كشف حقائق
متابعيني وحبايبي 😊😊
غلسوا عالسحك البارت انكتب بسرعه قياسيه😵
وتره عادي اذا اروح لاهلي وما عدهم نت وما اكدر انزل الكم 😎😎لا تدعون عليه اشرار زاعليتكم🤨🤨
.........
لمى:
كاعده بطارمة البيت والبنات حواليه وهشام عيونه الف سؤال بيهم اجا باتجاهنا وخزرته تنذر بشر وخطواته كانها طبول الحرب تدق على بلاط البيت وصل النا بسرعه وعزم ودنك الي رفعني وكفني مقابيله سؤال واحد كان نزل كل نقطة دمع متجمعه بعيني
-شبيج ؟؟؟
اني انخذلت ما اعرف اجاوبه لان اصلا توقيت دخوله كان بوقت ما توقعناه...فاتن خطيه ابتعدت بعيد وكفت وايدها امتدت على بطنها وكأنها تحاول تحمي جنينها او الاصح تحمي نفسها من نضرات هشام وصوفرت وما اقتربت النا
هشام يقلب بنظره بيناتنا يريد يفهم شكو وبيداء الشجاعه الوحيدة اللي كدرت تتجاوز هاللحظات
بيداء:هشام ماكو شي لماوي مشتاقه لسراج وما كدرت تسلم عليه كدام العالم
باوع بوجهي هشام ما مقتنع بس مضطر يصدك لان عمار واسعد انضموا النا يرحبون بي وبدبلوماسيتهم المعتادة خففوا من الموقف واني اكدت كلام بيداء لان بعد الامور متعقدة وادري شكواي لهشام مو حلها وانما تعقيدها
عمار:يا هلا بابو نسب تعال فوت حياك الله
اسعد:يا هلا بابو مراد تفضل اخويه ليش هنا البيت بيتك يلا نفوت للاستقبال
هشام:مشكورين
لمى:هشام عيني ماكو شي بس شويه ضايجه لفراق عمي وسراج وخطيه عمو ضعفان ومن شفته انقهرت تذكرت بابا من تمرض
هشام:الله يساعده ويساعدكم عالمرض هو اني اجيت اشوفه واسلم عليه
اجينا نريد نفوت من الباب للداخل وسراج لساه متخبل الظاهر وصياحه و صوته سبقنا ووصل بوضوح لهشام وهو يعيط على امه واهله كلهم وكفنا وهو منطينا ضهره وصوته رج الدنيا
سراج:قسم بالله لا اخذها واسكن البصرة وتحلمين تشوفيني بعد وحتى بالشارع اكعدكم وما يرف الي جفن ان ما تأدبون هاي الكلبه وانت يا احمد تسكت مرتك لا انهيها والله كواووو...... ...والله ادفنه بمكانه اللي يجيب سيرة مرتي ولكم شنو الغلط اذا اشتغلت لو شنو الصار واحتاجت فلوس تصير مو زينه وتطلعون سوالفكم الجايفه هاي عليها ولكم تطعنون بعرضي وشرفي انتو اليوم عاليكم اسوي جوه رجلي اليوم انعل .... كلكم كيفتوا من ذبينا امنا وابونا عليها ومحد منكم يرضى يشيلهم وتاليتها تطلعوها هيج وهو منو الدفع الها من جيوبكم الفلوس اشو كلها من هالجتاف شفت المرار والذل واتحملت جدكم وعصاته اللي طبعت ضهري والله لا كلكم لهججكم جلاااااب..
يطب على كتافه قوي ويلطم ويعيط امه تبوس بيه ويدفعها وحتى ابوه ما يسمع اله واللي بالبيت كلهم واكفين يتفرجون ومحد بيهم يحجي اني من شفته دموعي زادت واريد اروح عليه وهشام جرني
