التقينا صدفه بقلم شيماءالمشهداني الناشربارق العراقي

الجزءالسابع

#التقينا_صدفه
#الجزء_السابع
#بقلم_شيماء_المشهداني
#الناشربارق_العراقي
هبه ..
بعد ماطلع عمار نمت من التعب حسيت اكو هم انزاح مني من شكيت حالي وقصتي اله حسيت عندي ظهر وسند اكدر استند عليه .. كعدت الصبح باوعت من  الشباك  على الشمس وشلون بدت الدنيا تصحي وصوت العصافير ومنظر الحمام حسيت روحي مرتاحه اكثر من اي وقت مضى دعيت ربي وطلبت منه أنه مينساني وان تنحل مشكلتي ويعرف ابويه الحقيقه وكل الي صار بيه سببه إهماله قبل كلشي صح علي اعتدى عليه  لكن منو الي خلاني لكمه سهله لعلي غير ابويه هو الي شمرني عليهم وتركني وين حبه الي جان رافض الزواج ومن تزوج حتى اني ارتاح من مسؤوليه البيت تالي يذبني بالشارع ويخليني لكمه سهله لعلي ولغيره .. جان همي خالي خفت عليه كلش من خيريه اذا عرفت الاملاك كلها باسمي شراح تعمل بيه واكيد هسه هو قلق عليه ...
صارت الساعه عشره واني كاعدة انتظر ومااجا عمار وين صار .. نزلت ادور على صديقه محمد مالكيته واني بس اعرف اسمه محمد وكم شخص بهالاسم صارت الساعه ١٢ الظهر وعمار مابين لا مستحيل عمار يعوفني الا اكو شي .. طلعت من الغرفه وسلمتها ونزلت انتظر جوة بلكت يجي مرت ساعتين وهو ماكو كلت بعد مايجي اكيد صار شي ..
فتحت جنطتي بيها رقم تلفونه الي نطاني إياه وكلت خلي اتصل واشوف ليش مااجا لان هو نطاني الرقم وكال احتفضي بيه كلشي يصير ..
طلعت من المستشفى ودورت موبايل اتصل بيه ماعرفت منين اجيب .. مرت بنيه شابه وسألتها ..
ارجوج ممكن سؤال ..
اريد اتصل بموبايل شلون وين اروح اني تيهت دربي ..
مو مشكله اتصلي بتلفوني ..
اخاف زحمه عليج ..
لا اختي ماكو زحمه الله يسهل امرج ..
اتصلت على رقم تلفونه محد يرد وتالي ردت عليه بنيه شابه كالت اتفضلي ..
كتلها العفو هذا مو تيلفون عمار..
جاوبت بخشونه ..
منو انتي ..
اني .. اني .. محتاجه مساعدة منه انتي أخته مريم
لا اني زوجته ..
انصدمت هبه من سمعت بيه متزوج ..
ارجوج بس كوليله هبه  سالت عليك ..
واني حااتصل بيه مرة ثانيه ..
سدت التلفون قبل مااكمل كلامي .. انطيت التلفون للبنيه وتشكرت منها هواي وبدون شعور وإحساس كمت امشي سريع وابجي بجيت وتذكرت امي وبيبي تذكرت طفولتي الي قتلتها ناديه وابويه  .. تذكرت خالي شلون احتضني وخيريه الي ذلتني وتتامر عليه بالشغل جنت اتمنى تبتسم الي حتى مااحس بالذل بيتها وتذكرت علي الي جان يباوع عليه حتى من زرف باب الحمام وياكلني بعيونه حتى من اكل اللكمه يمهم ويحاول حتى يتلذذ باطراف اصابعي من يطلب مني شي وانطيها اله واخرها بالحيله اغاني وخدعني ودخل للغرفه من سوة صوت وحركه بالباب ودخل عليه واغتصبني ... لحد ماانهزمت من الموت واني انزف وشفته .. شالني بايده او وداني للمستشفى احتضني بحنانه او جاب الاكل كدامي جان يتوسل بيه حتى اكل ويباوع عليه بنظرة حنان ... بس يمكن ماكو شي اسمه حب الحب انتهى وراح .. وطلع متزوج ويمكن حتى عنده اطفال ..
مشيت بشارع واني مااعرف المن اروح ماكو غير اروح للبيت الي سجله باسمي خالي وأخذ الايجار منهم واكعد بفندق .. البيت جان صغير وعنوانه حافضته بس جنت اتوقع مراح الكاه بسهوله رحت المنطقه ومااندليت البيت الا رحت على دلاْل وهو يندل البيوت كلها واستغرب لان مااندل بيت اني صاحبته كتله سالفه طويله مو مال أسولفها الك او وداني هو بنفسه للبيت ..
جنت كلش تعبانه والي مريت بيه مو سهل
دكيت الباب طلعت عليه مرة جبيره من شافتني صغيره كالت  بنتي اتفضلي المن رايده ..
حجيتلها اني صحتي تعبانه وطلبت منها الايجار وكتلها اذا عندج ..
كالت اي يمه عندي ..
ماما جابت الايجار وكالت أنه خالي اتصل بيهم وكاللهم اني بعت البيت لوحده اسمها هبه ...
المرة تحجي وتباوع عليه باستغراب .. وكالت يمه بيج شي محتاجه شي ..
لا خاله اني رايحه ..
خاله عندج مكان انتي شو مبين ماعندج احد ..
الحمدلله خاله ..
تعاي ارجعي كوليلي شبيج ..
من كالتلي هيج بدون شعور انفجرت وكمت ابجي ..
خاله ابقي يمي هنا ارتاحي وباجر الصبح نسولف ..
بس خاله اريد منج شي ..
ماريد احد يعرف اني يمج حتى خالي ومنا لباجر الله كريم ..
جانت هاي المرة اسمها نوريه عدها ولد وبنات اثنين الولد متزوج وكاعد وحده والبنات هم متزوجات وكلمن حايره بيتها وجهالها البنات يزوروها بين فترة وفترة و ينضفولها البيت ..
نوريه حضرت العشه لهبه وسوتلها الجاي اكلتلها هبه لكمه بعد ماسبحت وارتاحت ونطتها دشداشه من مالات بتها لبستها جانت شويه بيها كصر بس على الاقل تكضي نومتها وهي نظيفه وبايته بمكان نظيف مابي شاب يباوع على جسمها ... ذبت روحها ونامت للصبح بدون ماتحس بنفسها فتحت عيونها باوعت على الساعه جانت عشره تعجبت هبه شلون بقت لهالوقت نايمه ..
كامت من فراشها بعد مارتبته ورجعت كل شي بمكانه لكت نوريه بالمطبخ تلكط التمن ومشغله التلفزيون وتسمع اخبار ومن شافت هبه كعدت كالتلها ها صباح العافيه شلون صرتي بنتي ..
ضلت هبه ترن بمسمعها كلمه بنتي ودمعت عيونها وكالتلها صباح النور الحمدلله خاله اني زينه ..
ياله خلي اسويلج الريوك والجاي حار على نار هادية على الچوله ..
اني اكوم ...
لا انتي تعبانه اني الهي نفسي بالشغل وبن اروح واني وحدي ..
جانت نوريه مو جبيرة بس هامله نفسها عرفت منها أن زوجها ميت مصار سنه وعايشه.بوحدة وفراغ قاتل ..
بنتي هبه احجيلي سالفتج اريد اعرفها بلكت اكدر اساعدج ..
شاحجي السالفة متنحجي خاله وعقلج ميشيلها..
ميخالف احجي اسمعج ..
حجيتلها سالفتي من يوم زواج ابويه بامي ولحد هاي اللحظه من طبيت بيتها ضلت متعجبه لسالفتي وكلسع تكول سترك ربي فدواتك استر على بناتنا شلون هم همج بنيتي اب يعوفج بوسط الذيابه صدك هاي الدنيا صارت مو خوش دنيا .. اكلت لكمه خفيفه جان ريوكهم بيض وجبن والجاي الحار نص بيضه مااكلت هبه تحس البنج بعده بجسمها والتعب ديبين عليها ركضها بذيج الليله وهي انهزمت وتعرضت فوكاها لحادث غير مجرى حياتها وحست نفسها لكن احد يحن ويعطف عليها تالي صحت من هذا الحلم بكلمه سمعتها من الي ردت بتلفونه وكالت اني زوجته ..
كطعت افكارها نوريه وكالتلها ..
هبه وين رحتي ..
لا خاله بس اني هواي اشكرج تعبتج وياي
ردت عليها نوريه وهي تلم بالمواعين وتنظف المطبخ ..
بنتي شتعبتيني وشقدمتلج اني ..
هسه خاله اني اروح واجيج نهايه الشهر علمود الايجار ..
وين ترحين ..
الله مايكطع ..
والنعم بالله بس هذا البيت ملكج وتكدرين تبقين بيه انتي صاحبه فضل عليه مو اني ..
خاله هذا البيت صح ملكي بس اني ماجرته الج مو من حقي ابقى بيه ..
بنتي اني وحدي كاعدة خليج يمي ونيس وانتي ماعندج احد تروحين عليه وبس يشوفج ابوج يمكن يذبحج ..
خاله اني مشكلتي مااكدر ابقى هنا ماريدهم يندلون بيه ...
اي محد يدري بيج وين ابقى هنا ولاطلعين ابد واذا شفتي نفسج محتاجه تطلعين عندي خمار البسه الج ونزعيه بس من تطلعين منا ...
فكرت هبه ماكو غير حل بس طلبت من نوريه كالتلها راح ابقى يمج بس بشرط ..
ضلت نوريه مستغربه على الشرط ..
كولي شعندج ..
مااخذ منج ايجار طول مااني كاعدة ..
واذا احتاجيتي فلوس اخذي مني كم فلس انتي هم يتيمه ماريد اتحمل خطيتج ونياله الي يساعد يتيم ..
هذا هو اتفقنا ..
ضلت هبه بيت نوريه وطلعت مرة وحده اشترت موبايل وخط واحتفضت برقم عمار يمكن يوم تلتقي بيه وتعاتبه لان مااجاها او وعدها ميتركها ..

مرت الايام وجانت تفكر مرات ترجع تتصل وتتردد وتكول هو تركني مااجاني ليش دااتصل بيه وانزل نفسي ..
......
عمار ..
راحت مريم للمستشفى والتقت بمحمد وبلغها أنه مشافها لهبه من اخر مرة التقى بيها ويه عمار  ..
مرت الايام ورجلي مجبره وايدي بس انتهت الالام تقريبا وبقت الغصه بالگلب والروح على هبه يمكن هسه ضلت بالشوارع تفتر وماتعرف وين تروح او يمكن ابوها لكاها واحتمال يقتلها  شلون هيج سويت بروحي واتعصبت على ازل وهي ازل ممهتمه اصلا بيه ..
مابقى عندي امل غير أنه من اكوم على حيلي اسحب خطي القديم عسى ولعل أن  تتصل بيه بعد وابقى ادور عليها حتى لو ضليت سنين مو مساله حب او مشاعر عندي اتجاهها لا لكن مساله اني نطيتها كلمه مااعوفها وهي يتيمه وجانت تحت ضحيه اب جاهل وخال عاجز وابن خال انتهك عرضها وعافها تحت انظار الناس وتساؤلاتهم الي ماترحم ..

وللحكايه بقيه..