الياسمين الذابل

البـارت التاســع

#الياسمين_الذابل

#دعــاء

#البـارت_التاســع

بقينه صافنين ومصدومين بعض  ..
من الفرحه اجيت احضنه لكن تراجعت .. والله ممصدكه شفت واحد من اهلي ومو اي شخص جان ايمن ...   كالي

- ياسمين .. هاي انتي .. لج مااصدك والله
ضل يضحك ويبتسم بتعجب

- عيوني دمعن ابتسمت بفرح وماعرفت اعبر عن سعادتي ..  كلتله
- ايمن شلونك ..
- اني هسه صرت زين انتي شلونج
- كلش جاي افتقدتكم
-  واني كلش مشتاقلج  ماتوقعت اشوفج بعد
ياربي هاي انتي كبالي .. والله مجاي اصدك

- ولا اني اتوقعت اشوفك .. گولي اهلي شلونهم ماما بابا خواتي ..
- تمام .. كلهم زينين
- يذكروني ..
- ليش منو ناسيج حتى يذكرج ...

انتبهت ع يزن يباوعلي بأستغراب خفت وارتبكت بنفس الوقت ... بس ماكدرت اترك الشخص الوحيد الي شفته بعد غياب طويل وماساله عن اهلي

- ايمن طمني عليهم  بابا صحته شلونها ماما شلونها خواتي نجحن ؟! بتول واطفالها شلونهم .. بس طمني عليهم ...
هنا شفت يزن يمشي باتجاهنه

- بخير كلهم بس  ماخفي عليج .. عمو جانت صحته تعبانه وبس انتي بلسانه كل الوقت يحجي بيج
انتي ليش نقطعت اخبارج لا نشوفج ولا تتصلين علينه

- بابا ؟؟ شخيره ..
- ضربته جلطه  عابره بس هسه الحمدالله لكن ضغطه موتمام  ..
- لا ايمن لاتكولها .. الا بابا

- جاي اكلج هسه صار زين اطمئني و راح اكله شفتها لياسمينتك راح يرتاح لا تشيلين هم انتي ويامن جايه .. تعالي نكعد ...
مد ايده راد يلزم ايدي وهو يكول تعالي نكعد  وقاطعه يزن قبل لا يلزم ايدي
يزن : مرحباا
التفت علي ايمن : مرحباا ؟؟
- منو حضرتك
- انت الي منو!!!؟

ادخلت بسرعه وكلت ليزن ..

- ايمن ابن عمتي .. و يزن .. وماكدرت اقدمه على انه زوجي .. سجاني .  معذبي .. لو اكول فصليته ..

كلت يزن وسكتت حسيت ايمن تغيرت ملامحه سلم علي بشكل سريع ودار علي ابتسم وكال
- الحمدالله اني شفتج ..

نظرات  ايمن لهسه متغيرت من يشوفني يبقن يلمعن ومايحاول يرمش .. باوعت ليزن عاكف حواجبه  و ايمن حسيته ضاج  كل ليزن  ..
- ممكن اكعد ويه ياسمين شوي
يزن : لا ..

تعجبت من رد يزن واسلوبه جان مستفزز
ردت اكسر الشر الي بينهم حاجيت ايمن

- ايمن ..  راح تسلملي على اهلي .. ؟!! طمن بابا علي .. كولهم اني مناسيتهم كل الوقت على بالي وافكر بيهم وان شاء الله ارجعلهم عن قريب ..
-  راح ترجعين  ..
- ان شاء الله..

باوعت ليزن حسيت الكلمات تحجرت بلعومي واني اشوفه واكف كبالي وعاكف حواجبه .. وميت سؤال بنظرة عيونه