التقينا صدفه بقلم شيماءالمشهداني الناشربارق العراقي

الجزءالتاسع

#التقينا_صدفه
#الجزء_التاسع
#بقلم_شيماء_المشهداني
#الناشربارق_العراقي

رجعت للبيت واني امشي بهدوء حسيت نفسي راح ارتاح و لازم ابتدي بمرحله جديده من حياتي ...
وصلت البيت لكيت امي ومريم كاعدين استغربت لكعدتهم سوة بهالوقت ..
شوكاعدين ..
ننتظرك ..
مو كتلج اتاخر ...
مو كلت اذا تتأخر بعد  نكوم انام ..
امي باوعت عليه ..
ابني عمار انت هسه صرت زين شقررت شوكت تتزوج ..
باوعت على مريم وهي هم باوعتني حسيت مريم ضاجت ..
بكيف مريم شتكول ...
واني شعليه.. 
انتي اختي الجبيره..
اني ماالي علاقه بهالموضوع ..
ليش مريم ماتحجين من تشوفين شي سلبي على ازل ..
عمار هذا اختيارك ..
لا مصار اختياري بعد انتهى هالاختيار ..
امي باوعتني شلون فهمني ..
امي تعبت منها راح انطيها نص حقها وكلمن يعيش حياته ..
مريم .. معقوله الي اسمعه كالتها وهي فرحانه ..
امي حسيتها ضاجت مو على ازل نفسها ضاجت لان افتهمت ازل هي الي اتخلت عني بسبب العكاز ...
كمت من يمهم وطبيت للحمام وبدلت ملابسي واكلت لكمه وذبيت روحي على فراشي ونمت وقررت اطلع من الصبح ادور على هبه ..
كعدت الصبح غسلت واكلت لكمه وبدلت وطلعت بعد كلت لامي يوم ادعيلي ..
مشيت بسيارتي او وصلت للمكان الي لكيت هبه بيه لكيته مكان عالي يعني شارع عالي وعلى جهه نزله قويه نزلت بيها جان شارع وعر والطسات ماليته مشيت واتلفت صارت كدامي بيوت جانت المنطقه ترابيه أكثرها شوارعها ممبلطه بس الناس اكثرهم ريف استغربت الملابس الي جانت لابستها هبه من شفتها اول مرة مجانت مبينه أنه هبه جانت بهاي المنطقه ومن حجت على بيت خالها كالت عائله راقيه وعدهم املاك ... كلت يجوز خالها يحب المناطق الزراعيه خاصه وان الشط من الناحيه الثانيه والهوى الي يجي من جهه الشط هوى طيب نقي ..  مشيت على كيفي كلت وي روحي المن اسال هسه ...
لازم اسال شاب افضل شي يكدر يفهم ويقدر وضعي. .
وصلت يم شباب اثنين واكفين بالباب مال بيتهم ويضحكون وي بعضهم ..
السلام عليكم شباب ..
عليكم السلام اتفضل حول ..
نزلت صافحوني .. ولحوا عليه ادخل لبيتهم ..
دخلت لبيتهم واستقبلوني اكثر من شخص تفاجات منهم محد سال شتريد وبدوا  باصول الضيافه وياي ..
جان جبيرهم كاعد وسألني انت من ياعمام والله يحييك ..
كتلهم اني جايكم بخدمه ..
كالولي ابشر ..
كتلهم ..
اني جاي اسال على رجل بهالمنطقه بس مااعرف شي عنه بس اسمه سعدون ..
على اعتبار أنه هبه كالتلي اخر مرة جانت بيت خالها وفكرت تنهزم من ابوها .. واكيد خالها يعرفها وين لان هو الشخص الوحيد الي تأمن بيه ..
باوع عليه جبيرهم وكال ..
هواي بمنطقتنا اسمهم سعدون بس انت شتريد منه ..
صفنت شاكوله ..
اجا على بالي شي واحد ..
عندي امانه اله اريد اوصلها  .. بس اني مااعرفه بالشكل .. بس اعرف عنده ولد ٢ واحد مسافر والثاني اسمه علي ..
كال والله ياابني مااعرف احد بس يجوز اكو لازم تروح على بيت الشيخ تسال .. اكيد اذا اكو احد بهاللاسم يدليك بيه ..
تشكرت منه ومن دااطلع لحوا عليه ابقى على الغدة كتلهم طريقى طويل وكوة اترخصت  وطلعت منهم بعد مادلوني بيت الشيخ ..
مشيت واني اباوع على ناسها جانوا بسيطين وعايشين حياتهم بساطه والجهال يلعبون بالشارع ومن فتت من يمهم ياشرون ويسلمون عليه فرحانين بيه والسيارة عاجبتهم صغيره وبيضه لان جانت لاختي مريم بعد ما سيارتي اتحطمت بالحادث ..
وصلت لبيت الشيخ واستقبلوني هواي رياجيل وصافحوني ودخلت بمضيفهم جانوا لابسين الي بعمري دشاديش وكبارهم ويه الدشداشه غتره وعكال .. والي عمره ١٠ لو ١٥ سنه لابسين تراك ..
جانوا طيبين و الابتسامه متفاركهم ..
الشيخ رحب بيه وكتله شيخنا اني جايك بسالفه اريدك تساعدني بيها ..
ان شاءالله اساعدك اذا اكدر بس واجب الضيف قبل كلشي ..
وجابوا صواني الغده جان اكلهم بسيط بس الطعم مجان اكو مثله والخبز الحار واللبن اني اكلت الخبز وشربت اللبن كله لان ماكو يمنا خبز تنور الطين ولبن البقر الي ماينشبع منه ..
داروا الجاي وشربت حتى راسي يستعدل من طول الطريق والزحمه واريد بس الشيخ يكمل ويسألني لان اكدولي الناس الي قبلهم ماكو بيت بالمنطقه ميعرفه الشيخ ..
كتله شيخنا اني جيت على الله وعليك ..
كول ابني شمحتاج أن شاءالله اخدمك ..
شيخنا اني جاي على واحد بمنطقتكم اسمه سعدون عندة ولد اثنين ..واحد اسمه علي وهو الصغير والجبير مدا اتذكر اسمه يمكن ساهر سامر ..
باوع عليه الشيخ كال اكو واحد هنا اسمه سعدون ابو علي بس علي ابنه الجبير ..
كلت خاف اني متوهم وعلي الجبير ..
زين شيخنا هو صاحب املاك ..
كال لا رجل على كد حاله وعنده ٤ ولد مو بس اثنين ..
لا شيخنا لعد مو هو ..
وسألني نفس السؤال كتله امانه عندي اله وسلمت عليه وشكرته على حسن الضيافه وطلب مني ارجع اله وازوره فد يوم ..
كتله إنشاءالله ..
ودعتهم واني بكلبي غصه يمكن اني ادور ابره بكومه قش .. ضليت افتر بالمنطقه اباوع بالوجوه لحد ماحسيت بالتعب ورجعت لبيتي .. .اتصلت بمراد وكتله ..
مراد  ماوصلت على بيت خالها ..
سالت كم واحد ..
سالت جماعه ودلوني بالشيخ رحت سالته وكال ماكو احد بالمنطقه اسمه سعدون عنده ولد مسافر ..
زين وبيت رحيم ..
شبيهم ..
من سالت شكالولك ..
ماسالت ..
ليش انت وصلت لبيت الشيخ غير تسال ..
مو هي جانت بيت خالها ..
بس هيه ماكملت القصه يجوز ابوها لكاها واخذها .. 
لا جان قتلها .... لان انهزمت..
خفت لا اغلط واكوله جانت حامل من ابن خالها ..
لا ابوها يدور حجه عليها لان مرت ابوها تريد فرصه حتى تاذيها ..
لا انت غلطان روح مرة ثانيه وشوف بلكى تلكى شي يوصلك الها اسال عن ابوها وشوف ...
سديت التلفون منه وكلت راح اسال عنه يجوز الكى شي يوصلني اله ..
مرت ايام واني تعبان وضايج كمت افتر بكل مكان ادور حتى المناطق القريبه عن مكان الحادث رحت بس هم ماكو اثر ..
طبيت لسوك بمنطقتهم افتريت بيه واباوع بالوجوه ماكو اي اثر الها ..
حسيت بتعب وكلت خلي امر لهذا الشيخ واسأله على بيت رحيم ولو اني متاكد هي بيت خالها بعد ماطلعت منه ...
وصلت لبيت الشيخ وصار نفس الشي  هم لح عليه على الغدة كتله شفت نفسي قريب حبيت اسلم  ... حلف عليه اتغده اتغديت وكملت وضلينا نحجي لحد ماصارت الدنيا مغرب  وطلعت من يمه من اني داطلع راد يطلع وياي الشيخ للباب وكتله عمي ارجع اندل الطريق لان جان بيتهم جبير ومسافه طويله للباب الخارجي وصلت للباب وفتحت باب السيارة باوعت على السياره خاف اكو تاير بيه شي فات رجال سلم على ابن الشيخ باللحظه الي اني اضرب التاير برجلي واشوفه مبنچر لو لا ...
كال السلام عليكم ..
رد عليه ابن الشيخ هلا بعمي رحومي ...
التفت عليه صار وجهه بوجهي رجعت على. ابن الشيخ سالته بعد ماراح يمشي هالشخص ..
شو تكوله  رحومي ماكتله ابو فلان .. كلتها واني اضحك ...
كال مو ماعندة ولد بس بنيه .. ونوب اتزوج الثانيه هم جابتله بنيه ..
لفت انتباهي جانت هبه هالوحدة لأهلها  ...وتزوج رحيم ناديه. ...
كتله من رخصتك .. صعدت السيارة ومشيت وراه لحد ماطب بيته جان مو بعيد عن بيت الشيخ ..
يعني هبه من انهزمت والتقيت بيها جانت مهزومه  من بيت اهلها .. مو من بيت خالها شلون فاتتني جانت الكدمات من كتل ابوها ... يعني الجزء المفقود من قصه هبه هو أنه هي ماكدرت تنهزم من بيت خالها لان ابوها لكاها واخذها لبيته .. وهي انهزمت منه او ناديه سمحتلها تنهزم لان متريدها بالبيت  ..
فات شاب يمشي يطلع عمره ١٦سنه فكرت اسأله جانت بايده جكاره والظاهر يشرب جكاير بدون علم أهله كلت اسأله واتاكد يجوز صدفه اسم على ااسم ...
ياولد باوع عليه وهو مرتبك وكال ... منو اني ..
اي انت ...
اتفضل شتريد ..
هاك باكيت جكاير .. وضحكتله
اجا عليه ونطيته اله ..
تريد ثاني ...
كال اي ..
بس بشرط ...
شنو الشرط ..
هذا البيت الي كدامي ...
هااا اي هيه ...
استغربت منه منو هيه ...
انت جاي على ناديه انت تعرفها ...
اتاكدت هذا بيت اهل هبه ...
كتله لا ... بس عرفت عندة بنيه ...
اي ناديه تكتلها يوميه ...
شمدريك انت ..
كل المنطقه تعرف هبه عايشه بمرار وي مرت ابوها ....
انتبهت شنو عايشه بمرار هيه بيت خالها سنين واكيد من طلعت من المستشفى متفكر تجي لبيت ابوها لان هيه خايفه منه ..
طلعتله فلوس ونطيته واخذها..
وكتله ..
فهمني بنت هالرجال وين هسه .. 
كال ... يمه غير ...
متاكد .. 
اي ...
اني سمعت بيت خوالها ...
اي هيه اختفت والناس كالو طردتها مرت ابوها بس هسه رجعت لأهلها ....
شوكت اخر مرة شفتها... .
قبل اسبوع تقريبا ...
اسمع انت لا شفتني ولا شفتك واذا فتحت حلكك بكلمه ماتلومم الا نفسك.. واني ترى ضابط اذبك بنكرة ...
لا سيدي على بختك ... وأخذ فلوسه وجكايره وانهزم...
اتصلت بمراد وفهمته السالفه ...
كتله شلون اطلعها من بيت ابوها احتمال حتى تعذيب تعذبها مرت ابوها ...
اكولك ... انت تحبها ...
اي طبعا ...
اخذلك دوريه وطب عليهم كأنه تفتيش ومن تشوفها ورة فترة كول لابوها اريد اخطبها ...
واذا ماقبل ينطيها ...
شوفلك لعبه وخليه هو يتوسل بيك وينطيها الك ولو هو شمرها لبنته يم خوالها ليش مينطيها الك وانت ضابط ...
انت هيج تشوف ...
اي طبعا هيج ناس يستاهلون هيج يصير بيهم وانت راح تزوجها وتخلصها من هالاب ..
نهيت المكالمه وكلت وي نفسي وراح اخلصها  من عار ابتلت بيه وهي بريئه ...
وللحكايه بقيه ...