ما ذنبي

7

ثاني يوم الصبح ظليت متردده اگول لامي اسكت هي حجت يمكن بسام بالشغل مااتصل اليوم
يمكن واحنا شعلينا بيه
اتصلي بيه حتى هذا موجود يجي يتغدى يمنا
شنو يتغدى يمنا هي بلوه شنو
شجونه حتى تتعودين عليه لاتظلين مهزومه منه وبعدين يوم العرس يصير صعب عليج
انشاالله ميجي هذا اليوم تعارك البارحه وياي وسد التلفون
شوكت تعاركتي وياه وليش احجي
گتلها الي كالها وردي عليه
ميصير ماما عيب هسه يكول عليج مو مودبه خابريه واعتذري عيب
مااعرف اتصل باحد هو يجي واعتذر منه
دخابريه شوفيه وين
خابريه انتي
خابرته امي جاوبها بالدوام ارجع بالاربعه العصر محتاجه شي خاله
لا خاله بس منتظريك على الغدى اول متوصل تعال علينا
كانت عطله واحنا نگعد ب١٢الظهر
سوي غدى زين اله روحي لابو رضا جيبي دجاج وسوي دولمه انتي شاطره بالطبخ
هاي هيه المهر الي دفعه راح يخلص غدى وعشى لبسام افندي
سويت الغدى وكل متقترب الساعه اربعه يصير عندي مغص
اول موصل اتصل بخالتي وكلها اني بالباب
بدون ماافكر ركضت على الباب افتح وخالتي ضحكت لاتركضين اثگلي
فتحته لباب باوع عليه ومحجى دخل سلم على امي وگعدوا يسولفون واني صبيت گعدت بصف امي وهو اصلا كان بصفها اريد اكل مااگدر ماادري خوف مااعرف ندم على الگلته
امي حجت اذا مو تعبان اخذ شجن وطلعوا
فتحت عيني على امي وهو سكت
شبيكم اثنينكم ساكتين تريدوني اگوم عنكم
لا ماما وين تروحين (گلتها بخوف وبسرعه)
خاله خليج كاعده
الجو حار برى وازدحام السوگ الناس تتحضر لرمضان
ئي روحوا تسووكو لرمضان ادري بيكم متعاركين روحو تصالحوا اني روحي خلصانه وهي الليل كله تبجي لان زعلتك وانت هسه گوه تحجي وريحه الجگاير بيك يمكن البارحه مخلصها جگاير
ضليت اضرب بامي حتى تسكت شوكت بچيت اني وهو ضل يضحك
وگال خلي يصير العصر وامر عليها اخذها وحتى هم تشتري ذهب على ذوقها
بسام
ام شجن حبابه وعدها ذوق عرفت متزاعلين وكالت طلعوا تصالحوا
بقيت ساعه امسح بالحذاء ادري شجن راح تباوع على الحذاء مو بوجهي
طلعت انتظرتها بالباب
صعدت ممخليه قطره مكياج بس لا تطلع ولد متحول بنيه
وگعدت بالطرف عبالك رايحه امتحان صعب خلي شويه اثگل عليه
شجن
طلعنا العصر اني وبسام حذائه نظيف سيارته كانت حلوه بس هو ميحجي واني مااحجي تجرات وسالته ليش ساكت
اخاف احجي اصير قليل الادب
اسفه موقصدي
ومتعرفين تتصلين وتعتذرين من البارحه لليوم تدرين انتي حتى وجهي متباوعين على طول مدنگه شجن اني احبج ومااتحمل الصد منج اذا بالج احد وامج غصبتج كولي
لا والله اصلا اكره الرياجيل كلهم
ليش تكرهين الرياجيل
لا قصدي يعني مااحب احد
فتح زجاج السياره عرفت راح يدخن واني كلش اكره الجكاير وريحتها
افتهم متضايقه من التدخين
تضوجين من الجگاير مبين عليج
لا على راحتك
احاول اتركها لخاطرج بس انتي هم اتركي الخجل شويه لخاطري
انشاالله
افترينا بكل مكان واشترينا ذهب واشياء هو اختارها وكان يعرف بالحاجات اكثر مني حتى سالته شلون تعرف هذي الامور متزوج قبل
لا ممتزوج بس اتذكر اخوي من تزوج واختي
لازم اتعرف على اهلك واكيد راح يجوون للعرس
بصراحه ميعرفون اني خطبت لان اهلي يريدون اتزوج وحده واني مااريدها بعدين اني اگلهم
لازم تكول لامي يمكن متقبل اهلك مموافقين
اني اگلها
رجعنا متاخرين باليل گلي ادخلي للبيت وياي حتى تشوفيه يمكن ميعجبج
لا مااگدر تاخرت على امي وباقيه لوحدها خطيه
هي خمس دقايق شجونه حبابه ابقي بالحديقه لا تدخلين جوى
عيب بسام الجوارين شيكولون
دخلت لبيتنا امي كانت نايمه گعدتها حتى تشوف الاغراض الي اشتريتها
وفرحت گالت مبين ابن حلال
وحجيتلها عن اهله ميدرون
كالت معليج المهم هو يريدج وبدت تحجي وياي وتفهمني لاتعلين صوتج عليه واحترميه
بقى مرات يتصل بيه ونطلع سوا ومرات يحاول يتقربلي يبوسني كنت اتهرب منه ومن عرف طبيعتي گال على راحتج بس اطلعها بيج من نتزوج
اول مره بحياتي احس بالفرح وبسبب رجال خليت التفكير بلي راح يصير بالزواج لوقتها وفتحت قلبي للحياة والحب
بدا رمضان وحدد زواجنه بالعيد امي كانت مريضه ومتگدر على الصيام ومع ذلك صامت بسام كان يخلص يمنا نفطر سوا لحد يوم سابع برمضان امي تمرضت وقت السحور دكيت التلفون على بسام

بسام الحگلي امي تخربطت فد نوب
جاي افتحي الباب
دخل شال امي دخلها بالسياره طول الطريق لو بسام ماموجود وين اروح اتذكرت حجاية امي من گالت اني خلص دوري وراح اسلمج بيد بسام
وصلنا للمستشفى محد بحال المرضى الا بالفلوس
طلعوني من الغرفه وانطوها ابر
وحجوا ويانا الحجيه عدها فشل كلوي تام ميفيدها اي شي ونسبه اليوريا صاعده بالدم
اتبرعلها بالكلى اني الله يخليك دكتور سوي شي لاتخلي امي تموت
بسام انطيهم فلوس خلي يعالجوها فدوه
كافي شجن خليها يم الله ديلگلولج موبيدهم شي وحالتها متاخره ادعيلها
بعدها دخلنا على امي شفتها بيضه وعيونها غايره ومتگدر تحجي گوه صاحت بسام وتقرب منها
وصيتك شجن لاتنسى مامبري الذمه اذا اذيتها لو ظلمتها
وبيوم من الايام راح تنام نفس نومتي هاي وتسلم روحك ل الله بالك تقابل ربك وانت ظالم شجن نظلمت هواي
خاله اطمئني اراعيها مثل روحي واكثر
صاحتني تعالي ولج حتى ماخليتيني بيوم ابوسج طافره روحج من الدنيا
يمه فدوه اروحلج لاتركيني بوستها وباستني وراحت بغيبوبه
بقت امي اربع ساعات بعدها الصبح توفت وراحت لرب ارحم الراحمين راحت للجنه كافي اجرها عند الله ان هي تولتني ولمتني وحمتني من الضياع بالوقت الي اهلي تخلوا عني
بسام هو الي راح بامي للدفن وهو الي وگف بالعزا وتحمل تكاليف فاتحتها وميمر يوم طول ايام العزا اذا ميدز عليه يشوفني
خلصت الفاتحه وبقيت لوحدي فتحت كنتورها وصفطت ملابسها اخذت وحده من دشاديشها حضنتها وبقيت ابجي لوحدي بسام اخر يوم گلي تعبان اروح ارتاح وباچر اجي عليج ردت اتصل بيه يسمعني احجيله عن امي الي ماخلفتني بس احتوتني
امي ام شجن
بعدها بسام ظل يسالني متعرفين عمامج اهلج منو عشيرتج
مااعرف احد بسام لاتسالني الله يخليك شفت احد اجى للفاتحه منين اعرفهم
اسمعي شجن مااگدر اتركج لوحدج وعيب گدام الناس ادخل لبيتكم وانتي لوحدج خلي تمر الاربعين على الوفاة ونروح للشمال نتزوج ونرجع حتى نعيش سوا
ميصير بسام يعني مااحزن على امي واروح اتزوج
ماعندي حل ثاني وكنت اتمنى هي موجوده واسوي عرس وحفله بس هذا امر الله شنسوي
بكيفك بسام لكن الناس راح تحجي علينا امها ماتت وراحت تتزوج بالشمال
واذا تبقين لوحدج واني ادخل على البيت هم راح يحجون
ننتظر هسه ونشوف شيصير بعد الاربعين
خلصت الاربعين حتى من يجيب مسواك يبقى بالباب ميدخل
وراح لجيرانه رجال كبير وفاهم حجاله الوضع كله
زوجتي وبناتي يجهزنها وسوي عشى للجوارين بثواب امها وخليها تدخل لبيتك وتزوجوا احسن مالناس تسمع مسافرين للشمال ويالفون بكيفهم
وفعلا سوا مثل مگال الرجال وحتى صاحبه الصالون اجتي للبيت ولبست كوستم ابيض وعبايه واخذني بسام لبيته وكم وحده من الجوارين كانوا حاضرين
كنت خايفه من ردة فعلي بهذا اليوم
وخدعت نفسي بفكرة نسيت وتحررت من اغلال الطفوله لكن كنت على خطا كبير