اقدار البشر

الفصل الثالث

ورجعت للبيت كملت شغلي وسبحت وصليت ونمت اول مانمت سمعت صوت هاتف باذني سلمى سوتلج سحر امج
وشفت امي بالحلم اشلون خلت التراب بالسرير وخلف السرير
كعدت مرعوبه وارجف مامصدكه الى سمعته اعرف امي ماتحبني بس ماتوصل لدرجه تسويلي سحر
تذكرت من كنت طفله اكولهه انت مو ام إنتي ظالمه لان ذبيتيني بيت جدي وكنت انضرب ضرب قاسي وبدون سبب
بس تذكرت كلام كانت بيبي تردده امج سلمى ام السحوره الظاهر عدهه سوابق بالسحر بيبي حجتلي اول ماتزوجهه ابوى عاشو بيت بيبيتي وكانت مأذيتهم بالسحوره لكن بيبي ذكيه رايحه ومفتشه بغرفتهه شايفه بمخدتهه طلاسم واوراق ولما واجهتهه اتهمت بيبي إنّو هي تسوي سحوره  وصايره عركه بينهم وابوى يصدك بأمي بكلشي عاد جدى طردهم من البيت وطلعو بس اني بقيت يم عمتي ورده
وأبوي من يسكر يجي لبيت جدي يترنح ويكولهم اريد بنتي  واني حاضنه عمتي ورده وابجي وارجف من الخوف والبرد كانت الدنيا شتا وبارده لزمني من شعري وسحلني واني ابجي على عمتي ورده وعمتي طلعت تركض ورآه بالشارع والدنيا ليل ودكوله عوفهه حرام عليك دفع عمتي وضربهن عاد اني عضيته  وانهزمت حضنت عمتي وابجي رجع علي وضل يضربني لحد ما خشمي نزف دم
كل هذه الهوسه والحنيه الي ضهرت فجأة لانه يريد فلوس من جدي وفعلا جدو انطا فلوس وكله عوفهه وأخذ الفلوس ومشه طفولتي كانت كلهه ظلم
الى شفته بحياتي من بيت جدي لبيت زوجي كله ظلم وضرب من بيت جدي لبيت زوجي
عادل بدايه زواجنا كان يحبني ويريد يرضيني لكن بعد فتره تغير علي من كثر ما يوزو علي حتى مصرف مينطيني اكثر شي عمتي ورده تصرف علي وتنطيني فلوس وعادل ياخذه مني
وإذا ما انطي يدور حجه حتى يتعارك ويضربني واظطر انطي حتى اخلص من المشاكل
بعد مافكت السحر ام بنين بدين استقر وارتاح لان السحر الي سووته امي تسببلي بتابعه اسمهه (ام الصبيان)
وين ما اروح اشوفهه بكل مكان  ومن اشوفهه ارعب واصرخ حتى بالنوم تجيلي صرت اخاف انام ومن اضوج تمرضني وحتى ردت اقتل نفسي لكن لزموني ومخلوني
بعد ماتاكدت امي مسويتلي سحر بقيت ابجي وكلت هي كنت صغيره ذبتني وما ربتني وتاليتهه تاذيني بالسحر رحت لام بنين ابجي كالتلي ها شفتي منو مسويتلج السحر لو كايلتلج مجان صدكتيني مجنت متوقعه امي تكرهني لان عاتبهه وكتلهه انت ظلمتيني وذبيتيني بيت جدي
وره شهر انفك السحر وحبلت الحمد لله
لكن حمواتي ما يكعدن راحه كل يوم مشكله عادل لنه بالحديقه غرفه ومطبخ وعزلنه وخلصت منهم وارتاحيت بمكاني الجديد لكن عادل بده يتغير علي ويدور الحجه حتى يضربني كظيتهه بجي فتره الحمل لحد ماجبت بنيه سميته ريم
وفرحت بيهه لكن أهله لايحبوني ولا يحبون بنتي  وعلاقتي بأهلي صارت زينه ونزورهم لكن من اشوف امي اتذكر السحر والي سووته بي
زوجي مثل ماهو يعاملني معامله سيئه ضرب واهانه ويادوب يأخذ حاجته ويعوفني صار عمر بنتي سنه واجاني ولد سميته عباس مصرفي كله من عمتي ورده اني وأطفالي
فد يوم كنّا طالعين وقت المغرب للسوك حجيت كلمه تضايق مني زوجي وضربني على رجلي ضربه قويه حسّيت نار ودخلت برجلي وصرخت وبقيت ابجي لحد ما رجعت للبيت
سويت العشا واني رجلي توجعني من الالم ابجي اتصلت بي عمتي وجاي أكلمهم حسّيت اختنكت وعيوني ماتشوف رحت لزوجي كتله عادل اني مختنكه وما اكدر أتنفس ما حسّيت الا اغمى علي

يتبع ...