فكرة انك تحتاج لشخص وهو بعيد ما اقصد بالبعد المسافة اقصد بالشعور ،
تحس بشخص بكل حالاته اذا چان فرحان او ضايج تعبان او مرتاح ، بس بنفس الوقت انتَ تعرف اي شعور ممكن تحسه مراح يهمه اي موقف ممكن تمر بيه مراح تلكه سند بيه غير نفسك ،
نفسك الي دست عليها علمود متتخلى عن الاشخاص الي تحبهم ،
تحملت كومة مواقف مو حلوة وياهم وسمعت كومة حچي مو حلو منهم بس بقيت متمسك بيهم لان تعرف داخلهم يختلف عن كلام العالم ، بس يا ترى بالاخير هالشخص حيخذلك ويثبتلك انه كلام العالم عنه چان صح الي انتَ بعت كل العالم علموده وبالاخير هو طلع مثل ما هم گالوا ؟
اهتمامك المفرط باشيائه الخاصة
الفرص الي انطيتها اله بكل مرة يخطأ بيها ويدوس بگلبك حيل ويوجعك ، يستحقها ؟
يبادلك الاهتمام ؟
مهتم شوكت اخر مرة طلعت لمكان او منو صديقك المفضل او شنو تسوي بوقت فراغك ، اكلك لونك عطرك فلمك المفضل ؟
يهتم بتفاصيلك ؟
دواك اذا تمرضت ؟
يكون يمك وقت الشدة والحاجة ؟
يكون سند من هالدنيا تكسرلك ظهرك ؟
ينطيك وعد انه حيحارب الدنيا كلها علمودك وعلمود يشوف ابتسامتك ؟
ينطيك وعد انه حيبقى دائماً وبكل الاوضاع يمك وميتخلى عنك ؟
بالاخير نتذكر :- ماكو حب بدون اهتمام .
ماكو حب بيه خيانة .
والمهم والاهم ماكو حب يتعب الحب سبيل للراحة .
