Be My Boyfriend(Completed)

Part 4

Unicode

မနက်ခင်းနေရောင်ခြည်လေးက ပြတင်းပေါက်မှတစ်ဆင့်ဖြတ်ဝင်ကာ Saint မျက်နှာပေါ်ကျရောက်နေလေတော့ အအိပ်မက်သော ကောင်လေးမှာ မျက်ခွံပေါ်က နေရောင်စူးစူးကြောင့် မျက်ခုံးတွေတွန့်ချိုးရင်း နိုးလာလေသည်။

အိပ်ချင်မူးတူးနှင့်ထထိုင်ကာ မျက်လုံးအသာပွတ်ရင်း Perth ကုတင်ဘက်သို့လှမ်းကြည့်တော့ သပ်ရပ်စွာခေါက်သိမ်းထားတဲ့ ကုတင်လွတ်ကိုသာတွေ့လိုက်ရသည်။

အစောကြီးများ ထပြေးနေတာလား..

အားကစားလုပ်ရတာသဘောကျသည့် Perth ကမနက်စောစောတိုင်း ဘောလုံးကွင်းတစ်ပတ် ပတ်ပြေးတတ်သည့်အကျင့်ကြောင့် ဘော်ဒီကလဲ မိုက်သည်။အဆီပိုမရှိသည့် ဗိုက်ကြွက်သားတွေကလဲ ကျောင်းအင်္ကျီပါတာတောင် တောင့်တင်းနေပုံပေါ်သည်။ထို့နောက်ရင်အုပ်ကျယ်ကျယ်တစ်ခု..

Saint ခေါင်းအုံးလေးလှမ်းယူကာ ပိုက်ထားရင်း ညကအကြောင်းတွေပြန်တွေးနေမိသည်။

Perth ရင်ခွင်ထဲဝင်သွားသောအချိန်..
Perth မျက်နှာနဲ့အရမ်းနီးကပ်နေသည့်အချိန်များကို
Saint တွေးရင်းပြုံးနေမိသည်။

ပြီးမှ သူ့ဟာသူ သူခိုးလူမိသလို စပ်ဖြဲဖြဲလေးဖြစ်ကာ ခေါင်းကုပ်ရင်း အခန်းထဲဝေ့ဝဲကြည့်မိသည်။

ဘယ်သူမှမရှိလို့ပေါ့ ငါကိုကလဲ ဘာတွေတွေးနေမိတာလဲကို မသိဘူး ကျစ်!

ကုတင်ပေါ်တွင် ထိုင်နေရာမှ ထကာရေချိုးခန်းထဲဝင်၍ကျောင်းသွားရန်သာပြင်ဆင်နေမိသည်။

Saint အကုန်အဆင်သင့်ဖြစ်၍ သွားဖို့ပြင်နေသည့်တိုင် Perth ကပြန်ရောက်မလာသေးပေ။

Saint ဖုန်းထုတ်ကာ Perth ကိုလှမ်းဆက်ကြည့်သည်။

ဖုန်းဝင်သံ အနည်းငယ်ကြာသွားမှတစ်ဖက်ကထူးသံထွက်လာ၏။

"ဟယ်လို Saint"

"အင်း Perth ကျောင်းချိန်နီးနေပြီလေ ဘယ်မှာလဲ"

"ငါကျောင်းကိုရောက်နေပြီ"

Saint မျက်မှောင်လေးကျုံ့ကာ အနည်းငယ် အလိုမကျဖြစ်သွား၏။

"ဘာလို့ ငါ့ကိုမစောင့်တာလဲ တူတူသွားမှာကို"

"မစောင့်တာမဟုတ်ပါဘူး ငါလူတစ်ယောက်နဲ့လာတွေ့တာမို့လို့"