عساها ببخت كل عگال بالديوان 😞😢😔

فستان زفاف

بعد ما أنتهى مشواري وي أحمد مسحت كل صوره اله حفظتها يمي وقررت ابدي صفحه جديده
بعد موافقتي على الخطيب الجديد
قررت اوفيله واهديله كل حياتي
قصي
أنسان اجاني بوقت حرج لو يضيعني وياه لو ينتشلني من آلامي
ظليت أيام واسابيع أدعي ربي يحببه بية ويحببني بي صارت تعرقلات ومشاكل بس تغاظيت عنها واصريت على موافقتي
كنت اسهر الليل ادعي ربي يتممها على خير ويريحني
رحت للأمام علي ع والحسين والعباس والكاظم عليهم السلام
كلهم طلبت منهم ارتاح وأني وقصي نحب بعض ونكون لبعض بحلال ألله

وبعد مرور أيام
اجو أهل قصي اتفقو وي أهلي على المشيه
ومرت الأيام وصارت مشيتي

بحياتي مشايفه ولا سامعه بهيج مشيه
ساده معممين شيوخ عشائر ومسؤولين بالدوله والبيت بعد ميوسع الناس الشارع امتله
من رهبة الزلم والموقف كمت ابجي

خلصت المشيه على خير واجه وقت العقد
رادو نعقد بالامام علي ع
ورحنه هناك عقدنه
أول ما دخلت ردت أعقد كلولي الدعوه الج مستجابه أدعي ذكرت أحمد عقد بنفس المكان غصني كلبي

كمت أدعي ربي
أخذ أحمد من كلبي واملي بحب قصي
اجعلني زوجه وفيه اله
اخذ أحمد من بالي وكلبي
وارزقني حب قصي واسعدني وياه
وحبب أحمد بزوجته

ظليت أدعي الله ان انسه أحمد وأحب قصي
وبعد العقد دخلت للحضره دعيت على الشباك

وصدفه بذاك الوقت قصي داخل للحضره وداعي نفس الدعاء ان نحب بعض ونوفي لبعض
ومرت الساعات وسويت حفل
واجه قصي يمي وسوينه كل مراسيم العقد
كانت من أسعد لحظات حياتي بس مملؤه بالخوف بسبب حبي لأحمد وعدم معرفتي بقصي

من بعد العقد صار تواصل بيني وبين قصي وصارحته بكل تفاصيل حياتي
عدا طفولتي الي محيتها وعدا حبي لاحمد
سولفتله ان أحمد ساعدني وكانلي اخ وصديق
وسولفتله غدر صديقاتي وسولفتله على علي وعلى كل اتهام حصلته بالكلية وشلون أحمد وكفلي

لهنا أحب اكللكم اني زوجة قصي شرعا وقانونا
قصي الي امتلكني جسدا وعقلا وقلبا
كتبت هذه الأحداث واني ذرة حب بداخلي لأحمد ماكو
لأن كلبي حاليا ما يملك غير قصي

خطوبه قصيره وزواج سريع لكن ربي والامام علي ع استجابو دعائي
وخلوني اعشق تفاصيل قصي واعيش احلى لحظات وياه بكل تفاصيلها
وأحلى يوم بحياتي كان هو يوم زواجي
اليوم الي كنت بي أميره بالأبيض لازمه أيد الرجال الي وهبلي كلبه وامتلك كلبي
الإنسان الي يعشق تفاصيل هنادي وعشقته هنادي بكل تفاصيله
الإنسان الي وعدني يعوضني عن كل ألم مر بحياتي وكل دمعة حزن نزلت مني

الف الحمد لله والشكر
الله عوضني خير بهل أنسان

مهما مررت بظروف مؤذيه تجعلك تعتقد
لا مجال للسعادة في حياتك
انظر الى السماء وتأكد ان لك رب يقلب الاحوال من حال الى حال

••••••••••••••••••••••••••••••••••••••••••••••••

لهنا تنتهي قصتي بحزنها وفرحها
بحلوها وبمرها
لهنا طويت صفحه سوده من حياتي
وافتحت صفحة بيضه
ودا امليها سعادة وأمل وتفاؤل

لهنا أحب أشكر كل من دعالي وكل من وقف بجانبي 
وأحب أشكر وأقدم امتناني لكل شخص حس بية ونزلت دموعه وي قصتي
شكرا لتعاطفكم وسؤالكم
شكرا لدعائكم ودعمكم الي
أحبكم من كل كلبي

وآخر شي اكوله راح افتقدكم هواي
حسابي هذا راح اسلمه لصديقتي
لأن اني مسحت كل شي ماضي بحياتي وأريد اعيش من جديد
ادعولي
ولا تتاذون مني لأن راح اتركم
بس ظرفي اقوه مني
صرت بذمة رجال

وشي ثاني اعتذر من كل شخص ما رديت عليه بتعليق او محادثة او خاص
اعتذر من اصحاب القصص الي توقفت عندي
ما اوعدكم بشي
بس اذا سمحلي الظرف راح افتح الحساب وأكمل القصص من عيوني
بس اذا ما كدرت ابرولي الذمه

هنادي💗💗