رشفة عشق

مشاهد من القصه

🌼🌻

السـلامُ عليكم متابعيني الاحبهم كلش كلش كلش رجعتلكم بقصه جديده تدور أحداثها بمحافظة ذي قار (الناصريه) انشاء الله أكملهه بعد قصة بقايا عنقاء ..
وقصة طاقة تحمُل كلكم ماحزرتوا المحافظه وولا تعليق صح وخليهه حسره بگلوبكم مااگول 😂😂🤣😂

وقصة بقايا عنقاء بمحافظة ديالي دختوا مو ؟ يلا ميخالف امون عليكم 😁🌻😗

#رِشفة_عشق
الكاتبه _ العبـاديه
مشاهد طويـله من القصه

وصلنا للامام الحُـسين (ع) تكحلت عيوني بشوفة القبه الذهبيه والمنارات الشاهقه سرت بجسمي رعشه وشعر جسمي كزبر من براعة المنظر .

الزوار المحتشده من جميع انحاء العالم صغير وكبير كلهه جايه مشي للامام (ع) كل شخص مقتصد شغله بباله

عيوني رقرقت بالدموع وراسي بقى مرفوع من گد ما صفنت ع الضريح .ولساني يلهج بعبارة (السلامُ عليكَ يـاأبـا عَـبدِ الله)

كل مانتقرب من الضريح يزيد الازدحام ويزيد المدافر مال الزوار علمود يوصلون للأمام .وهمَ محملين بالهموم نيتهم يفرغوهه يم إمامهم ..

دخلنا بالصحن لفحت بوجهي ريحة المسك والبخورات والمراوح بهواها الطيار ترش معطر شعور يزيد الراحه بقيت استنشق بالريحه عبت روحي وترست انفاسي تخبل اموت عليهه

تقدمنا لـباب الضريح نريد ندخل نزور ونذب العلگ بالشباك وچان تجي مريه تشهگ وتبچي وعيونهه مركزه ع الباب مال الامام ماتشوف احد گدامهه اني صفنت بيهه واباوع عليهه صرت بطريقهه وهيه دفعتني بقوه وگعتني بمكاني وراحت تركض للإمام ..

احس إيدي انخلعت بقت عيوني تصب ..

أُمي صاحت عليهه

- شسالفه زايره ماشفتي البنيه من دفعتيهه هو اليريد يزور هيج يسوي؟!

هيه كملت طريقهه ولا التفتت على كلام أُمي وركضت تدفع بأي شخص يطلع بطريقها !!

اني گمت على حيلي بعدما عباتي تّـلفت تراب وشالي تخربط .
بقيت انكث بعباتي وعدلت شالي ..

- يلا ماما خل نروح نزور

- ماكو مجال . خل نقره الزياره ونرجع منا تشوفين الامه مگلوبه كلهه تريد تزور ومحد ينطي مجال !

مباشرةً دموعي صبت

-انتي مو وعدتيني السنه ادخل اشوف شباك الامام (ع) بحياتي ماداخله لجوه كل سنه من برى نزور !

- عبالج تگدرين تدخلين ؟
يكتلنج بمكانج والله ..
احسن شي نروح نتصل بخالتج ونشوفهم وين گعدوا لان لو تبقين للصبح متگدرين تزورين مايخلنج

برطمت بشفتي وعيوني انترست دموع كل سنه نجي مشايه من النجف لـكربلاء قاطعين كيلوات المترات وتالي مانزور بس نگعد بالصحن نقرأ الزياره ونرجع !