انثى كلاسيكية

الفصل الاول

نزلت من سيارت العرس المزينة بالورد والفل والياسمين .. العالم كلها ناطرة لتستقبلها
كأنها أميرة عم تطل على شعبها الي بحبها من قصرها العالي و الشعب بيهتفلها بكل عبارات الغزل والمديح 

حست برجفت برد .. و باقة الورد بايدها عطرها فاح .. مسك احمد ايدها 
وبلشو يمشو بين شعبهن العزيز .. و جماهيرهن الغفيرة 
طنة ورنة وورد بكل مكان و عراضة شامية و زغاريد ومباراكات
وبنوتات صغار مسكولها ديل الفستان ومشيو وراها .. 

أحمد : ليش عم ترجفي ؟ 

ياسمين : ما بعرف .. كتير مبسوطة .. انته كأنك مو مبسوط ؟ 

أحمد : في شب ما بكون مبسوط بليلة عرسو ؟ 

ابتسمت ياسمين و كملت مشيتها ..

قعدت على المنصة .. كانت بقمة الجمال والأنوثة .. 

عم تتأمل الصالة الكبيرة و تفاصيلها من أضواء وزينة و ورد 
ما اختارت شي بإيدها .. حتى الفستان الي لابستو كان مفاجئة الها 
الي بتعرفو انو خطبوها جماعة من عيلة محترمة كتير والها سمعتها 
والشب اخلاقو عالية والكل بيشهدلو وبيحلفو فيه .. وحيد ابوه وايدو اليمين
كأن طاقة السما انفتحتلها وقالتلها خدي يا ياسمين لترضي .. اخوتها و بنات العيلة و رفقاتها طار عقلهن 
شب بياخد العقل و بمواصفات احمد كانت كل وحده تتمناه الها.. بس النصيب اختار ياسمين.. 
#مال_الشام 

ياسمين : أحمد كل شي كتير حلو عنجد زوئك بجنن 

أحمد ضحك : حبيبتي هاد زوء الوالد الله يطوللنا بعمرو ويخليه فوق راسنا 

ياسمين : مممم عنجد كل شي بيجنن 

ما جاوبها احمد .. 

ياسمين : انا عجبتك ؟ 

أحمد : طبعاً .. 

ياسمين : طيب مو لازم كنت التلي شي كلمة حلوي ؟ 

أحمد : بس انتي بتعرفي انك عاجبتيني لشو بدي كل شوي قلك ياها

ياسمين : خلص مو مهم انسى .. 

أحمد : انا بكره هي المناسبات كتير .. كلها مظاهر كزابة والكل عم ينافق لبعضو 
شوفي امي كيف عم تبتسم لمرت عمي .. وشوفي امك كيف عم تضحك لستك 
وشوفي نسوان اخواتك كل تنتين قاعدات على طاولة وعاملات احزاب .. 

ياسمين وهي عم تطلع حواليها .. : يا الله شبك شو بدك فيهن هاد عرسنا النا مو عرسهن الهن

احمد : هههههه شوفي بنت خالتي هيام كيف عم تطلع عليكي 

ياسمين : هديك البنت ؟ 

احمد : لا تأشري يا جدبه ايه هديك الي لابسه فستان ازرق 

ياسمين : وليش لتطلع فيني هيك يعني شو عاملتلها انا ؟ 

طلع احمد سيجارة وحطها بتمو : ههههه احزري لحالك 

مدت ياسمين ايدها عالسيجارة وسحبتها بقوة : لك مجنون شو عم تعمل 

تغيرت كل ملامح احمد .. ومسك ايد ياسمين بقوة كتير : اوعي تعيدي الي عملتيه

ياسمين : اااخ ايدي .. احمد اتروك ايدي وجعتني 

تركها احمد وطلع من الصالة .. وهي حبست دمعتا انو معقول يتخانقو هيك بليلتهن ! شبو معصب

اجت امها و خواتها قعدو جنبها و على ضحك و مزح وهي عقلها مو معهن وعم تدئ لاحمد وما كان يرد عليها بنوب 
اشرت لحماتها لتجي لعندا 

ياسمين : مرت عمي احمد وينو ؟؟ 

حماتها : عم تساليني وين جوزك ؟ 

ياسمين : لك هو راح وما عم يرد علي 

حماتها : طيب رح احكي مع عمك وخليه يجيبو 

ياسمين : ايه الله يوفئك العالم بلشت تروح ونحنا لازم نكون طلعنا 
ما بدي الناس تحكي شي علينا او تفكر في مشاكل 

حماتها : ماشي ماشي يلا استني 
مال_الشام 
راحت حماتها و اتصلت على ابوه لاحمد وخبرتو شو صار .. و بعد عشر دقايق رجع احمد
وهو مبتسم .. وقعد جنب ياسمين الي كانت معصبة كتير ما حكيت معو و لا كلمة… 

احمد: شو يا عروس خفتي علي؟ 

ياسمين: احمد الله يوفئك لا تحكي معي… خليتني مسخرة للعالم 

احمد: حئك على راسي يا ست الصبايا… خلص اضحكي كرمالي 

ما ردت عليه… 

احمد مدلها وردة حمرا: امسكي 

فرحت كتير فيا و اخدتا من ايدو و ابتسمت… و بعدا قوموهن ليطلعو على بيتهن… 
بيت اهل احمد كبير كتييييرررر… وهو وحيد اهلو شب على بنتين… لهيك سكنوه عندهن بالبيت… 

طلعو بالسيارة… و بلشت دئات البها لياسمين تزيد و تتسارع 
و احمد يبتسلمها و ما حكي و لا حرف.. 

لوقت ما وصلو على بيتهن… فاتت ام احمد و ابو احمد و احمد عالبيت وهو ماسك ايد ياسمين… 
وقفو قدام الدرج اربعتهن… 

ام احمد: ايه ريتها جوازة الدهر كنتي.. 
ياسمين باست راسها: شكراً مرت عمي 
و باست ايد حماها ( هيك كان منبها احمد تعمل) 
حط ايدو على راسها و قلها انتي كنة بينرفع الراس فيكي… بدي تديري بالك على احمد 
ياسمين: حاضر عمو.. 
احمد: فينا نطلع على غرفتنا؟ 

ابو احمد: ايه ابني اطلعو.. 

قرب احمد من ياسمين و حملها بين ايديه وطلع فيها الدرج.. 
ياسمين: لك احمد نزلني… احمددد 

لوقت ما فوتا على الغرفة 
#مال_الشام 
ام احمد: شو هالتصرفات الي بلا طعمه عيب والله عيب! ! 

ابو احمد: انا مو مطمن.. خايف كون ظلمت هالبنت… مو مطمن 

حطت ام احمد ايدها على كتفو: لا حبيبي لا هي و لا اهلها كانو يحلمو بعريس متل ابني، حتى لو اكتشفو الحقيقة ما الهن شي عنا… الي عملناه ما الهن حق يحاسبونا عليه… 

ابو احمد: الله يستر يارب… الله يستر