#السلام عليكم
بارت جديد
. .
قبل مايروحو لبنات للطابلة لبسو عبايات و خمارهم وراحو قعدو فوق الطابلة لي كانت معمرة بالماكلة
لوجين بهمس/ 1 2 3 4 5 6 7 8 وباستغراب آااااو 8 عباد في طابلة تع الدوبل تاعهم
شافتهم كل واحد راح لكرسي وقعد فيه كأنهم حافظين بلايصهم
الاب قعد في صدر الطاولة و العم قعد في صدر الطاولة الآخر و مرت العم بحذاه من جهة اليمين و بحذاها جهينة و ميساء و مقابليهم ليث و جواد
ونفس الحاجة في الطرف الآخر
راحت لوجين قعدت بحذا جمانة و هي متشوكيا و تقول في قلبها " كيفاه راح يهدرو مع بعضاهم و بيناهم 3 ميترات "
هي هزت الفرشيطة باش تبدا تاكل لاه يضربها فؤاد برجلو من تحت الطابلة خزرت فيه بمعنى واش تحوس وهو قاعد يخزر في الفرشيطة
لوجين مفهمتش و دارت عند جمانة لي قالتلها بهمس......
جمانة/ ماتاكليش حتان يبداو الكبار
لوجين/ واش قصدك نسناهم حتان كي يبداو ياكلو
جمانة/ وي
لوجين/ والله هادي مليحة هوما وكتاه بغاو ياكلو ياكلو وحنا نستناوهم
جمانة/ نقصي صوتك
لوجين/ سما كون هوما شبعانين و ماراحش ياكلو حتى حنا ماناكلوش
جمانة/ بلعي راهم يشوفو فيك
لوجين/ وش دخلني فيهم ......... والله
كانت راح تهز لوجين اللحم بالفرشيطة قاطعها باباها
احمد/ باسم الله الرحمان الرحيم
كمال (عمها)/ باسم الله الرحمان الرحيم
وبداو ياكلو خزرت فيهم لوجين كيفاه ياكلو بالموس و السرفيطة لي يمسحو بيها فمهم كل شوي و الأسوء و هوما ساكتين
لوجين/ اوااااه انا بلاصتي ماشي لهنا
خزر فيها باباها
لوجين/ متخزرني منخزرك ... وشي هاد الهدوء الناس كي ياكلو وخاصة اذا عرضو كاش واحد ، يهدرو ، يڨصرو ، يضحكو باش تحلا الدنيا
احمد/ اقعدي
لوجين/ شبعت طالعة لفوق
احمد/ مكانش لي ينوض قبل ما نكملو كامل و نديسرو
لوجين/ سما كي ناكلوووو نستناوكم و كي نشبعو نستناوكم هه هادا ما خص
احمد يهدر مع كمال/ علابالك جامي كلات معانا يعني متعرفش القوانين
لوجين بسخرية/ زيد علي صوتك راهو ميسمعكش
خزر فيها احمد باش تسكت و رجع هدر مع كمال/ يا خويا ملي كانت وهي عايشة مع صحاباتها هادوك يعني حاجة باينة مراحش تتفهم حالتنا
كمال/ نورمال خويا تتعلم بشوي اصلا وهي مع هادوك لبنات من بكري ماراحش تعرف الآداب
لوجين/ وعلاه وشبيهم صحاباتي مكانش خير منهم
احمد/ والله عقليتهم مش كيما عقليتنا فكنت حاب نقولك تبعدي عليهم
لوجين تقلقت/ والله ما نبعد عليهم
احمد/ كي يجي الامر بين عائلتك و اي حاجة واحدوخرى تخيري عائلتك
كمال/ وفي هذي الحالة حاجة باينة ماراحش تخيري صحاباتك و تخيري عائلتك
لوجين/ عندكم يومين وين خرجتو وجايين تقولولي عائلتك وعائلتك مي اسمحولي عائلتي الحقيقية هي صحاباتي
احمد/ لا حنا هوما عائلتك حنا هوما لي تربطك بينهم رابطة الدم
لوجين/ صح مكانش بيناتنا انا و صحاباتي رابطة دم مي لي بيناتنا كثر من هاد الرابطة بينتنا العشرة يلي هي 20 سنة ... تخيل عشرين سنة وحنا مع بعض
احمد/ هيه بصح متقدريش تنكري بلي حنا هوما عائلتك الحقيقية
لوجين/ هه شكون لي كان يسهر معايا كي نمرض .. صحاباتي و ماشي نتوما ، شكون لي نعيطلو كي نحس روحي مقلقة و نفضفضلو .. صحاباتي و مش نتوما ، شكون لي يرجعو حزني لسعادة... صحاباتي ومش نتوما. شكون لي يجي يهربني من عند خالي ويعاوني ... صحاباتي و مش نتوما
هيه صحاباتي لي كانو معايا في الحلوة و المرة و سعات يهربو من دارهم كي نمرض و يقعدو عام يحاولو يطلعو هاداك الكاراج باش يدخلو ويباتو معايا في هاداك البرد وبلا فورنو باش كي تصرالي حاجة يكونو معايا مش نتوما لي تعيشو في قصر وانا نعيش في شامبرا وحدة لي كاينة فوق الكراج تاع خالي وبلا ماكلة و في البرد وكون ماجاوش صحاباتي لي يجيبولي الماكلة الا راني مت من الجوع و نتوما هنا وقاعدة تأشرلهم للطابلة المعمرة بسخرية تاكلو لي بغيتوه وانا مطيشوني لهيه تحت رحمة خالي يلي شبه منقرضة
أنت تقرأ
وردة الجوري {💜 باللهجة الجزائرية 💜}
Randomرواية من تأليفي باللهجة الجزائرية فيها تمهبيل 😉😉............الضحك 😂😂...........الرعب 😈😈.......الاكشن💀💀
