شـــهـــگـــة عـــشـــگ

الجزء الثالث

جوري:مرت الايام وبعد مشفت الولد
اروح بطريقي وارجع بطريقي اني
ورشا مالنة دخل بأحد ايامي عادي
ماشية ماكو شي جديد بس مشاكل
امي المتخلص وابوية تغير حيل
صار من الباب يجي يسلم علينة
وينطينة كلمن مصرفه ويروح لبيته
خالد تخبل وحار شحجه وية امي
بس في سبيل يفهمهة بس هي
ابد قافلة ع ابوية ومرته صارت حتى
اخوتي متقبل يطبون البيت واحنة
ممنوع نروح وهنا خالد تخبل وتعارك
وياها
خالد:شدتحجين انتي يمة ذولة اخوتي
وابوية شنووو متوصل زعطوط
كدامج وحتى البنات مالج حق تمنعيهم
وحرام عليج كاااافي لخاطر الله
متملين انتي
جوري:جنت توني راجعة من الدوام
وامي تصيح وتتعارك وظلت تدعي
ع خالة وداد والله ليردهة هي وخلفتهة
ومن هالحجي شفنة ابوية واكف
بالباب ومقهور
ابوخالد:هاي هي خلصتي ولج انتي
شنووو من بشر تدعين ع اطفال
ومرة لليوم معتادت بشي رغم
جفصتي ابطنهة والله ثم والله لو صار
بيهة لو بواحد من ولدي شي يا سحر
متلومين الا نفسج ومالي طبة الج
بعد
جوري:صدك انقهرت من امي،،هاي
هي ماما ارتاحي بعد لايوصل ولا
احد منهم يوصل عفتهة وصعدت
وخالد طلع وهو نار اعصاب
صار البيت هدوء اني بدلت ونمت
نفسي انسدت من ورة الهوسة
جنت نايمة كعدت فازة صوت هوسة
وبجي يممممة ياستار شصاير نزلت
ركض شفت امي البنات يبجن وابوية
هم يبجي خيييير بابا شصاير
ابو خالد:اخوج بنتي اخوج مكلوبة
بيه السيارة وحالتهة خطرة
جوري:شنووو بابا عفية الله يخليك
شلوون
ابو خالد:اسألي امج اليوم دعت الى
ان ملت شوفي ربج تبيش جازاها
والله اذا صار بخالد شي عمري كله
ما اسامحج
جوري:طلع ابوية للمستشفى والبيت
صار هوسة الكرايب سمعت والتموا
يمنة وامي انتهت فدمرة وخالة
وداد بجت بجي تكول ابنهة ظليت
بداخلي الوم امي صدك شكد دعت
ع خالة بحركان الكلب سبحان الله
معدى اليوم وانعكس كل الدعاء علينة
ظليت ادعي ربي يشافي ويعدي
هالمحنة لل12 اجة ابوية سانديه
بالكوة يمشي انخمش كلبي ليش
هيج حالته ركضت لعمي خييير
عموو شبيه ابوية خما صار شي
بخالد
عمي:لاااا الحمدلله مابيه شي بس
ابوج تعب
جوري:بعدنة بالطرمة جان ابوية صاح
لعمي كله وديني لبيت ام يوسف
رحت يمة بسته سلامتك بابا
ابو خالد:الله يسلمج بنتي بس
صيحيلي خالتج
جوري:طبيت صحت لخالة وداد وامي
تخبلت من سمعت رايح هناك وهم
بدت تعد ومروة عاد صاحت
مروة:كافي دخيل ربج متكوليلي
بياحال احنة وانتي ابيش حايرة
اخونة مندري شصار بيه وانتي حايرة
بعركاتج مكفاج ماما دعائج طلع
بأخوية جوزي كاااافي مو دمرتينة
جوري:امي ظلت تصيح وتغلط علينة
وكلنة كمنة من يمهة طلع الصبح
واحنة روحنة لايبة لان عمي كال
بعده بخطر الصبح ب8اجة ابوية
بالطرمة وصاح علينة طلعنة ركض
صبحنة علية
ابو خالد:بناتي الحمدلله خالد عدى
الخطر وان شاءالله ازمة وتعدي
بس حضروله ملابس وغراض الي
يحتاجهة وسووله شوربة اكل
المستشفى مينوكل
مروة:تدلل يابة بس بداعتي شنوو
حالته وشصاير وياه
ابو خالد:نزلت دموعي والله متأذية
بنتي ايده ورجله مكسورات ورجله
بعد يرادله عملية وخلوله بلاتين
جوري:شهكت يعني شنووو يمشي
لو لاااا????
ابو خالد:لااااا حاليا ع كرسي يظل
3اشهر وراها يسوي عملية والله كريم
سماء:عملية مال شنو بابا???
ابو خالد:عنده العصب مال رجله
تلفان والدكتور كال هنا متنجح هيج
عمليات ان شاءالله بس يتحسن
الكسر واسفره لتركيا انطاني عنوان
دكتور عراقي مقيم مضبوط وهو
يتواصل هم وياه ع حالة خالد والله
كريم،،،يلة فوتوا حضروا الغراض والاكل
وشفوفوا امكم  شوية واجيكم
جوري:رحت لامي وكتلهة  ع وضع
خالد كامت تدك وتلطم شيفيد
بعد الي صار صار كلنة شلنة هم
خالد وين يكدر يكعد وجماله3
اشهر لا يوم ويومين يلة الله كريم
اهم شي سالم ويشم الهوى
طبعا اني وخواتي صارلنه3ايام
غايبات عن الدوام وخطية رشا
يومية تجي تجيبلي الواجبات وهي
تحلي وتكتبلي اذا عدنه واجبات
وباليل تجيبلياهن،،،،
كعدت الصبح شفت امي والبنات
كاعدين صبحت عليهم وكعدت اتريك
سماء:جوجو بابا كال اليوم الظهر
يطلع خلود
جوري:بفرح اييي الحمدلله والشكر
ياربي والله مشتاقتله كووومة شفت
امي صافنة والدموع بعينهة تقربت
لممروة شبيهة ماما???
مروة:ابوية اجة قبل شوية واخذ
غراض لخالد كال راح يبقى يمه
بالبيت
جوري:يعني مراح يجي هنااااا???
مروة:لاااا خالد نفسيته تعبانة كلش
وعصبي بشكل وهو مقبل يرجع هنا
جوري:انقهرت ع امي خطية مهما
يكون هي ام بالاخير
مروة:خليهة بلكت تحس بغلطهة
ملينة والله من العركات وحتى ابوية
ممقصر بشي ولا مفرق بينهم
جوري:الله كريم،،كملت ريوك
وشلت جنطتي وطلعت لكيت
رشا توهة طالعة من بيتهم سلمت
عليهة وسئلتني ع خالد وكتلهة راح
يطلع اليوم كملنة الطريق للمدرسة
طلعنة للشارع
رشا:ولج جوجو شوفي منوو يم
ذيج السيارة
جوري:منوووو???
رشا:ولج حولة اشر ليكدام وهي ادور
يمنة ويسرة لججج ذاك الحلووو
العسكري
جوري:اووو رشااا يا عسكري???شفته
منتجي ع السيارة ولازم تليفونه
من شافنه ابتسم خبال اي والله
يعني هذا شوكت اخلص منه???
جريت رشا،،امشي ع السريع خل نعبر
رشا:دمشي لج تعبرينة بنص السيارات
حتى نندعم امشي خل نكمل الطريق
وبعدين نعبر
جوري:فتنة من يمه ابد محجة شي
جان مشغلة كاظم الساهر مدرسة الحب
رشا دغتني
رشا:اويلي يابة كويظم من الصبح
وعلمني حبك سيدتي شتردين بعد
جوري:دمشي امشي كويظم خربتي ابو
الرومانسية،،كملنة الطريق نضحك
ونحشش وبس تحجي بالولد
التهينة بالدوام كملنة الدروس وصار
وكت الطلعة واني مستعجلة اريد
اوصل لان راح يجي خالد
رشا:هلاااا هلااااا بكويظم العاشق
الولهان ينتظرج حبيبة
جوري:شفته نفس مكان وكفته الصبح
شلون بلة هذا وياه ولج رشا اخاف
احد عباله علينه
رشا:والله ضحكتيني ليش هو مو عليج
خاتون????
جوري:انجبي ولج يمعودة لتصير
حجاية???
رشا:الولد ساكت و واكف بحالهة
لاحجة شي ولا غلط بعد شكووو
يحجون،،
جوري:كملنة طريقنه وهم وصلنة يمنة
نفس الاغنية مشغل ورشا الطريق
كله تصجم بيه وتغني نفس الاغنية
وصلنة وكلمن راحت لبيتهة اني
طبيت ركض البيت صنطة رحت
لبيت ابوية الهوسة كلهة هناك
طبيت ركض خالد نايم بغرفة الولد
حاطيله سرير ابو نفر جبير امي
يمه والبنات وابوية والكرايب كلهة
مطشرة بالبيت وخالة وداد بالمطبخ
بوست خالد وسلمت عليه خطية
مبين عليه ضايج ومخنوك وجهة
كله جروح وركبته وايده بابا كال
هذا مال الجام مال السيارة بس
الحمدلله مو جروح عميقة التهيت
وياهم وصبينة الغدة وامي تتوسل
بية يرجع للبيت بس هو مقبل
لان غرفته فوك وميرتاح ينام
بالاستقبال واحنة كلنة غرفنة فوك
بس غرفة امي جوة بس بيت
ابوية لاااا غرفة ابوية والولد جوة
وفوك غرفتين وحدة مسويهة مخزن
وحدة هيج مفروشة للخطار اذا
احد يجيهم،،كملنة الغدة وغسلنة
الاماعين ونظفنة الهوسة واني ترخصت
تعبت اروح انام وراية قراية وسماء
هم جتي بقت بس مروة يمهم
وامي هم ظلت يم خالد،،،
خلص هاليوم عادي ماكو شيي
ومرت الايام واني يومية اشوف
هالولد بنفس مكانه يوكف ونفس
الاغنية مشغل بس ابد ميحجي شي
ولا يتحرك يعني الي يشوفه ميكول
علينة او متقصد احد بوكفته
وصار مثل التعود عندي انه اشوفه
الصبح ومن نطلع من الدوام شكد
بنات يفوتن من يمه ابد ماله دخل
بأي وحدة مرة ع مرة صرت انتبه
عليه اكثر وع ملامحه ولبسه
وحتى حركاته ورشا يومية تدعي
بلكت يحجي شي
يمعودة موتني هسة ليش واكف غير
نفتهم وهالاغنية السيدي علس من
وراه يعني ممكن يكون ديشرح
مشاعره بالاغنية???
جوري:ضحكت ع كلام رشا وفكري
سرح بالاغنية عبالك هو ديحاجيني
ورشا تحجي وتنصب علية لان
سرحت وطبعا ردت اعبر الشارع لو ما
تجرني وظلينة ع هالحال تقريبا شهر
لاهو الي بادر وحجة شي ولا الي
راح بحاله هيج بس واكف ويبتسم
هم مو بوجهي بالكاع ياحظي،،،
رغم جنت اضوج من هالسوالف
و وكفة الولد بالطريق بس وية
هالولد ما ادري ليش عجبني تصرفه
وصرت اتمنى اسمع صوته او يحجي
شي،،،
،،،،،،،،،،،،،،،،،،،،،،،،،،،،،،،،،،،،،
ركــاد:مر يومين ع اجازتي واني
افكر شلون اوصل لهالجورية بس
ما اريد اذيهة  اخر شي كلت ماكو
غير حل واحد ان اروح لبغداد واحاول
بلكن الكي طريقة اكدر احجي وياها
ثاني يوم بلغت الحجية عندي
شغل ابغداد وطلعت حجة صاحبي
راح يعرس وماعنده احد ومحتاجني
لان الكل تدري ماعندي اي شغل
ابغداد غير دوامي وثاني يوم من
الغبشة طلعت طبيت لبغداد من وكت
ظليت افتر قريب منهم حتى اكدر
اوصل لمدرستهة قبل الازدحام
وكفت نص ساعة ولنهة تجي وتكحل
عيني بشوفتهة فدوووة رحت لهالطول
بعد حيلي هي شافتني ودنكت
وكملت طريقهة جنت صدفة مشغل
الراديو وطلعت اغنية كاظم الساهر
مدرسة الحب سمعت صاحبتهة
تكولهة كويظم من الصبح ورومانسية
والله ضحكتني هالبنية عاد طخت
عندي صدك الاغنية تنفع مال اعتراف
بالحب وظليت ع هالمنوال يومية
اشوفهة الصبح والظهر نسيت
كلشي حتى روحي صارت بس شوفتهة
هي الي تردلي روحي ميهمن وحسام
كلما يدكون علية تكلهم ابغداد يظلون
يحجون تعال ارجع واعقل بس
انييي وييين بالي ولا يمهم كله
ويا هالبنية الي شلت حالي مرت ايام
واني متغير شي وياية حتى نظرة
متنظرلي شلعت كلبي شلع حرت شلون
وبيا طريقة اوصللهة الي بكلبي
عاد ملكيت غير حل ان اكتبلهة
رسالة هي يومية من تطلع تمر
للاسواق تشتري بس اني ابد ما
اروح وراها حتى لا احد ينتبه
بس هالمرة كلت اروح وراها وانطيهة
الرسالة صدك كعدت بالسيارة انتظرهة
وكتبتلهة رسالة وكتبت رقمي هم
بلكت تحن علية وتفهم وتقدر الي
بداخلي وصدك انتظرت حلتهم
شفتهة من بعيد جتي وحدهة خرب
وين صاحبتهة الصبح جانت وياها
انتظرتهة عبرت فاتت من يمي اني
سبقتهة للاسواق هي مكدرت تتراجع
لان وصلت بعد طبت وراية اني
سويت نفسي داشتري هي صارت
ع صفحة تاخذ نساتل ومن هالسوالف
شفت سحاب جنطتهة الصفح مفتوح
كبل خليت الرسالة هي حست
كبل اندارت عليه وجهة احمر من
العصبية ورافعة حاجبهة بووووية
والله عيون تكتل،،،
بس اقريهة بداعت كل عزيز ع كلبج
اقريهة ولاتذبيهة مرايد شي والله
بس فهمي الي ابداخلي ماااشي
لاتنسين حلفتج عفته واخذت عصير
وباكيت جكاير دفعت احسابهن
وطلعت ظليت انتظرهة تطلع شلون
راح ترجع وحدهة???
جوري:يممممة صخنت هذا شسوا
اوووف رشا هسة وكتج تطلعين
هذا شافني وحدي واستغلهة فرصة
باوعت منا منا همزين محد انتبه علينة
كملت مشترياتي وطلعت شفته
كاعد بالسيارة مشيت بطريقي
وصلت لفرعنة شفت سيارته بعده
كملت مشي وصلت للبيت تعبانة
ذبيت الجنطة ورحت لبيت ابوية
اشوف خلود سلمت عليهم وتغديت
وسولفت شوية وية خالد ورجعت
للبيت انام لان باجر عندي امتحان
غسلت وبدلت وكبل نمت
كعدت المغرب سماء كعدتني
سماء:جوجو راح نروح لخلود
تعاي قفلي الباب وراية وعود تعالي
ع العشة بابا كال واذا ماعدهة شي
خل تجي
جوري:لااااا كوليلة عدي امتحان اخلص
قراية واجي اكلج باقي عدنة كيك
كليجة شي???
سماء:لاااا امي كل توديه لخالة وداد
لان ناس طابة طالعة
جوري:مااااشي روحي شكليلي
ماعون واعبريه من السياج،،طلعت
ورة سماء شوية وجابتلي كيك وقطعة
بيتزا  اخذتهن وقفلت البوب وصعدت
حضرت الجدول ونزلت جنطي حتى
ابدي احضر واجباتي لباجر طلعت
الاقلام اكو ورقة جريتهة بيهة
عطر رجالي ضربت كصتي اوووو
اذكرت هاي الورقة الولد خلاها
رجعت شميت العطر فدشي يجنن
هادئ كلش فتحت الورقة الله خطه
كلش حلوووو،،، مكتوب

السلام عليكم،،
اسمي ركــاد عمري30سنة،،وتعرفين
شغلي شنووو،،،يابنت الناس صدكيني
حبيتج اول موكعت عيني عليج
وشفتج صدفة لاعبالج اني مكطع
جروبي بالمدارس الله شاهد اني مو
منا اني من العمارة،،،
من اول مو وكعت عيني عليج مدري
شصار بجالي كل تفكيري بيج مشغول
بيج شلتي حالي واني اعتذر ع الي
بدر مني اول مرة مجان قصدي والله
بس مدري شيصير بية من اشوف
عيونج وعكدة الحاجب انسى الدنيا
واهلهة ومن تخزرين احسن سهم
وبنص كلبي،،،
يابنت الناس غايتي وياج شريفة
وداعت امي بس انطيني فرصة
وهذا رقمي ارتجاج فكري وانطيني فرصة
ولو تريدين مستعد من باجر اجيب
اهلي وعمامي واخطبج،،،
احببببببببببج

اريد أصفن عليك وكطع الأنفاس
واسمع صوت كلبك من يناديني
وضل گاعد كبالك وكتم الصوت
وأفهم نظرة عينك من تحاجيني
ليش سنين عمري حلوه بس وياك
لأن اصلك عسل وتحلى بسنيني
وماتدري الكلب يشتعل من فركاك
ولوتدري بمعزتك والله توفيني
ماريد العمر بس انته كون وياي
لأن ضاع العمر وانته التدليني