جحر الشيطان

الفصل الثامن والعشرون

قالت فتون ودموعها تتساقط بغزارة:
مقدرتش يانبيل ..مقدرتش..أنا مش عارفة إزاي بس هقف على قبرها وأقولها إنى ضعفت؟..إن حبى ليه كان أقوى من حبى ليها ..إزاي..إزاي؟

اتجه إليها نبيل يمسك يدها بقلق قائلا:
طب اهدى بس واقعدى ارتاحى يافتون..هيجرالك حاجة بالشكل ده..

جلست ليجلس نبيل بجوارها وهي تقول بألم:
خلاص يانبيل مبقاش فيه راحة.

لتنظر إليه قائلة بمرارة:
ياريتنى سمعت كلامك من الأول يانبيل..ياريتنى ما دورت عليه..ياريتنى مالقيته ولا جيت مصر وعرفته..كنت سبت عقابه  للى خلقه.. هو اللى ينتقم منه على قتله ميسون..حتى أخته كمان خليتك توقعها فى حبك عشان تكسر قلبها وينكسر هو كمان.. كنت عايزاه يخسر كل حاجة وأهو أنا اللى فى الآخر خسرت..خسرت قلبى زي ما خسرت أختى قبل كدة.

سمعا صوت تحطم شئ بالخارج..لينظرا إلى بعضهما البعض بجزع قبل أن ينهض نبيل ويهرع إلى الخارج تتبعه فتون..ليجدا صينية على الأرض وزجاج مكسور ليدركا ماحدث بقلب وجل..لقد سمعت دارين حديث فتون..لتنظر فتون فى حزن إلى نبيل الذى أغمض عينيه فى ألم..ربتت على كتفه ففتح عينيه ونظر إليها يشعر بالضياع..فدارين قد ضاعت منه ولم يعد لحياته أي هدف او معنى..قالت فتون بحزم:
روح وراها.

نظر إليها فى حيرة لتستطرد قائلة:
حصلها..قولها اللى فى قلبك..أنا واثقة إنها هتسامحك.

قال نبيل:
بس...

قاطعته قائلة فى حزم:
انت لسة هتبسبس..روح وراها..إلحقها يانبيل..كفاية واحد فينا انكسر قلبه وخسر حبه.

أومأ برأسه وهو يغادر ليقف بغتة ثم ينظر إليها قائلا:
وإنتى....

قاطعته قائلة:
متقلقش علية..أنا هروح الفندق وهبقى كويسة.

ابتسم وهو يومئ برأسه ثم يغادر بسرعة..تتبعه بعينيها فى حزن وهي تبتهل إلى الله أن تسامحه دارين فنبيل يحبها حقا وان لم تسامحه سينكسر قلبه بدوره وسيكون ذلك بسببها..هي فقط ولا أحد غيرها.

********************

إنطلق نبيل خلف دارين..فلم يجدها..انتابه اليأس وكاد أن يتوقف عائدا إلى الشركة ليحاول الاتصال بها وقد نسي هاتفه بالشركة..لتلتمع عيناه وهو يلمحها وسط الزحام تجرى مسرعة..تتخبط فى بعض المحيطين بها..ليشعر قلبه بالتمزق وهو يدرى سر تخبطها...ناداها فتوقفت لثانية ثم التفتت إليه وما ان رأته حتى ظهرت الصدمة على ملامحها لتلتفت مجددا وهي تعدو مسرعة..أسرع فى عدوه حتى لحق بها ليمسك ذراعها يوقفها لتنفض ذراعها من يده قائلة فى مرارة:
سيب إيدى..جاي ورايا ليه..ها..جاي ليه؟عايز تتأكد إنك نجحت فى إنتقامك وإنكم حققتم اللى كنتوا عايزينه..ألف مبروك ياسيدى..نجحتم فى خطتكم وبإمتياز..كسرتوا قلبى وقريب اوى هتكسروا قلب ياسين..