كان يا مكان

سكينة قلبي ❤

#كان_يا_مكان
الحلقة ( 1 )
محمد مالك
من وحي الخيال

( اي حد متابع ليا وواثق في روايتي متفوتش الرواية هادي اني بروحي قاعد مصدوم كيف قدرت نألف تحفة فنية حاسها الرواية الاقوة ليا وخصوصا الاحداث الي فيها وحتكون فريدة من نوعها وتحمل عبرة كبيرة كبيرة ومتفوتهاش نصيحة مني ليكم هكي
)
متنسوش تاقاتكم
.
.
.

اهلين اسمي طاهر مواليد 1992 متخرج طب اسنان
بس بطالة منخدمش
اني مغرور ايه هوا في حد يقول علي روحه مغرور ايه اني مغرور علاش بنكذب حتا في العلاقات ومواضيع الحب فاشل مفيش علاقة ولا خطوبة واني سبب في تدميرهاا عندي مشكلة نشوف في ناس اغبياء ومش كيفي حد بس الحياة تعطي في دروس قااسية هلبا تعالو اسمعو حكايتي من الاول للاخير

كان يا مكان .....

اني طاهر/ الو مصطفي

مصطفي/ ايوا صباح الخير اليوم ناشط ما شاء الله بكري بكري نايض

اني / صباح الخير ايه بكري اليوم

مصطفي / كنت بنتصل بيك لكن قلت اكيدة راقد شن تمشي معاي الكلية سايرني ع رحمة والديك

اني/ يا راجل تبي تعاكس انتا ولا ماشي بتقراء

مصطفي/ ع سريع يا برو بناخد الشيت من ولد بننسخه وتم الموضوع راه محصل فلوس اني يا مفلس نعزمك ع مكياطة بعدين

اني/ ه الحاجة المقومة الي عازمني عليها مكياطة

مصطفي/ غير بتمشي ولا لا بالتريس

اني/ اخطم عليا يا تاعب

مصطفي/ احلي صديق من توا لغدوا

اني/ ههههه مختش

سكرت منه

ومشيت لبست سورية بيضاء وسروال جينز ودرت شعري ولبست النظارات

ونزلت

امي/ حي صباح الخير علي وليدي نايض بكري اليوم

طاهر/ صباح النور تقول اول مرة انوض بكري

امي/ امتا نشوفو فيك يا راقد يا معا جماعتك

طاهر/ به خلاص من اليوم حتشوفوني

امي/ اااه يا ولدي ااه

طاهر/ خيرك ؟؟

امي/ سلم ولدي الغالي نبي نفرح بيك ليش كل ما نخطبلك تجي تشكي وتقولي ولدك متكبر نقدرش نعيش معاه ليش رافض

طاهر/ توا عرفتي علاش معاش تشوفو فيا

وطلعت قدام الحوش استنيت 5 دقائق وجي مصطفي

طاهر/ السلام عليكم
مصطفي/ وعليكم السلام اركب هيا

طاهر فتح الباب * بسم الله