أحلام اليقظه بقلم شيماء المشهداني الناشربارق العراقي

الجزء العاشر

#احلام_اليقظه
#الجزء_العاشر
#بقلم_شيماء_المشهداني
#الناشربارق_العراقي

بعد ماعرفت الحقيقه المرة .. وعرفت كل شي مبهم .. جان شاغلني ومحيرني بقيت اعاني والسؤال الي يقتلني يوميا وماالكى اله اي جواب ..
ليش ..
وين تقصيري ..
اخر مرة عفتها جانت بحظني وعايشه حياتها وياي ملكة دلال وحب ماحرمتها من شي ولا خالفتها بشي ..
ومن عرفتها يتيمه .. تنتظر من خالتها تنطيها المصرف خالتها الي لمتها بعد ماابوها اتزوج وعافها لحمة صغيره جان همي اعوضها عن الي شافته  ..
لينا ..
دخلت عليه الغرفه واني مدد بفراشي بعد مانمت نومه طويله كعدت منها ادور على جگارتي يمكن هيه أوفى من البشر مااتخلت عني بيوم وتخفف عليه الالم وتشاركني الوحده..
مصطفى اخويه كوم اكل الك لكمه ..
مااريد ..
مرام هواي اتصلت بيك ..
اني اتصل بيها فد شويه ..
مااسويلك فد شي جاي كهوة ..
لا ..بس عوفيني وحدي الله يخليج ..
صار .. بس اعذرني مصطفى كل الي صار بيك اني سببه ..
اسمعيني .. مااريد اي احد من اهلي يعرف الموضوع ..
طبعاا اكيد ..
روحي للبيت خاف امي تشك وتضل تسال مابيه حيل لاسئلتها .. اني تعلمت وحدي بعد ..
اهاا ..
وره شويه سمعتها طلعت وسدت الباب وراها ..
طلعت من غرفتي .. باوعت على الشقه تريد تاكلني .. كرهت كل شي بيها احس خطواتها وصوتها وحتى ريحتها موجوده.. صرخت وضربت نفسي وكسرت الغراض الي يمي جنت تعبان اكو بركان بداخلي لازم ينفجر جنت اتمناها ميته ولا هذا الي كله سوته بيه  وبنفسها .
مجانت تستحق حتى ادور عليها وانتقم منها جنت متاكد منها مراح ترتاح ويجي يوم وتلتقي الوجوه ..              الشيماء 
عرضت الشقه للبيع .. وبعتها واخذت بيت والله رزقني على هالبيت ..
علاقتي بفراس صارت حديه فترة طويله كمت من اشوفه اتنرفز مو فراس الشخص الي جان صديقي واحس بيه ..صح هو جازاني هواي او وكف وياي بالمطعم واله فضل جبير عليه لكن احساس بداخلي مااكدر اتحاشاه .. أحسه من يشوفني بداخله يتذكر علا ويشفق عليه ..
من بعت الشقه رند كلش اتاثرت وضلت تبجي وكالتلي ..
اني ماعندي احد غيرك اني احسك اخ الي واماني الوحيد  ..
وعرفت منها جانت كاعده  وي عمتها بعد ماانقتل اخوها سرمد لان جان ماعدهم بيت كاعدين ايجار وهو يدفع الايجار بعد وفاته ماعدها احد يدفعلهم الايجار والعيشه وشيلهم ابو البيت ومن كعدت وي عمتها بس سكن اما الاكل والدوة والعيشه عليها وتعلمت رند الخياطه حتى تسد العيشه ..
وعمتها عدها اولاد متزوجين وطالعين من البيت وبعضهم خارج البلد...وبتها سحر متزوجه واهل زوجها مطرديها ميردوها وزوجها صار بينها وبين أهله فكعدت بيت ابوها لحد ما الله يفرجها ...
وكامت تغار على زوجها من رند لان زوجها يدافع الها وينقهر عليها بس تشتغل وتعتني باولاد سحر إلى أن اجا اليوم الي طردت رند وامها من البيت بعد ماهانت رند وام رند ردت عليها وكبر الموضوع   ..
ولكت هالشقه رغم ايجارها غالي  .. وناويه تطلع منها بس تلكى شقه ايجارها اقل وبنفس الوقت جانت تعاني من الدرج
وسألتها ..
بس ايجار  الشقه منو يدفعه الكم ..
نصت راسها وكالت اهل الرحم واني اشتغل مرات اخيط وزوج بت عمتي من طردتني سحر يدزلي شهريا بس شي قليل يسد الحاجه لان يحس بالذنب... ومرات فراس هم يساعدني ..
هااا ..
ابن حلال فراس بس ماعنده حظ .. .
ليش ماكتيلي هالكلام ..
انت بهمك عايش هو اني عرفتك زوجتك توفت .. شفتهمت انت بحياتك بس الهم والغم ..
كمت اتصل بيها بين فترة وفترة وادز الايجار لصاحب الشقه .. والمصرف الشهري الها .. وامر يمهم من اضوج بس من اشوف الشقه مالتي تنكرب روحي واعتذرت الهم اخر مرة .. كتلهم بعد ماكدر اجي تحتاجون شي اتصلوا ادزلكم اي احد ..
قطعت علاقتي بالناس كلها تقريبا وتفرغت للشغل .. مرام جانت تتصل بين فترة وفترة وجنت مرات اجاوبها ومرات لا .. لحد ما فهمت وضعي وقطعت الاتصال ..
وبعد فترة اجاني فراس يلمح الي بالزواج ويريد يستقر .. واني شجعته كتله على الاقل والدتك متبقى وحدها بالبيت .. اكو ونيس وياها .. وكال انت ممخلي وحده معينه بالك ..
وشنو علاقه زواجك بموضوعي ..
فكرت  اخطب مرام اذا انت ممخليها بالك طبعا ..
اتوكل بالله وأخطبها ..
صدك ...
اي ليش لا بنيه مؤدبه وبت عائله و متلكى احسن منها ..
حظني فراس وكال ..
مصطفى اني ماريد تشيل بگلبك عليه ..
فراس ثق اني مشايل منك .. اني عزت عليه نفسي مو اكثر .. انسى الراح لان اني اريد اتناساه بس مااعتقد اكدر انساه ..
تمت خطوبه فراس ومرام وزواجهم بعد أيام قليله .. ورجعت علاقتنا طبيعيه ..
مرام جانت  بنيه جديه واني مفكرت بيها كزوجه لان مااريد امراءة قويه ...ولا أريد امراءة تشتغل لان فقدت الثقه بكل النساء جنت اتمنى اتزوج واستقر لان علا مجانت تستحق أنه احطم حياتي لأجلها .. لكن موبيدي انكسرت أشياء بداخلي ..
توسع شغلي وصار عندي بمكان المطعم اثنين وبعت بيت والدي وبفلوسه اخذت بيت اكبر الهم وبمنطقه افضل .. حتى يتزوج مرتضى ويشوف حياته ..