قصة. منقولة.
سامعين الميت عاش اني الميت وعشت ..
احنه عائله متكونه من اربع ولد واني الوحيده الاهلي
اخواني خريجين واحد مهندس كهربائي والثاني مدرس والثالث معاون طبي والرابع جان طالب سوده عليه .
ابويه جان عنده علوه مال حبوب اخواني يشتغلون بيه ابويه جان بوكته رجال جبير عمره 62سنه يروح للعلوه يوميه يكعد شويه ويروح للجامع يقراء قران وره هو يأذن بل جامع اجاه تبليغ انو بعد ميأذن ..
كناله يابه اكعد بل بيت اقراء القران جفينه شر البعثيه
مقبل ضل يروح يوميه ..اني جنت ستوني متخرجه من كليه(كلية تربيه انكليزي)وجان اكو ولد يريد يتقدملي كال بس نتخرج اخطبج المهم ...
اخواني والله ماعدهم اي شي مجرد يصلون ويرحون زيارات ...سنه 1991/11/9 ابويه رجع من الجامع اخواني جانو وياه 4تهم لان الجامع قريب وابويه معلمهم يصلون بي رجع والدي ومحضرين العشه.مانسمع غير الباب اندكت بل جواكيج فتحت البرده اشوفهم عبرو من الباب طبو علينه تقريبا 30واحد اخواني شبعو كتل والفشار على ابويه ..
ابويه كلهم شكو صار كاله صار هيج هيج من عرضك الصكط (مكرم القارئ)وفشار غطي وجهكم منه جان يضربو مددوه بل كاعد جتفو اخواني وسدو عيونهم امي تبجي وتبوس بيدهم تتوسل بيهم والله ولدي ماعدهم شي انتو غلطانين ..انوب اندارو على امي بل الاخمس على وجه على صدره موتوه وجان اكو واحد جبير مالتهم كالولهم يله ربطوهم كلهم صعدوهم شدو عيونه اخذونه بسياره مشت سياره تقريبا ساعه واني الخوف موتني كاعده واندعي ماخليت امام مانخيته ماخليت دعاء مادعيته امي ابد مسكتت بس تبجي طبعا الفشار ولا وكف من حلكهم ...بعدين نزلنه من السياره سمعت اصوات هوايه ناس نسوان وزعاطيط تتباجه جان يصعدونه بل لوريات خبط نسوان ورياجيل وزعاطيط طبعا بس اسمع ماشوف لان سادين عيني ومربطين ايدي من صعدنه امي بعد ماسمعت صوته كمت اصيح يمه يمه يووووم يمه تسمعيني ماكو يعني مااوصفلكم الي مريت بي اكول يمكن اني بحلم ياربي كون حلم واصحه منه اسمع نسوان وجهال تتباجه والي يحجي تجي صونده جان توكف السياره نزلنه ناس فوك ناس حشك عبالك يوم المحشر بحيث وكعدت بل كاع مكدرت اكوم داسو عليه وختنكت من دوس مااسمع غير صوت رمي رصاص شامي عامي علينه اني من وكعدت بعد مكدرت اكوم انداسيت اجتني طلقه ب فخذي وانداسيت كامو يوكعون اني ضليت بمكاني متحركت حتى من انضربت محسيت بل ضربه بس حسيت اتبللت من دم ... ودم الناس اليمي ولي وكع فوكايه..ضليت جامده وبكلبي اشاهد لان كلت هاي هيه هاي حموت هسه تجيني طلقه بعد رمي الي استمر تقريب 8دقايق صارت صنطه صوت الناس ماكو اسمعهم يكولون يله خلي نرجع كلهم ماتو اجه واحد ديكلب بل جثث ..اني سويت نفسي ميته ديفحص اكو احد عدل شاف رجلي مضروبه وملطخ بدم الي بصفي وشعري كله دم كالهم كلهم انطمر يله خلي نروح...عود اصبح انجيب الشفل حتى يطمهم ..كامو يسحلون بينه ويذبون بل حفره...
طبعا ناس فوك ناس اني بده الصواب يوجعني ..همه راحو ضليت اتوجع واندعي صنطه بس صوت الجلاب (مكرم القارئ) كمت اسحل بروحي اوخر بل جثث حتى اشتم هوه ريحة الدم زفره اسحل بروحر وادفع براسي سمعت صوت جمدت بقيت بمكاني الصوت اقترب اسمع صوت مره ورجال يحجون بس مافهم شي كمت احرك برجلي وبراسي سمعت المره اتكول اكو واحد عايش بيهم اني كلت حتجيني طلقه واموت اشاهدت وسديت عيوني ..
جان ينزل الرجال جرني كتله لاتكتلني كال لا راح اطلعج شالني والمره الي وياه سحبتني من فوك مااكدر امشي فتحو ايدي ورجلي كله دم مشنه هوايه اسحل بروحي طول مانمشي مرته تندار وتخربط بل تراب حتى ليبين اثار المشي وصلت للبيت المراه طببتني للحمام غسلت الدم انطتني دشداشه لبسته الرجال طلع على مضمد جابه كالي بلكي يكدر يطلع الطلقه
اجه كاله اكدر اطلعه بس تتحمل الوجع كتله اي
سوالي مثل العمليه بدون بنج بس ابجي واصيح خطيه المره جابتي ربطه كالتلي خليه بحلكج حتى لاعيط ..
طلعت روحي والله بهذاك اليوم يوم جان اسود
هذا الحجي كله صار.. طبولنه بل 8 تقريبا لحد ماطلعولي الطلقه ساعه 2بليل المضمد كاله شبيه
الرجال كاله مابيه شي اخو دينظف السلاح وضربه
ونخاف انوديه للمستشفى خاف ينحبس ..
طلع المضمد وجابتلي حليب شربت وابجي مادري اهلي وين صارو...
سالتهم كتلهم انتو شلون اجيتو للحفره .؟
الرجال كال صار 3تيام الصبح انشوف شفلات تحفر
وبليل نسمع صوت طلقات بحيث الجهال يخافون صار 3تيام يوميه نفس الحاله اليوم هم تكررت كتله المرتي امشي خلي نشوف شكو وره مامشت السيارات اجينه وشفته اعدامات جماعيه ..
الرجال البيت مالته من طين وقريبا على الحادثه تقريبا كيلوا مترا ...
كالي احجي شنو الي صار كتله هيج وهيج السالفه
كالي زين انطيني عنوان كرايبج انطيته عنوان عمامي
خطيه الرجال راح عليهم كلهم ..
بتكم عندي وخلصت من الموت وهذا عنواني ..
محد قبل يجي وياخذني اصلا اتبرو مني من الخوف
اني مريت بحاله تقريبا الجنون كلسع اتخيل الموقف واتذكر والدي وامي واخواني...بس ابجي
المهم الرجال خاف عاف بيته وطلعنه بغير محافضه .
الرجال يطلع عمره 38سنه عده 3ولد و2بنات ومرته من هذني الفلاحات.الله ذبني بنص ناس طيبين جدا .عاف المنطقه وطلعنه الغير محافظه ..صار شهر على حادثه اكل واشرب وياهم .. الرجال فلاح يضمن بساتين هو وزوجته عده صديق راح عليه كاله اني اريد اشتغل.جنه ماجرين بيت من طين رجع الرجال كال وصيت على شغل بلكي الكه والله لليل ..اندكت الباب اجه صديقه كاله عبود لكيتلك بستان وصاحب البستان مو هنا بغداد ويريد ينطي البستان الواحد امين وباجر راح اجيبه عليك تتفاهم صدك صار الصبح اجه الرجال كاله شوف اني هذا بستاني انطي الك وبي بيت 150مترا اكعد انته وعائلتك اريد منك تزرع وتحصد وتبيع تنطيني صافي اجيك كل فتره نتحاسب ولك ...ماعرف بل ضبط شكد نطاه كم مترا ..كاله هاي كاعده هلكد الك تزرعه والمحصول الك تبيعه تاكله انته حر..
صدك شلنه ورحنه للبستان بيت كلش حلو اخذت غرفه الي وجهاله كعدنه بيه من كعدنه وستقرا فديوم اجت زوجت عبود كالتلي اريد ازوجج الرجلي اني انصدمت كتله يمعوده شتحجين كالت شبيج والله حتى تنزعين الحجاب ويستر عليج انتي ماعدج اهل ولا كرايبج يردوج حتى الناس من تسالنه شنكلهم منو انتي وحنه ولايه جديده ومحد يعرف بسالفتج المهم ..
رحنه زياره للنجف كطعلي مهر بل حضره مال الامير عليه سلام ..
وتزوجني عبود ...
عبود زوجته مو كلش حلوه بعد فلاحه .
اني جان عمري 23سنه شعري طويل اسود وبيضه وعيوني ملونه خضر حتى جانو يشبهوني الممثله المصريه زبيده ثروت ..المهم سالفتي محد يعرف بيه غير عبود وزوجته ..
زوجت عبود جانت اتموت عليه ولا فديوم غارت مني ولاسمعتني حجايه ..عشت ويه عبود وزوجته واطفاله وصرت اني هم مرته ...مرت الايام وصار عدنه معارف وكله عباله عبود اتزوج علا مرته لان اني حلوه ...
حتى اهله ميدرون بسالفه عباله عجبته العبود وتزوجني ...
صار عدي 3بنات ...مرت عبود جانت تشتغل خطيه تطلع ويه عبود ..واني ابقه بل بيت اطبخ عيني على جهال انظف وادرسهم لان خطيه متعرف تقراء وتكتب اني جنت اقريهم ومشت سنين وناس كله عبالهم عبود عشكني واخذني
...ومرت عبود ابد متغار ولا عبالك اني ضرته ...عبالك اختي والله ويمكن اكثر من الاخت ....
مشت سنين وصار عدنه خير من الله حالتنه صارت احسن واحسن لحد ما سقط النظام .
..رجعت المنطقتي دكيت الباب طلعو ناس كاعدين بي طبيت اباوع وابجي طلع البيت بايعته البعثيه الناس مشتري منهم بعت البيت ونطيت فلوسه العبود كتله خلي نشتري بيت واحنه هم عدنه كم فلس اشترينه بيت ملك وسجلت البيت باسم عبود لان ابد مااجازي ومشت سنين ولد عبود كبرو يموتون عليه وصلتهم للكلية الجيبر خلص علوم كيماء و2خلص كلية عسكريه و3اداره واقتصاد والبنات وحده معهد طبي و2معلمه وبناتي هم خلصو وحده مدرسه مثلي وحده معهد اداره و3هندسه معمار ..
اني اجتني فلوس لان اهلي معدومين بتهمت حزب الدعوه واني الوريثه الوحيده الي طلعت من المجزره اشترينه بستان واشترينه بعد بيت اني الي بيت ومرت عبود هم بيت
بناتي صارن مثل خواتي ....
مرت عبود ابد ابد مجانت تغار.ولاحسستني بشي فديوم صارو همه اهلي .
...لان ماعدي اهل همه اهلي ..عبود صار صاحب اكبر بستان بل محافظة وبيوت 2 باسمه وأولاده كلهم موظفين وصار معروف بل محافظه ومحد عرف بسالفتي حتى من سقط صدام مكال لاي احد واليسأل عبود يكلهم عشكته واخذته هههههههه
...
واني هسه اتوظفت وعايشه بيت وحد اني وبناتي عبود يوم هنا ويوم هناك وميفرق بكلشي عادل صار عنده بيتين ولحد الان اني وضرتي وحدة تحب الثانيه ولا عبالك ضرتي ولد رجلي هم يحبوني ...
بيت اهلي انطفه لا ام ولااب ولا اخ
حتى الكرايب متواصلت وياهم ولا اعرف شي عنهم
عبود صار الي اب#وام#واخو#وزوج ودللني ومافديوم عيرني لو سمعني حجايه الله عوضني ب عبود عن اهلي (عبود اب واخ وام وزوج )
#منقول
