو يتطمنو عليهو.. محمد و سهي جو يتطمنو علي ابوي خليتهم معاهو و مشيت اتطمن علي علياء لانو حالتها النفسيه كعبه شديد..
دقيت بابا الشقه سامعه كوراك جوه اتخلعتا بقيت بدق بسرعه فتحت لي خالتو ليلي ..
قلتا بخلعه:( منو البكورك?)
ليلي:( ده سامي بضرب في علياء خلي يقتلها)
جربت سرعه علي الغرفه لقيت علياء واقعه في السرير و سامي بضرب فيها بقيت بحجز فيهو بس سامي قوتو كانت كبيره كنت بقول:(سامي حرام عليك.. سامي دي اختك فكها م عملت حاجه غلط.. حرام عليك)
بعد تعب قدرتا ازح سامي منها..
سامي:( والله م حاسييبك.. م حاسيبك)
و طلع من الغرفه...حضنتا علياء علي و كانت بتبكي شديد..
قلتا:(معليش...معليش.. الموضوع حيتحلا والله حيتحلا)
هديت علياء شويه و انا قلبي بتقطع عليها و زعلتا اللحظه ديك شديد من هاني و كرهتو جدا و قلتا انا حاتفاهم معاهو... قلتا ل عليااء:( انا ماشه و جايه اقفلي باب غرفتك عليك)
و طلعتا و انا ببكي علي حالتها و متوعده ل هاني م حاسيبو..
مشيت ليهو البيت دقيت الباب..  فتحت لي ناديه..
ناديه:( مريم اهلا و سهلا اتفضلي) ناديه استغربت من جيتي بس حاولت تخفيها..
سلمتا:( كيفك ي ناديه?)
ناديه:( تمام الحمدلله)
قلتا:(وين هاني?)
ناديه:( جوه ادخلي)
دخلتا طوالي..  قعدتا في الصاله..
ناديه ركزت انو شكلي كعب:( في حاجه ي مريم?)
قلتا:( لمن هاني يجي لو سمحتي ناديهو)
ناديه دخلت الغرفه و جات هي و هاني...هاني شافني و كشر لي..سلم علي ب مساخه..و قعدو الاتنين.. 
قلتا:( اها عملتا شنو في موضوع امبارح ي هاني?)
هاني:(ولا شي استنو شويه)
قلتا:( ماف وقت البت حتموت.. حرام عليك)
ناديه باستغراب:( دي منو?)
هاني بحسم:( ناديه ممكن تعملي لينا عصير)
ناديه:( حاضر ) و قامت مشت..
هاني بصوت واطي:( انتي شنو الجابك هنا?  انتي جنيتي?  انا وريتكم العندي.. امشي من هنا و انسي الموضوع ده)
قلتا:( خايف مرتك تعرف?  و م خايف علي علياء و الحاصل عليها? امها و اخوها ضربوها و حالتها كعبه)
هاني:( انا م لي دعوه انا وريتكم الحاصل كلو.. مريم اطلعي امشي و اوعو زول فيكم يجي هنا تاني)
كوركتا:( لا م بمشي و م حاسكت ي هاني)
و وقفنا علي حيلي..
هاني:( انتي كيف تتكلمي معاي كده و تعلي صوتك علي)
قلتا:(لانو انت اناني و م شايل هم غير نفسك و مرتك...و البت الرميتها دي و الولد الفي بطنها يمشو وين?  انت ليه اناني كده)
بكوراكنا جات ناديه مخلوعه..
ناديه:( في شنو ي جماعه?  في شنو ي هاني?)
هاني:( ماف شي ي ناديه ادخلي جوه)
ناديه:( مريم في شنو احكي لي)
قلتا:( اصلا حاحكي ليك)
هاني:( اسكتي ي مريم)
قلتا:( م بسكت م بخلي حق صحبتي)
ناديه باستغراب:( صحبتك منو?)
قلتا:( راجل ي ناديه متزوج فيك و متزوج علياء صحبتي)
ناديه اتخلعت شديد بقت بتعاين فيني و في هاني..
هاني قعد و ختي يدينو في راسو...
ناديه قعدت في الكرسي..
ناديه:( انتي بتقولي في شنو?)
قلتا:( ده الحاصل و اسي علياء حامل و راجلك رافض يعلن الزواج.. و علياء اهلها ضربوها و حالتها كعبه شديد و راجلك بكل برود م داير يعترف ب العرس او الولد الفي بطنها)
ناديه ختت يدينها في راسها و دموعها نازله م قادره تتكلم..
هاني:(خلصتي خلاص? ارتحتي? )
قلتا:( ااي و م حاسيب حق علياء...م حاسيبو)
و شلتا شنطتي و طلعتا بسرعه..

قاعدين محمد و سهي مع ابوي في الغرفه..  سهي بتحاول تاكلو و هو رافض..
محمد:( ابوي.. مالك? في شنو? اتكلم)
عبدالرحمن م برد..
محمد اشر ل سهي تطلع برا..  سهي ختت صينيه الاكل و طلعت..
محمد:( ابوي عاين لي هنا.. انا محمد...ولدك ي ابوي...احكي لي في شنو? )
عبدالرحمن بعاين بعييد و م برد..
محمد لفت ابوهو ب يدو..
محمد:( عاين لي في وشي)
عبدالرحمن عيونو جات في عيون محمد.. عبدالرحمن دموعو نزلت..
عبدالرحمن:( اعفو لي...اعفو لي ي اولادي.. انا ظلمتكم)
محمد اتخلع من منظر ابوهو و دموعو.. محمد مسك يدين ابوهو حبي عليها..
محمد:( عافين ليك ي ابوي.. والله م زعلانين منك.. بس انت قول لينا في شنو?  مالك مع سميه? زعلتك في شنو?)
عبدالرحمن:( م تجيب سيرتها دي كلبه اوعي تجيب سيرتها علي لسانك)
محمد:( ليه عملت شنو?)
محمد مدا يدو مسح دموع ابوهو..
عبدالرحمن:( الله يلعنا.. الله ياخد لي حقي منها)
محمد:(احكي لي حصل شنو?)
عبدالرحمن سكت..
محمد:( احكي لي ي ابوي.. طمني عليك.. احنا مقلقين عليك شديد)
عبدالرحمن سكت...
محمد:( احكي ي ابوي)
عبدالرحمن:( خانتني.. لقيتها في شقه مع واحد.. شفتها ب عيني دي.. شفتها ب عيني)
عبدالرحمن دموعو نزلت...محمد اتخلع شديد.. و حضن ابوهو عليهو.. محمد كان مصدوم شدييد...اتخيل ااي حاجه من سميه الا انها تخون ابوهو.. محمد م قدر يتكلم ولا يواسي ابوهو ولا يقول اي حاجه...كان محتاج زمن يستوعب الحاصل..

ناديه خاته شنطتها و بتلم في هدومها في الشنطه و دموعها نازله..  هاني واقف جمبها..
هاني:( ناديه ممكن نتفاهم...ممكن تهدي تهدي شويه..  ناديه اسمعيني بس و افهمك الحصل)
ناديه كوركت:( تفهمني شنو? خيانتك?  تفهمني شنو?  انك عرستا و مرتك اسي حامل ? تفهمني انك خونتا ثقتي فيك?  خساره ثقتي فيك .. خساره)
هاني:( ناديه بس دقيقه نتفاهم اسمعيني)
و قرب منها داير يمسك يدها ضربتو ب يدها في صدرو..
ناديه:( اوعي تلمسني م دايره اسمعك.. م دايره اسمع منك ااي شي...دايراك بس تطلقني)
و شالت شنطتها و طلعت و هاني وراها..عيالها كانو قاعدين في الصاله مستنينها ساقتهم و طلعت.. هاني بحاول يوقفها انها تسمعو بس م رضت ..طلعت و قفلت الباب وراها..  هاني قعد في الصاله زعلان شديد..

حاضنه علياء علي و بهدي فيها و حكيت ليها الحصل..
علياء:( كده حيزعل ذياده)
قلتا:( خليهو يزعل.. مش كان خايف علي مرتو اهو كلمتها.. نشوفو حيعمل شنو)
علياء:( كده م حيجي البيت)
قلتا:( مصطفي قال حيمشي يتكلم معاهو.. ان شاءالله يوافق..  ان شاءالله)
علياء اتطنت ب كلامي..  خليها و طلعتا.. لقيت خالتو ليلي بتصلي في الصاله قعدتا جمبها استنيتها لمن خلصت صلاه..
قلتا بابتسامه:( حرما ي حجه)
ليلي:( جمعا ي بتي)
قلتا:(ي خالتو انا مشيت اتكلمتا مع هاني و كلمتا مرتو انو معرس و خليتو و جيت.. ب كده كسرنا حاجز انو مرتو م عارفه و خايف عليها.. بس هو يمكن يزعل و يعاند شويه.. بس مصطفي حيمشي ليهو بكرا و حيتكلمو مع بعض و ان شاءالله بتتحلا)
ليلي:( ي ريت ي بتي ي ريت.. انا خايفه علي ابوها لو عرف ممكن تحصل ليهو حاجه)
قلتا:( لالا م حيعرف الحاصل ده حيعرف انو في واحد كويس متقدم ل علياء و مستعجل و حتضطرو تعقدو ليها طوالي.. و بعدها ربنا بحلها)
ليلي:( ان شاءالله)
قلتا:( يلا دايراك تروقي شويه كده و م تزعلي و كل حاجه ليها حل)
ليلي:( اروق كيف بس مع الحصل ده)
قلتا:( حيتحلا ان شاءالله)
ليلي:( ان شاءالله)
طمنتا خالتو ليلي و انا اصلا م كنت عارفه الممكن يحصل شنو بس كلامي معاها كان قوي و بثقه و خلاها تطمن شويه...

نتلاقي♥