اقدار البشر

الفصل الاول

القصه حقيقيه
اني ايلاف بيضا شعري اشقر عيوني كبار قصيره يسموني القزمه عمري الان 24سنه راح ابدي احجيلكم من اني صغيره
فتحت عيني عالدنيا لكين نفسي عايشه بيت جدي ابو والدي وعمتي ورده هي الي مسؤلة عن تربيتي الي افتهمته وسمعته من اهلي كنت الوسط بين اخواني وخواتي ومن عمري شهر أمي انطتني لبيت جدى تخلت عني وعن امومتهه والسبب والحجه اجيت وره سنه من ولادتها لاخوى وتريد تتفرغ لتربيه باقي اخواني وإني دفعت الثمن
صارت احداث الطائفيه والقتل عماتي سافرو لسوريا عمتي ورده كان ودهه تأخذني وياها لكن صارت سفرتهم سريعه وامنتني عند بيبيتي
بيبيتي امرأه كبيره ومسؤلياتهه هواي جدي رجل كبير بالعمر كان طيب عمامي 3وابوي4 لكن ابوي فقير وما بيده شي كل الأمور بيد امي
عمامي ميحبوني ميخلوني اطلع داومت لحد السادس وبطلوني من المدرسه بيبيتي صح تصرف علي لكن بنفس الوقت كانت قاسيه وياي تضربني على طول بسبب وبدون سبب وكلما اكولهه ليش بيبي تضرببيني دكول روحي لبيت اهلج...وإني مااحب اهلي ماشفت منهم اى حنيه من اروح يمهم احس نفسي غريبه وامي تفضل اخواني علي مو كأني بنتها أبد ماحسيت بيهه امي لا فد يوم حضنتني ولا باستني كنت احس ورده امي مرات أشك هذه امي  تربيت يم بيبي وجدو
عمتي تقى الصغيرة شويه اكبر مني تغار ودائما توز بيبي علي
من بطلوني من المدرسه خلوني اشتغل بالبيت مثل الخدامه لان محد يدافع عنى وغير تقى تتبلى علي وبيبي تضربني لكن عمامي شحجيلكم
اذا تأخرت اجيبله الشاى أو اكسر ثلج للماء حتى أجيبه يلزمني من راسي وضرب بالحايط مو كأني طفله
مرات أخذ صوره عمتي ورده واكابلهه وابجي واكولهه ليش عفتيني خليتيني للضيم من بعدج ياعمتي الدنيا ظلمت بوجهي وماعندي احد اشكيله جدي كلبه طيب وميقبل احد يضربني لكن تقى تستلم بيبي لو عمامي وتخليهم يطلعون قهرهم بي
عمتي الكبيرة متزوجه وعدهه ولد و3بنات  جاي تحجي ويه بيبي لان مداينه بيبي فلوس وتريد تزوج ابنهه
عاد بيبي اقترحت عليهه عندج إيلاف صارت 15سنه وشوفيهه حلوه وشقراء اخذيهه بلاش لا حك ولا ذهب
أتفقو بينهم حتى محد أخذ رأي لان يعتبروني ماعندي ظهر
بجيت لطمت محد اهتملي رحت لبيت اهلي
يمه يردون يزوجوني لابن عمتي بسمه
شكر بيهه ماتتزوجين
يعني انت ميهمش اقبل ارفض
بيبي لان تأخذ فلوس من عمتي انطتني إلهه بلاش
شنو هالكلام آخذي ابن عمتج وتالي تتعودين عليه
يمه مكروه وثقيل
يلى عاد منين اجيبلج ابو دم الخفيف
يمه اريد اسالج سؤال
اسألي
اني صدك ينتج وليش تعامليني هيج
مو مثل خواتي وليش ذبيتيني بيت جدي انت ظلمتيني وما أسامحج طول عمري
الام..أيا حقيره طلعي بره منو علمج هالحجي كلبه طلعي ما اريد اشوفج
رجعت لبيت جدي ودموعي تنزل مضطره اطاوعهم
حددو يوم العرس وكانهم حايودوني للإعدام هما يحفولي ويمكيجوني وإني بس ابجي عمري 15سنه كلشي ما افهم شنو زواج تمنيت الموت قبل مايجون ياخذوني

يتبع...