رشفة عشق

3

الـسـلامُ عـلـيـكـم🌼🌻

رشفة عشق
الـعـبـاديـه
البارت _3_

إسمي صفاء عمري 24 سنه أمي مطلقه وأبوي متزوج . من أمي تطلقت ماقبلت تاخذنه آني واخوي بقينه عند أبوي شهرين وأخوي هجّ من مرت أبوي والتوزوز والضرب والاهاين بقيت بس آني مجبور أتحمل أي شي يصير بيه .

كربتني كراب وولدهه يشربون جكاير يجي ابوي يشوف الگـطوف يگلوله صفاء يدخن وينزع الحزام ويراويني النبي عربي حتى گمت مااتأثر من گد الضرب الاكلته بحياتي .

مليت وقررت أطلع منهم رحت لكربلاء أشتغل بدون علمهم خليتهم ينامون وطلعت بسريه . بس تفاجات بعد شهر اجه أبوي جرجرني وگطعني بالضرب وآني رجال !

كلبچني بكلبچات خاف أشرد !! بيومهه چان عدنه بيت خالتي أم إيڤان كلش حزت بنفسي شلون من يضربني خالتي تدافعلي وتصير مقابيلي وإيڤان تبچي خاتله بظهر امهه خايفه ..ماعدهم شخص يضرب شخص .

عائلتهه مثقفين ومبنيه ع التفاهم والتحشيش وشخصياتهم مرحه وحلوه بسرعه ينحبون چانت علاقتي مو هلگد بيهم بس من عشت ببيت جدو عرفتهم ..

المهم بذيچ الليله كلبچ إيديه بكلبچات ونومني بره بالممر اليم الحمام !! والدنيا بنهاية شهر الـ1 تگص گص من البرد الليل كله ارجف قررت افتح الكلبچات بقيت ادور على شي ينجيني لما رحت قربت يم البوري المأسس للتواليت گعدت يمه وبقيت افل بالبرغي المثبت التأسيس تقريباً من المغرب لليل اني افتح بيه لان ضابينه قوي

دخلت إيڤان للممر وآني سويت نفسي نايم تقربت يمي شافتني شكلهه مرعوب مني وخايفه بوقتهه چان عمرهه 13 سنه فتحت عيوني وهيَ شهگت ونزت .. إيديهه رجفت ورجعت لوره .. أشرتلهه تسكت وگتلهه جيبيلي ذاك البرغي

ابتعدت خايفه ومبرطمه من الخوف

- أخاف منك

ضحكت على تفكيرهه

- بابا ماآكلچ بس جيبيلي هذا البرغي حطي بإيدي من وره

بقت تتقرب شويه شويه وعاگده حواجبها تريد تبچي

- شتسوي بيه؟؟

بنفاذ صبر

- چؤ چؤ أستغفر الله
أريد احُك ظهري بيه يحكني

- آني احكه الك خف يتلوث من البرغي

خبلتني بفهاوتهه عصبت عليهه وخزرتهه

- جيييبببي اگلججج

إيديهه رجفن وفزت مرعوبه

ركضت جابته وهيَ ترجف تفاجئت بطفولتهه وحركاتهه البريئه رغم هيَ بالغه وعمرهه بوقتهه 13 سنه !!.. الي بعمرهه تلگاهه شوكحاتهه وتعرف كلشي وصلفه ماتخاف بس هاي شنو !؟

حطت البرغي بإيدي وگتلهه

- مو تگولين حچيتي وياي تره آني شبح وإذا حچيتي لاأحد اطب براسچ