أحلام اليقظه بقلم شيماء المشهداني الناشربارق العراقي

الجزءالاول

#احلام_اليقظه
#الجزء_الاول
#بقلم_شيماء_المشهداني
#الناشربارق_العراقي

اصبحت الدنيا باردة ورذاذ المطر يتناثر على واقيات المطر جان ديسمبر بارد مو مثل كل سنه .. واني اشرب فنجان الگهوة واباوع على منظر المطر من نافذة غرفتي المطله على الشارع العام والناس الي متوجهه لعملها مثل كل يوم سواء كان حر او برد ومطر ..
باوعت على اميرتي وهي نايمه بفراشها مثل الملاك هي جانت حب حياتي بس هل ياترى يبقى هالحب ويورد .. سالت نفسي هالسؤال بعد ثلاث سنوات من الزواج وربي لحد الان مااكرمنا بطفل لكن كرمه عظيم وجليل انعمنا بالصبر والامل أنه غدا اجمل إنشاءالله ..
سبحت وغيرت ملابسي بعد ماقضيت ليله حمرة مع زوجتي وحبيبتي علا ..
واجيت عليها وبستها قبل مااطلع .. ومن رفعت نفسي من السرير لزمت ايدي ..
هااا كاعده حبيبتي ..
ابتسمت .. اي ..
تحتاجين شي اجيبلج وياي ..
مصطفى ..
عيونه ..
اكولك شي ..
كولي ..
لتزعل عليه خاف بدر مني شي ودمعت عيونها..
شبيج علا صاير شي ..
لا بس اقصد ..
هم رجعنا موضوع الاطفال يعني اني وانتي مابينا شي سلمي امرج لله الرزق منه ..
اكيد كله بيده ..
ياله حبيبتي اني رايح .. بستها ومن طلعت رن تلفوني ..
الوووو
هااا فراس .. جاي ... جاي .. سديت التلفون ومن دانزل صعدت بنيه على الدرج تمشي بسرعه والعلاليك هواي بايدها ..
العفو اختي اساعدج ..
رفعت راسها .. سبحان الخالق جمال مو طبيعي ..
لا شكرا .. زحمه عليك ..
لا شلون اعوفج بهالوضع .. اخذت الغراض وخليت كل علاگه بالثانية .. هي ابتسمت وكالت والله منايمه وتعبانه ..
انتو الجار الجديد ..
اي ...
اشتريتوها للشقه. .
لا ..ايجار .. هنا هاي الشقه .. فتحت الباب وكالت اشكرك اخي .. جانت لابسه بنطلون كاوبوي وسترة ثخينه وردي وشعرها طالع من الحجاب وصاير على عيونها.. باوعت عليها اكو احمرار بعيونها .. يمكن باجيه ..
اختي انتو شقتكم مقابل شقتنا اي شي تحتاجيه اني اخوج مصطفى ولاتترددين ..
شكرا الك اني رند ..
تشرفت بيج ..
نزلت ورحت للمطعم ..
اني عندي مطعم او وياي يشتغل فراس صديق الطفوله الي امن بيه على اسراري وهو هم يحبني ويأمن بيه على بيته .. احنا چنا بكليه وحده اني او وهو وعلا الي هي زوجتي حاليا وتزوجنا عن حب ..جان الكل يحسدني على علا جانت جميله بشكل وومتحجي وي اي احد بس اني وفراس .. فراس بمثابه اخويه ودائما تكوله انت حمايه الثاني ..
عندي اخ واحد اسمه مرتضى ..واخت اسمها لينا .. لينا متزوجه وعايشه بيت وحدها وزوجها تاجر الله مفضل عليه ومرتضى اصغر مني ابو البنات يوميه خطبولي فلانه وثاني يوم غير رايه وكال لا اريد فلانه .. والدي او والدتي عايشين الحمدلله بس جانت امي ممقتنعه بعلا رغم انه علا جميله و جانت يتيمه امها توفت بولادتها وابوها تزوج وتركها عايشه وي خالتها الي ربتها واعتنت بيها مثل الام اذا مو اكثر لكن خالتها اتوفت قبل ٦اشهر وصارت علا وحيدة .. وشگد طلبت منها أنه تواصل ابوها جانت رافضه هالموضوع ومن تقدمت الها رحت لوالدها وشفت علا حقها متعترف بيه وجانت ردة فعله ..اذا هيه راضيه گبع وأخذ ..
فراس وهو يضحك ... اليوم الشغل ماشاءالله فول ..
حط عينك ولك ..
هههههه لا بس اني اريد اطلع عندي شغل ..
شوكت تجي ..
احتمال مااجي ...
هااااا هم نسوان شوكت تجوز من سوالفك ...
هسه انت متزوج عوف العالم تتهنى ..
وليش ماانت تتزوج وتتهنى والله فراس ماكو احلى من الحلال ...صدگ اليوم شفت بنيه مستورة ساكنه جديد ليش ماتسال عليها ...
اششش انت وين وديتني اني اريد اطلع البنيه مصلوبه بالشارع ..
ضل بسوالفك ..
ياله ..باي ..
جان هذا المطعم الي وفراس يشتغل وياي صح هو ماعندة حصه بس هو صديقي ومالي ماله ماكو فرق بيناتنا .. ضحكت عليه وهو طلع يركض ويعدل بشعره او بنطلونه رايح للموعد ..
كطعت تفكيري بنيه هي متوسطه الطول ضعيفه رافعه شعرها ونضاراتها السوده او وجها الخمري المحمر من البرد تحجي وهي ترفع برجلها وتنزلها وحاطه أيدها بجيوبها ..
مصطفى شلونك ..
العفوووو وياي ..
اكو غيرك ..
لا ..بس مداعرفج ولا صغرا بيج ..
متذكرني ..
لا ..
اني مرام ..
يامرام ..
جنت وياكم بالكليه ... بس اني قسم قانون ..
بس اني مو قانون ..
اي انت علوم .. احنا چنا كروب واحد ويانا فلان وفلان ... كولي علا تعرف اخبارها ..
اي زوجتي ..
هااا حلو ..
مردت احجي تفاصيل هواي ..
اتفضلي شنو تشربين تاكلين ..
ردت شي خفيف اكل على ذوقك عندي دعوى بهاي المحكمه ... وهاك هذا الكارت خليه يمك خاف تحتاجني بميراث مو بغير شي ابتسمت وكعدت ..
سويتلها طبق وقدمولها الشباب ... ومن طلعت سلمت عليه وراحت خليت الكارت بجيبي ... بس هاي شذكرها بيه اني اصلا ولا أتذكرها وشلون مخليه بالها علا .. هما النسوان هيج الا يعرفون كل شي ..
ولا اتصلت بعلا اليوم .. اتصلت بيها لكيته مغلق .. استغربت ليش ..معقوله نايمه الساعه ١١ يجوز مغلق ومتدري بيه ..
اشتغل وبيدي تلفوني واكرر اتصالي ماكو مدا احصلها ..
اتصلت بفراس كلت بلكت قريب يمر عليها ..
هاا مصطفى ..
فراس انت وين ..
مو كتلك وي جماعه ..
انت قريب على بيتي لو لا ..
لا بعيد طبعا ..شكو خيرك خوفتني ..
مدااحصل علا ..
والله عبالي بيك شي .. يجوز دتسبح يجوز نايمه او مشغله الغساله اني هسه راح اطلع وامر لبيتك واشوف شكو ..
انتظرك خويي ..
ان شاءالله ..
.....الشيماء ...
كلت يجوز مشاحنه تلفونها وناسيته او مثل ماكل فراس دتشتغل ومدا تسمع ..گلبي يسولفلي ويكولي اكو شي ورة ساعه اتصل فراس ..
هلو فراس ..
اكولك مصطفى ادك بالجرس وبالباب محد يرد عليه ..
صدك خاف مدكيتها زين ..
لك الجرس حرگته وماكو خاف مرتك متخربطه وحدها عوف كلشي وتعال ..
اي ... اي ... جاي طبعا ..
وجان واحد من العمال جار اهلي هم اثق بيه ..خليته بمكاني وطلعت
صعدت سيارتي وشغلتها ومشيت بدون وعي .. وصلت للعمارة لگيت فراس واكف دينتظرني ..
صعدت اركض وهو يركض وراي .. ويكولي على كيفك لاتوكع كول يالله ..
يا الله ..
فتحت باب الشقه .. مثل ماعفتها الشقه هادئه طبيت للغرفه كما هيه بس علا ماكو ..
والغرفه مثل ماعفتها ماكو تغيير.. طبيت للمطبخ .. ماكو شي حتى مشاربه شي او ماكله .. فراس واكف باب الشقه ..
يصيح يخجل يطب .. ها مصطفى ..
فراس ماكو ..
مصطفى شبيك يجوز طالعه لصديقه لجوارين ..
لا هيه تكول من تطلع عمرها ماسوتها ..
خاف زعلتها ..
اني ازعل علا ... هي روحي عيوني الي اشوف بيها بس .... لحظه انتظر ..

للحكايه بقيه ....