الياسمين الذابل

البارت الاول

أصبحتُ مُعتادةً على الحُزن دائماً
كُل شيء يسير عكس أُمنياتي وأحلامي،
أحببتُ السهر والعُزله رغمًا عني، لم أتمنى ذلكَ في يوم من الأيام ولكن قد أجبرتني الحياة على ذلك

#الياسـمين_الـذابل
#دعــاء

#البارت_الأول

صارلي فترة طويله واني بهذا البيت يزن ابد ماغير أطباعه القاسيه وياي
بالعكس معاملته السيئه تزيد يوم بعد يوم وماعرف شوكت راح يتقبلني ..

اني راضيه مايتقلبني بحياته بس اريده يحترمني ماريده بالصاعده والنازله يحتقرني هذا الشي مدمرني ...

اسعد كام يتردد اكثر على البيت ويريد بس الحجه حتى يسولف ويايه رغم انا اتهرب منه وكارهته كلش بسبب تصرفاته السخيفه
يزن بس يشوفه عباله انطي مجال كل مايجي اسعد ويروح لازم تصيرلي مشكله

ابو يزن جان زين ويايه وام يزن تعودت على وجودي وصارت تأمرني باحترام ومرات تصيحني اكل وياهم بس جنت مبتعده حتى لا يجي يزن ويشوفني كاعده بنصهم ويسويلي هوسه ومرات هم تضوج وتعصب مني بس مااحجي وياها ناطيتها احترامها

جانوا مجمعين بغرفة الاستقبال جبتلهم الجاي وكيك واسمع ندى تكل ليزن
- يزن اشرحلي رياضيات والله صعب ومجاي افتهم شي
- لا دوخيني ندى اني بروحي دايخ
- ماما حاجي فدوه لعد وين اروح ...
الام : اشرح لاختك شوي
يزن: انتم ليش ماتخلون الواحد يرتاح شوي
ندى: لعد اخذني لصديقتي ايمان ندرس سويه
- ماكو طلعه ليش ايمان تفتهم وانتي لا؟!
مو وياها نفس الصف؟!
تمتمت ندى بصوت ناصي
- استغفر الله لا انطيك ولا اخلي رحمة الله تنزل
عصب عليها وصاح
- ندددى.. شو لسانج طولان وصايره متحترمين
- اسفه يزن ...

عبرت من يمها وجنت لازمه الصينيه جانت ضايجه من اخوها وصاحت بيه بعصبيه
دوخري انتي منا.. بس تتخطفين

خليت الصينيه وصبيت چاي وخليت كيك بصحون باوعت لندى ونقهرت عليها رغم هي متحبني ودائما تزعجني تقربت وخليت يمها صحن كيك وچاي باوعتلي بانزعاج كلتلها
- اشرحلج اني
- شنوو ؟!! وانتي شتعرفين عيني
كمشت كتابها رياضيات خامس ادبي كلتلها  شنو مفاهمته
- ههههه ياربي انوب هاي تعلمني دروحي بابا روحي

واخذت كتابها مني بعصبيه صدك نقهرت لان فشلتني   كالتلها امها

- ندى قبل شوي تبجين وحايره خلي ياسمين تشرحلج مادام تعرف

يزن جان يباوع ع تلفزيون ساند نفسه على القنفه ومخلي ايده جوه راسه من سمع كلامنه لتفت باوعلي وهو رافع حواجبه ابتسم بستهزاء وهز راسه بطريقه ميأوس منها ورجع يباوع على تلفزيون
جنت اكره اباوعله واشوف نظرات الاستحقار ماليه عيونه ..

ندى : هاج تعرفين تحلين هاي المسئله

اخذت الكتاب منها وكعدت بصفها وراجعت بدايه الموضوع اخذت فكره عنه لان ناسيته شوي حليته وانطيته الها ابتسمت وكالت عفيه هاي شلون حليتي انتي دارسه
-  اي متخرجه