قصص _ عبر _ وحكايات

الجزء الحادي والعشرين

قصة باللهجة العراقية

يسولفلي احد الاصدقاء يگول....
بالتسعينات. چنت اشتغل سایق سیاره اجره .چنه مجموعه من السواق..واجه ويانه سایق غريب سيارته لاندكروز عريض 1982..گال انا اسمي (كريم ) چنت اشتغل على خط الگرنه ' (القرنه). گلناله اهلا بيك . وسيارته مميزه جميله ومكتوب بنهايتها على الجام (المنذوره).. گلناله المن منذوره... گال هاي قصه طويله.. گلناله احچيها ألنه.. گال چان عندي سياره لاندکروز 79 تعبانه.. اشتغل بيها على خط گرنه - دیر... وبيوم من الايام وانا بالگراج شفت مره عجوز وعدهه (گونیه)..ولا واحد من السواق قبل يركبها وياه ، الكل يگلها ركبي بالسياره اللي بعدي.. ومن وصل السره الي..گالت يمه. ركبني وياك انا تأخرت.. گلتلها. شنو عندچ گالت هاي (الگونیه).. باوعتلها واذا بيها ما تنجرع من ريحتها العفنه.. گلتلها خاله ماگدر اركبچ وياي .. گالت يمه فدوه اروح لنعالك صعدني وياك.. ایگول (کریم) کسرت خاطري صعدتها وياي. وصعدت الگونیه فوگ على السله....
یگول مشينا وبالطريق نزلت كل ( عبريتي) بقت بس هية.. گالت يمه تگدر توصلني بهذا الشارع الترابي بداخل الزور.. گلتلها ما أگدر..... گالت ماگصرت يمه نزلني هنا .. أوگفت اريد انزلهه ............ كسرت خاطري.. گلتلها خاله راح اوصل ركبي....مشينا بطريق گله طسات وترابي بمناطق هور مجففه.. گالت "يمه وصلنا مدت أيدها انطتني ربع دينار أمشكك گالت يمه هاي كروتك .. وگفت گالت بعد امك نزلي ( الگونیه) يگول ' حبست نفسي من ريحتها ونزلتها للارض... باوعت وشفت 3 أولاد أزغار حفاي وهدومهم وسخه ومشککه اجو ركض عل ( الگونیه).. گالت العجوز اشكرك يمه تگدر تروح .گلتلها خاله أكدر اعرف شنو بالگونیه ..
گالت يمه اترجاك تروح اگلتلها لا ماروح حتى اشوف البيها .. فتحتها وگاموا الأولاد الزغار... يطلعون منها ' طماطه وخيار اصفر وفواكه عفنه وذابله وطلعت (کرشة خروف..واكل (كله معفن) ..ضلوا الزغار يأكلون من الخضره المعفنه ....وانا مامصدگ اللي جاي اشوفه ... گتلها شنو هذا خاله ...
گالت ذوله اولاد بنتي الميته وابوهم انفقد بالهور .... وكل الناس شالوا لأن الهور جففوا مایه..وانا بقيت هنا بهذا البويت الگصب. مثل ما انت شايف ... گلت بيني وبين نفسي ... والله لأقرضن الله قرضا.......... انا ما املك غير هاي السياره...........رحت من وقتها وبعت سيارتي ب750 الف.. گالت ( ام حاتم زوجتي ليش تبيع السياره ...؟؟؟ گلتلها اريد اشتري احدث منها.........!!! سكتت...!!! اليوم الثاني رحت للسوگ واشتريت للعجوز كل ماتحتاجه وبنيت ألهم غرفه من البلوك وسياج وسگفتها وجبتلهم الطحين والتمن والدهن وكل اللي يحتاجونه من الاكل وكل مستلزمات البيت وگلت للعجوز انا بمثابة ابنچ اي شي تحتاجين انا بخدمتچ وتحت امرچ انتي والزغار... دعتلي العجوز بالخير وبقيت كل يومين امر عليهم اشوف احتياجاتهم.. وزوجتي ام حاتم کلت گلبي يوميه تسألني وين السياره وين السياره..وانا أگلها انشاء الله انشاء الله انقطعت عن العجوز فتره.... و بيوم من الايام رحت للكراج اسلم على اصدقائي السواق ..
رحبوا بيه وبعد السلام والسؤال عن الصحه والاحوال ... گالوا اكو شخصين كل يوم يجون يسألون عنك واحنه محتارين مانعرف عنوانك وبثناء هذا ' الحچي .... گالوا ذولهما أجوا .. بعد السلام گالوا انت کریم ابو حاتم ... گلتلهم
گالوا اركب ويانه بسیارتنا ، ركبت وانا خايف..من عدهم ... گالوا من وين تعرف العجوز واليتامى حتى تبيع سيارتك وباب رزقك... گلتلهم ما اعرفها بس أتگطع گلبي من شفتها وهي تسحل گونية المزابل حتى توكل جهال بتها..... گالوا منو سماك کریم... گلتلهم والدي الله يرحمه گالوا صدگ من سماك کریم .... گالوا تعال ويانه لمعرض السيارات واختار سیاره ای سیاره... گلت ليش .... گالوا..بدل سيارتك..... گلت وانتم شنو علاقتكم بالموضوع... گالوا أخذلك سياره واسكت..... یگول اخذت السياره های اللى جای تشوفونها
كالو اخذلك سياره واسكت..... یگول اخذت السياره هاي اللي جاي تشوفونها بعينكم. وكملت كل أوراقها ورجعت البيت، واول ماشافتني زوجتي ام حاتم بالسياره الجديده تفاجئت وما عرفت شنو تگول، بس شفت الضحكه على وجها وعيونها تصب دموع، ' ومن يومها كتبت عليها المنذوره، بس چان گلبي مامرتاح اريد اعرف سالفة الولد اللي اشترولي السياره منين وشنو علاقتهم بالعجوز، لكن ربك مایگطع وحب يطمن گلبي ، وبالصدفه وعن طريق زلمه خير يگول عرفت انو زوج بنت العجوز راجع لعمته واولاده ، وربك رازقه من اوسع ابوابه وذوله الجوني يشتغلون عنده، بس همه ماحبوا يذكرون اسمه گدامي وصية منه ...

وگلت المال والملك لله سبحانه ومايضيع شي عند الله وسلامتكم اصدقائي