التقينا صدفه بقلم شيماءالمشهداني الناشربارق العراقي

الجزءالثالث عشروالاخير

#التقينا_صدفه
#الجزء_الثالث_عشروالاخير
#بقلم_شيماء_المشهداني
#الناشربارق_العراقي              
......                 .........

قررت افاتح علي بهدوء ونحلها بالتراضي بدون مشاكل .. شفته اتغده وجان نعسان ديصعد ينام .. صعدت وراه نام على. جربايته ..  
علي اطلب منك طلب ..
كولي خير .. جاوبني وهو مخلي المخده على راسه ومخده جوة رأسه ..
اريد اطلك ..
وخر المخدة من يم رأسه واستعدل وكعد ..
هاي شنو ليش .. وهو يضحك .. باوعتله عبالك جان ينتظر احجي بهالموضوع ..
اني مااريدك بعد مااتحملك اني اتحملتك لخاطر خالي اريد حريتي ..
اي شكو بيها ماعندي مشكله ..
صدگ ..
رجع مدد ونام وكال...
اي طبعا بس اكو طلب بسيط ..
استغربت من هالطلب ..
شنو هو ..
اشكد تدفعين الي مقابل هالحريه ..
ضربت على وجهي لك شادفعلك هو اني شعندي ..

ليش شكد خله ابويه بحلكج ..
هذا حقي ماعفته اكثر من ٥سنين اخدم بيه ماعفته لحظه ..
هذا الي عندي ... ياله طلعي من الغرفه اريد  انام بالليل عندي سهرة وي جماعتي ..
يعني ماتطلگني ..
حظري كم فلس واني بالخدمه ..
كمت حظرت غراضي واخذت اوراقي وبدلت وطلعت ...
جانوا خيريه ومنار  كاعدات بالحديقة جانت الدنيا عصر والجو طيب والصيف على الابواب ..
صاحت خيريه ..
على خير وين رايحه ..
رايحه لاهلي .. رجلي يدري ..
ليش عندج اهل يلفوج انتي منو يريدج الله يرحمك سعدون هو الي ستر عليج من شمروج بالشوارع ..
الله يرحمه لخالي مات ياله ارتاح من قهرج ..
اجتي عليه وتكولي ارجعي ماكو طلعه لج ..
مو بكيفج خيريه سنين واني متحمله قهرج واكول عيب من خالي جرتني من ايدي وتكولي طبي جوة لج اخذتي كلشي من سعدون وهسه تطلعين بكيفج دفعت أيدها وكتلها ..
وخري ايدج عني سمعتي لو لا ..
ماتطلعين تبقين هنا خدامه ..
منار تكول لامها دخلي تروح لأهلها ونخلص مو من شفناها ماشفنا خير هالفگر بت الفگر..
اخذت جنطتي وسحبت ايدي ودااطلع ركضت وراي خيريه دفعتها بقوة او وكعت وصرخت صرخه قويه منار عاطت بصوتها  يوم شبيج وخيريه تتوجع وتصرخ من رجلها اني خفت اخذت الجنطه وانهزمت واسمع منار تصيح ميس كعديه لعلي بسرعه ..
ركضت بشارع شفت تكسي أشرت اله وصعدت وتوجهت لاهلي ..
جانت الجنطه بيها فلوس ابويه الي خلاها خالي اله جان كريم ويدري بابوي حاله واكف وخالي ترك خير وراه اقل شي  لكل واحد فلوس بيت وسياره ماعدا الفلوس الي بالبنگ والمزارع الي عنده وجان محصولهم وحده كافي الهم يعيشون احسن حياه بس كلهم مبذرين..   
والله بارك برزقه لان جان يساعد الفقير ..
وصلت لبيت اهلي واني ارجف فتت من يم بيت الشيخ لكيت هوسه كلت شصااير هنا شكو .. باوعت واحد عسكري جان واكف يشبه عمار بس اني جنت ابجي وعيوني مغوركه مسحت دموعي وكلت السايق اوكف ذبني يمك نزلت باوعت من بعيد عليه جانوا هواي واكفين بس من شفت العكاز .. كلت لا مو هو عمار  يمشي عدل رجله مابيها شي .. صفنت كلت يجوز مضروب وفترة يستخدم عكاز بس شيجيبه هنا .. دگ تلفوني باللحظه اني محد يتصل بيه بس علي لان محد عندة تلفون من اهلي بس ناديه وناديه متتصل بيه .. شفته علي ديتصل مجاوبته .. قفلت التلفون من الخوف
وصلت للبيت ارجف دكيت الجرس .. طلعتلي ناديه ...
هلا شعجب تذكرتي عندج اهل ..
ناديه ابوي هنا ..
لا ماموجود يجي بالليل.. لج شبيج خيرج ..
تعاركت وي علي وامه ودفعتها او وكعت يمكن انكسرت رجلها من دفعتي ..
عزا العزاج هباوي غير على كيفج ..
اسويلج شي تاكليه
باوعتلها هاي تتلوك الي ..
ناديه  هاي منج من الشيطان من شوكت حابتني ..
شلون مااحبج انتي مو بت رجلي بس كلشي اتوقع منج الا السالفه الي دكيتيها بيه مو اني امها لريم تريدين تفضحيني ..
صدك وينها ريم ..
راحت هيه ورند بيت الجوارين عندهم مرجوحه يلعبون بيها ..
ماتشتريلها مرجوحه شكو تخليها يم الجوارين ..
ابوج مو مثل قبل تعبان وكوه يجر النفس ..
انتي دمرتيه جان مثل الورد ..
اسمعي هباوي لاتضيعين السالفه .. شلون اجا من گلبج تسوين هيج وتكولين بيتي مشبوه ..
ضربت على وجهي صخام الصخمج ندو شنو هالحجي ..
اي اجوي جيش ذاك اليوم بحجه التفتيش وكالولي الي بس الحمدلله مو  كدام  ابوج البيت مشبوه شلون تسوين هيج ..
لج والله معليه مو حباً بيج لا اخاف على ابوي لايصير بي شي صح انتي غيرتيه عليه وخليتيه يذلني سنين بيت علي وخيريه بس هو ابوي والاظفر مايطلع من اللحم ناديه ..
يعني مو انتي ..
لج انتي تخبلتي صدك تحجين شلون اسوي هيج ..
بس شلون الي صار..
سولفيلي من البدايه ..
حجتلي ناديه الي صار ..
بس هذا مايدل أنه هو يعرفني وجاي عليه ..
يمعودة داخ من عرف انتي متزوجه ..
تذكرت هذا الولد الي جان على عكاز ..
كتلها اكولج ناديه هو جان ....
فتح الباب ابويه وسكتت عن سؤالي ..
شافني اتعجب وكال .. بنتي هبه شلونج ..
كمت اركض عليه حضنته وبجيت ..
شبيج يابا ..
يابا تعبت من علي اريد اطلگ ..
يااا .. صاحت ناديه شتطلكين هبه شتكول العالم علينا ..
يابا تعبت وخالي من راح ذلوني .
بنتي اتحملي المن ترجعين ..
يابا اني عندي بيت خلي نكعد بيه سوه ..
منين الج البيت خالج مو ماخذ عليج صك ..
لايابا هاي لعبه حتى مااتصرف بأمواله هو خلاهم امانه لان رفعوا عليه قضيه حجر ..
وهسه أملاكه رجعتيها لأصحابها ..
كلشي نطيت ورجعت ماعفت شي بس البيت الصغير هو الي طبعا هو مو صغير بس هو اقل بيت مساحه بالنسبه لبيوته ..
الله يرحمه ماقصر وياج ..
ولا وياك يابا هاي امانه عافها الك كال انطيها لابوج من اموت ..
ناديه ضلت صافنه على الفلوس ..
وفرحانه ..
يابا هاي الفلوس  تخليهم وي فلوس هذا البيت  لان حتبيعه اشتريلك بيت بغداد وأجره وعيش منه وي التقاعد مالتك واكعد بيتي كافي يابا انت تعبت وعندك ٤بنات ..
ناديه ضلت صافنه عليه معقوله هيج اجازيها بعد الي سوته بيه ..
كامت تبجي وحظنتني لج هبه انتي شايله هم ابوج وهم بناتي هم ..
نصيت صوتي .. بس من نكعد بذاك البيت ماريد يصير شي بعد ناديه انتي كبرتي ..
اندكت الباب بقوة ..
فزيت من مكاني ونطيت الفلوس والجنطه مالتي لناديه .. ضميهم بسرعه ..
واسمع صوت يصيح ..
رحيم افتح الباب اليوم احرك البيت عليكم ..
فتح الباب ابويه وشفت علي شايل عصا او واكف .. وينها بتك الك....  ه اليوم اموتها واكسرها مثل ماكسىرتها لامي .. ابويه لزمه بقوة وصاح لك علي المن تريد تضرب ..
ناديه لبست عباتها وفاتت من بيناتهم وطلعت تصيح بالشارع الحكونا يااهل الرحم كتلوا رجلي ... الحكونا دخيلكم ..