التقينا صدفه بقلم شيماءالمشهداني الناشربارق العراقي

الجزءالخامس

#التقينا_صدفه
#الجزء_الخامس
#بقلم_شيماء_المشهداني
#الناشربارق_العراقي

عمار ...

بهاي اللحظه اتصلت بيه ازل ..
هلو ازل
هلو عمار ..
شبي صوتج ..
تعال عليه سيارتي عطلت ..
هاااا..
عمار شبيك سيارتي عطلت شنو مسمعت ..
اي اي جاي انتي وين ..
اني بالكرادة يم صديقك ابو الموبايلات ..
اوك جاي ..
رجعت للغرفه على هبه لكيتها نايمه فرحت حتى اروح وارجع لها جانت الساعه بالخمسه تقريبا العصر محسيت بالوقت وياها .. رحت على صديقي محمد او وصيته على هبه أنه يدير باله عليها وتوجهت للكرادة جانت الشوارع مزدحمه وكوة وصلت الها لكيتها مموجوده تفاجات رجعت اتصلت بيها جاوبتني ..
هلوو عمار ..
انتي وين اني واكف ..
هااا اني راح اوصل البيت ..
شنووو..
احنا مو متفقين اجيج لان سيارتج عاطله ..
مو اجا واحد وكفلي وطلعت مابيها بنزين وخلالها بنزين واشتغلت ..
غير تتصلين بيه ..
هسه شكو شصار يعني ..
الي صار عفت شغلي واجيت وانتي عفتيني ..
طبعا شغلك اهم مني انت متحبني اهم شي شغلك وراحتك اني اشوف والدي يشوف حل لموضوعنا ..
هسه اني طلعت غلطان ..
اروح اني تعبانه باي وسدت التلفون..
رجعت للمستشفى واني متعجب على تصرفات خطيبتي الطفوليه هواي تغيرت ازل بس شاسوي حبيتها وصارت خطيبتي ..
نزلت من السيارة يم مطعم واخذتلها عشه او رجعت للمستشفى دخلت لغرفتها جانت الساعه تقريبا بالسبعه ونص لكيتها كاعدة وحدها بالغرفه ..
وين رحت ..
رحت بشغله ورجعت ياله كومي ناكل اني جعت كلش ..
كامت كعدت كدامي وبدت تاكل وتاكل لكمه وتصفن . 
هبه اكلي ..
انت ليش هيج ..
شنو ليش ..
ليش دتساعدني وتسمعلي ..
اني السبب بدخولج للمستشفى شلون اعوفج واني اريد اسمع قصتج من البدايه حتى اجيبهم كدامي واحاسبهم..
بهاللحظه رن تلفوني ..
باوعت لكيتها ازل مارديت عليها ..
كالت رد خاف اهلك ..
لا مو اهلي ..
كملنا اكل وصحت على الممرضه نضفت المكان واجا محمد بهاللحظه ..
ها عمار محتاج شي ..
حمودي شوفنا احد يجيبلنا جاي ..
تدلل حبيبي عشر دقايق وهو يمك ..
باوعت عليها وهي كاعدة على سريرها عاكفه رجلها ووتكصكص باضافرها لو بايدها لو تجرها باسنانها جانت متوترة كلش وخايفه ..
ياله هبه كملي قصتج وصلنا انتي طلعتي حامل ..
ضل خالي تعبان ومرت خالي ماالها شغله بيه اني ماعفته ابد وبدت حالته تسوء كتله خالي لاتضل تفكر موزين عليك ..
وكام يبجي ويكولي بنيتي محد سواها ماسمعنا واحد يعتدي على بت خاله وهي جايه يمهم ...
صارت خالي بعد لاتفكر مو زين عليك ..
الله كريم بنتي ..
مرت خالي من عرفت كامت تلح وياي بشغل البيت بلكت ينزل الجنين .. وبيوم اتعاركت هيه وخالي وهو غلط عليها كدامي ...
كالتله الا اروح لاهلي  ...
وبدا يتصايح  هو وياها جان تلم هدومها واني اتوسل بيها ودفعتني وكالت كله منج ياصغيره البين وخالي غلط عليها وطردها من البيت لطول لسانها واخذت ميس وياها بقيت وحدي بالبيت وخالي صحته تعبانه اكله اسويه بهريز وبعد يومين من المشكله اجتي بنت خالي المتزوجه الي اصغر من علي اسمها منار..
طبت للبيت واني بالمطبخ لا سلام ولاكلام واسمعها تحجي وي ابوها وتكوله هاي امي صار لها شكد زعلانه  حتى مسالت عليها شنو مصدكت حتى خوالي زعلانين ..
خليهم يزعلون خلي يخلوها يمهم خلي تتربى من جديد خيريه ..
يابا الموضوع ميسوه ..
شرف بنت الناس ميسوه عندج بت خيريه وين اروح من رب العالمين اخوج الي سواه محد يسويه انتهك عرض يتيمه وبت اختي واذا ميجي يزوجها وهيه هسه حامل لا ابني ولا اعرفه اتبرى منه ليوم الدين وكوليلها لامج اذا عدها اتصال وي ابنها وتندل مكانه ودز فلوس اله متلوم الا نفسها اطلكها ومتصيرلي مرة ..كامت تصيح وصوتها على وي ابوها وطلعت ..
سويت الغدة وجبته لخالي وكعدت وياه اتغده
خالي ... الله يخليك خلي خالتي خيريه ترجع للبيت ..
خالي اني شعندي وياها هيه ترى من يومها هيج بس اني متحملها لخاطر جهالها بس لهنا وبس بعد كافي الحق حق احنا ظلمناج واني مابيدي شي علي ميطب البيت ولا يكعد بيه الا يعقد عليج وارتاح اني ماريد اموت وذنبج بركبتي ...
انت شنو ذنبك هو سوى الي سواه وانهزم ...
ضل خالي يفكر بيه وميعرف شيسوي وشاف نفسه عاجز عن حل مشكلتي .. واني كمت اطب لغرفتي واكمز من الجرباية حتى اسقط الجنين صح هو الشي الوحيد الي يثبت انه علي سوه الي سواه بس اني ماريده ولازم انزله ..
وبيوم اجاني خالي وكالي
اسمعي بنتي انتي ماعندج احد بهاي الدنيا بس اني ورب العالمين واني اذا متت تضلين وحدج اني سجلت واحد من املاكي باسمج بيت صغير يكفيج بس هذا مو معناه اني دااعوضج عن الي سواه ابني بيج لا بس خاف اموت واني اعرفها لخيريه تطردج هذا سند البيت وهذا عنوانه وماريد احد يعرف بهالشي بس اني وانتي..
والبيت ساكنين بيه ناس مأجريه وايجاره الج بعد .. تشكرت من خالي واخذت الاوراق وضميتها بعد فترة اجا اخو خيريه على خالي وسمعته يعرف بسالفه البيت وخالي اختصر الموضوع وياه وكال اله لاتدخل معليك انت مالي واني حر بيه ..
ومن سالته لخالي منين عرفوا بسالفه البيت  كال .. هي دتاخذ ايجارات البيوت وتنطي لابنها علي منها واني هسه وكفت كلشي بعد منين تنطييه لان وصيت اهل البيوت الي ساكنين بيهم الايجار ميسلموه لغيري وبهاي الحاله حيجي ابنها خما يضل دايح بالشوارع والبيوت ..
خيريه طول هاي الفترة كلها بقت يم اهلها ومارجعت  بس اهلها رايحين جايين علمود الاملاك والايجارات والصدمه الاكبر رفعوا قضيه حجر على اموال ابوهم وخالي ولا اهتم الهم او وكل محامي ورد الدعوى عليهم وكسب خالي القضيه وبيوم كال خالي حظري اوراقج وامشي وياي الصبح كتله وين كال معليج باجر تعرفين ..
طلعنا الصبح اني وياه او وقعوني على اوراق واخذني حتى لكاتب عدل واني ساكته ماسالته كل همي جان هذا الي بطني شلون اتخلص منه خصوصا وبدت اعراض الحمل تزيد عندي ودخلت شهر الثالث ..
من رجعنا للبيت تعبانين وجبنا اكل ويانا واحنا دناكل خالي كال ..
هبه تدرين وين رحنا اليوم وشسوينا ..
خالي اني ميهمني بس اريدك تبقى طيب وسالم الي اني ماعندي غيرك..
شوفي بنتي اني سجلت كل املاكي باسمج  ..
شلون خالي ..
اي خالو مثل ماسمعتي اني من نطيتج بيت صغير حتى يلمج خاف اموت اني ماجنت اريدج ترحين لناديه وضلمها
بس الله خلاني اسوي هيج حتى يشوفني اني وي منو عايش صح الي صار صعب علينا بس كشفت النا حقائق وعرفنا معادن الناس .. وبنفس الوقت اني اوصيج وصيه وهي امانه بركبتج ليوم الدين اني صح خليت باسمج املاكي حتى تحافضين عليهم واذا اتزوجتي واستقريتي انطي كلمن حقه بس علي دينار لاتنطيه الا اذا تزوج منج  واعترف بابنه ....
واذا مااعترف بابنه شلون الولد باسم منو اسجله ..
معليج المحامي كارته يمج هو يقوم بكل شي في حاله اني ماموجود بس اذا موجود اني اتكفل الموضوع ..
ارتاحيت من عرفت الولد الي بطني خالي يتكفل موضوعه وراح يسجله باسم احد ميعوفه بلا اسم ولا هويه ..
مرت الايام ومحد يسال على خالي بس ابنه الي مسافر بره اسمه سامر .. يتصل بيه بين فترة وفترة وعرف بالسالفه كلها وجان مراضي على اخوه وامه ..
وبيوم اني كاعده العصر بغرفتي دارتبها لان هاملتها ودانام وي خالي لان مريض ومحد يمه  سمعت الباب اندكت بقوه باوعت من شباك غرفتي وشفت الي ماجان أبالي .. ابويه وناديه بالباب انصدمت ولزمتني الرجفه واسمع خالي يكوله مو يمي راحت ويه خيريه معزومين ..
كاله ابويه .. خيريه زعلانه صار شهر يم اهلها ومحاكم انت وياها ..
هسه انت الي تريده شنو هبه موهنا ..
لعد وين ..
سفرتها ..
جان اشوف ابويه طب للبيت واني ضميت روحي جانت اكو مسافه صغيره وره الكنتور ضميت نفسي لان اني ضعفت  بسبب الحمل وكدرت اضم نفسي بيها ..
طبوا للبيت فتشوا مالكوا احد .. وطلع ابويه يصيح على خالي ويكوله اسمع سعدون بنتي اذا مارجعت الي راح ارفع دعوى خطف ..
كال اله خالي .. رحيم بنتك يمي واجتي عليه بعلمك شنو تكول خطف ..
سعدون وصلني خبر بنتي حامل .. اذا هذا الخبر صحيح ماتلوم الا نفسك..
اني ورة الكنتور ارجف من الخوف ولزمتني دوخه كوة لزمت نفسي . ..
لحد ماطلع وراح ..
خالي ضل صافن ومتعجب  على خيريه شلون تكول لرحيم  هبه حامل .. وضل خالي كاعد بالحديقة وأيده على خده  واني بدت عندي الالام ومغص بطني قوي ..
وقررت انهزم من بيت خالي لان ابويه عرف بحملي ومراح يعوفني وصرت بنظره البنت الي جابت العار لأهلها ..
رن تلفون عمار ..
رد عليها جانت ازل ..
يعني مااتصلت ولا اجيت للبيت ..
ليش اجي اني ماكتلج اجي ..
بس تعوفني زعلانه ..
انتي عفتيني وزعلانه ازل اني مفارغ لسوالفج كافي...
اجا محمد بهاللحظه وجاب الجاي بايده .. ودخل على هبه واشرتله الغرفه .. نهيت المكالمه وماجنت الكى سبب لتصرفات ازل فسرتها اني تصرفاتها هاي بسبب أهمالي الها ..
رجعت الغرفه على هبه وكتلها..
هبه هسه ارتاحي وباجر اطلعج من المستشفى ..
بس وين اروح ماكدر اروح للبيوت الي نطاني اياها خالي لان يندلون مكاني ..
حتى لو تكدرين مااعوفج وحدج تجين تسكين وياي بالبيت لحد ما الله يفرجها ..
وطلعت من المستشفى وتوجهت لبيت ازل حتى اراضيها مااحب  احد يزعل مني خاصه الي احبه ..

وللحكايه بقيه