#التقينا_صدفه
#الجزء_الثامن
#بقلم_شيماء_المشهداني
#الناشربارق_العراقي
عمار ..
مر شهر على الحادث بس بقيت امشي على عكاز لان الكسر الي برجلي مضاعف ..
اول شي سويته من طلعت رحت حتى ارجع الخط القديم وحطيته بجهاز جابته الي مريم بعد ماوصيتها تشتريلي جهاز وكالت اعتبرها هديه مال سلامتك .. امي جانت يوميه تلح عليه على موضوع الزواج لكن بعد الحادث خاب املها وجانت علامات الحزن عليها واضحه ..
وبعدها عرفت بعد مراجعتي لأكثر من طبيب أنه مااكدر امشي الا بعكاز بسبب الحادث الي سببلي ضعف العصب من جهه القدم ويحتاجلي عمليه جراحيه واحتمال وارد متنجح العمليه..
ازل بدت تنقطع نهائيا بعد ماجانت تسال مرة أو مرتين بالاسبوع كامت ماتسال ابد الا اني اتصل بيها ماحاسبتها ولا كتلها ليش هيج سويتي توقعت هي الي تجي وتعتذر وتكول اني السبب لكن جانت تحجي وياي برود اني اعرف ومتأكد هي ماعدها شي وي غيري لكن ليش هالتغيير بعد الحادث ..
قررت اروح عليها واعزمها بمكان اريد احدد مصيري وياها صح اني الي يشغل بالي حاليا هبه لكن هي خطيبتي ومو سهل عليها او عليه أن اتركها لان اكو عقد زواج بينا وجان زواجنا المفروض يتم هالشهر لكن الحادث غير مجرى الامور كلها .. .كمت اتعمد من اروح لبيتهم ماانطيها خبر اريد اعرف هيه موجوده او لا ...وهم بعدها تطلع بالليل وترجع بوقت متاخر ..
رحت للبيت دكيت الجرس عادي فتحت الباب امها وحدها بالبيت واكيد الاب مسافر لو طالع وي أصدقائه ويرجع ساعه ٢بالليل ..
هلو خاله ...
هلو عمار ..
موجودة ازل ..
هسه حتجي طبعا جانت ساعه ٩بالليل واكيد هذا هم مو وقت طبيعي لبنيه طالعه وحدها بالليل ..
اجتي ورة ساعه واكيد بعد اتصال من امها ..
هلو عمار ..
هلووو بيج ..
شعجب هاي الزيارة الغير متوقعه ..
ضايقتج ..
لا بالعكس بس ..
بس شنو ...
مامتوقعه تجي عليه ..
اعتقد انتي خطيبتي وعاقدين بقت بس مساله حفله الزواج ..
اي ..
بس اني الي اشوفه انتي صارفه نظر عن موضوع زواجنا وممهتمه وباعدة نفسج عني واتمنى اكون غلطان ..
لا بس .. اكو شي بالي
كولي .. افتحيلي گلبج ازل..
انت شوكت تسوي العمليه ..
استغربت من سؤالها وجنت ناسي موضوع شي اسمه عمليه ..
ازل .. وضحي اكثر ..
عمار اني شنو موقفي كدام العالم من يشوفوك تمشي بعكاز شيكولون اخذت واحد عنده مشكله برجله زين وصور العرس هم بالعكاز والفيديو شلون بيه ..
عمار اني بعدني صغيره والعمر كدامي لو تسوي العمليه ونتزوج وصدكني راح تكون اسعد زوج لو تتركني اعيش حياتي سعيده اني شابه ومن حقي اختار الشخص الي ارتبط بيه ..
ضليت اباوع عليها ورجعت اباوع على امها رجعت بذاكرتي ليورة انتبهت أنه ازل انقطعت عني بعد ماعرفتني مااكدر امشي الا بعكاز ..
كمت من مكاني وكتلها حقج راح يوصل الج كامل واتمنى الج الموفقيه والله يسعدج ..
يعني هذا هو مراح تسوي العمليه ...
اني مكلت مراح اسويها لكن كلت شوفي حياتج ..
يعني راح تسويها ....
اي طبعا اسويها ..
انتظرك عمار شوكت ماتسويها ..
اني اسمع أن الابتلاء نعمه لكن ماجنت اتصور هيج النعمه اعظم من الابتلاء نفسه ..
مدا افهم شتقصد ..
لوما ابتلاء رب العالمين الي وخلاني بهذا الحال جان ماعرفتج .. وجان تزوجنا وجان وكعت بابتلاء اكبر وهو ارتباطي بيج ..
عمار اني مو ابتلاء اني يعجبني اشوفك ....
اششششش
الي متوكف وياي ومترضى بيه بالشدة مااريد بيوم تكون الي زوجه واتباهى بيها كدام الناس ..
وطلعت وتركتها....
اسمع صوتها وراي ..
عمار ... عمار ..
كرهت نفسي شلون حبيت هيج انسانه بيوم شلون ردت ارتبط بيها تستعر مني ومن مرضي بعدني ماوكعت وشالتني وشلون ارتبط بيها وافكر أمن بيها تعتني بامي لو تزوجت مريم وشافت حياتها...مريم عمرها ماحبتها فعلا المرة تعرف المرة ... الف الحمدلله ماارتبطت بيها ودفعت الثمن..
حسيت براحه رغم الي صار وياي مو قليل بس جان اكو خوف بداخلي بسبب هالارتباط هذا ..
احنا الضباط مجال عملنا ممخلينا نلتقي بشريكه حياتنا بسهوله بحكم عملنا وماعدنا وقت حتى نحب ونطلع وجانت هاي النتيجه اخترت ازل وهيه مرأه بقمه الانانيه مااتذكر بيوم حظنتني او حتى نطتني مجال اني اضمها لصدري حتى بوسه مابستها بس بيوم العقد وماحسيت بيها انثارت او انسجمت وياي .. جانت كتله باردة خاليه من المشاعر المهم فلوس وطلعات وبرستيج ماينتهي وقته .. نست هي السبب الي اني بيه ..
بهاي اللحظه اتصل بيه ولد ضابط صديقي ..
هلو عمار..
هلو مراد ..
بشرني ماتزوجت ..
لا فسخت ...
هاي شنو شوكت ..
تصدك اليوم ..
انت وين ..
اني راجع للبيت ..
لك تعال سهرة تفوتك اني يم وليد كاعدين سوة ...
والله تعبان ..
لك تعال ننتضرك ..
اوك جاي ..
رجعت اتصلت بمريم ..
وكتلها اتاخر اني لايضل بالكم ..
شبيك صاير شي ..
لا تعبان وضايج رايح يم مراد ..
اتونس وفرفش مازال مجاز من تداوم بعد وين تكدر تطلع بعد .. ههه باي
باي ...
وصلت بيت مراد .. من شافوني استغربوا
جانوا ميعرفون اخباري لان هما ضباط وياي نفس الدورة مو نفس مكان العمل وضلينا نتواصل ..
حجيت الهم الي صار بيه وحتى من عرفوا الي صار بالقدم كالولي احتمال يعفوني من الخدمه لاسباب صحيه .. كتلهم مايهمني بس شي واحد ..
كالوا شنو ..
كتلهم الكى الي ضاع مني..
شنو الي ضاع ..
حجيت الهم عن هبه وعن الي مرت بيه بس ماكلت الهم أنه تعرضت للاعتداء .. كالولي من حجتلك سالفتها ماذكرت اسم المدرسه الي جانت تدرس بيها ..
لا ..
اسم الخال جان شنو ..
مااعرف بس اسمه سعدون ..
متعرف اسم ابوها الكامل .. على الاقل واحد يوصلنا للثاني ..
شلون ..
شنو شلون احنا ضباط كانه عدنا تحريات عنهم ..
مااعرف اسم ابوها بس رحيم ومرت ابوها ناديه .. بس المنطقه مااندلها ...
اسمع عمار ميفيد الاسم وحده على الاقل المنطقه .
كلشي ماعرفت منها بس جنت اسمع قصتها ..
صعب نلكاها بلكت تتصل بيك ..
طفيت جكارتي وبين المكان كله دخان كتله لمراد افتح الشباك غير جو الغرفه ..
فتح مراد الشباك واجتي ريحه التراب الممزوجه بمي المطر وكفت اشتم هوى طيب جان والمطر زاد .. وتذكرت من لاكيتها بالمطر واصطدمت بيها بسيارتي وكأنه صوت براسي صاح ... عمار المكان الي التقينا بيه ..
التفتت على اصدقائي ..
مراد ليش ماادور عليها بالمنطقه الي لكيتها بيها ..
شلون ..
اكيد هي طلعت من بيت خالها او من بيت ابوها لان اني مسمعت قصتها كامله ..
بس هم صعب ..
ماكو شي صعب لازم الكاها واثبتلها اني ماخذلتها بس الظروف جبرتني اخلف وياها ..
اني رايح هسه ..
وين عمار هسه بدينا السهرة ..
اسهروا على راحتكم ..اني باجر ابدي ادور الي ضيعته وتاه مني .. تصبحون على خير
أنت تقرأ
التقينا صدفه بقلم شيماءالمشهداني الناشربارق العراقي
Literatura Femininaفتاة تعيش اليتم بعد وفاة امها تمر بضروف صعبه من جهة زوجه الاب واهمال الاب وضروف اخرى تابعوا لتعرفوا مايحدث معها في النهايه
